關於我：PART SEVEN - 西洋哲學篇＠思隨筆動......

2003-06-01 14:32:01| 人氣36| 回應0 | 上一篇 | 下一篇

關於我：PART SEVEN - 西洋哲學篇

推薦 0 收藏 0 轉貼0 訂閱站台

圖左：被推舉為二十世紀最偉大的哲學家 - 維根斯坦 (Ludwig Josef Johann Wittgenstein 1889 - 1951)

我對哲學興趣嘅開始，係由四年前嘅一位前度女友推介咗一本書俾我，當我睇完呢本書之後，開始令我對哲學產生興趣。自始之後，我每一次行書局嘅時候，都會睇吓啲哲學書，睇到啱心水之後我會第一時間買返屋企。

當然，縱使我對哲學有一定程度嘅認識，但係我覺得自己喺呢方面嘅認知仍然係好貧乏。正如蘇格拉底所講，若果要擁有智慧，首先要承認自己無知。

喺西方哲學，小弟比較相信蘇格拉底、柏拉圖等古希臘哲學家( 按：中世紀西歐嘅主流哲學思想，係以亞理斯多德為主，而蘇格拉底同柏拉圖嘅思想，就受到當時嘅教會所抵制。但係喺拜占庭帝國，蘇格拉底同柏拉圖嘅思想反而受到重視。之後到咗文藝復興時代，西歐人民至有機會接觸到佢哋嘅思想。) 以及其他哲學家例如笛卡兒等。佢哋嘅思想都有一個共通點，就係相信理性係獲取智識嘅唯一途徑。

而近一個世紀，分析哲學興起，令哲學產生翻天覆地嘅變化。呢一派嘅哲學特色係利用科學同邏輯方法嚟解決哲學問題。喺李天命嘅《語理分析的思考方法》中有一個例子可以解釋到分析哲學同傳統哲學嘅分別：

古代哲學：「甚麼是 X ?」
近代哲學：「 X 在人類知識的限度以內嗎?」
分析哲學：「在論題中，『 X 』一辭是甚麼意思? (比如說，怎樣界定或例釋『 X 』? ) 」

從以上嘅例子可以睇得出一點，就係好多古代、近代哲學家所思考嘅問題，喺分析哲學家眼中，可以話唔會搵到答案。因為連關鍵詞語嘅定義都未界定清楚，根本無可能作出思考。

而呢一類哲學家嘅著作亦都成為我嘅心頭好，例如羅素、維根斯坦、柯爾、李天命 (另文詳述) 等等。當各位睇多啲佢地嘅著作，各位可以從中破解好多文字把戲，尋找終極真理。

我要檢舉

台長：秋無垢，天地無語。

人氣(36) | 回應(0)| 推薦 (0)| 收藏 (0)| 轉寄
全站分類: 興趣嗜好(收藏、園藝、棋奕、汽機車)

回應(0)