日期 : 10/11/2002
時間 : 1645 – 2200
人物 : 中七理仝人(除左黑仔) + 幾個同學既friend
地點 : 西貢大澳門
我地班籌備左好耐既大旅行日終於都搞得成左喇^^. 各位同學既反應非常踴躍, 今次我地全班所有既人都有去呀, 就連呀翟生返左大陸都得登趕頭趕命碌返落來, 真係辛苦晒佢喇. 雖然遲左少少, 但好彩都無影響到我地既氣氛……:)
首先我地就響牛池灣果樹買野, 總共都差不多買左成千三蚊既野……無計啦, 成三十個人喎……買晒野之後, 我地就行上少少去等小巴, 我地一齊企響樹等等等, 原來有一架小巴已經停左響路邊(仲等我地怨佢成千年先有一架……)
入到去, 個天都已經差不多黑喇. 同想像中既一樣, 勁易等爐, 因為翌日係星期一, 好多人都要返工返學, 唔似得我地咁. 所以, 我地一口氣就”立”左三個爐. 透爐既時侯, 人人都話想見識下文海既無報紙透爐法, 但係可惜, 哩個時候文海係未到架.
天越來越黑, 我地人就越來越high. 大家拎住支電筒, 照住來燒野食, 就好似人地照田雞咁, 勁搞笑. 燒燒下見得閒又會無啦啦起哄, 好似成個郊野公園都係我地買左咁. 最最搞笑都係阿肥仔mio, 佢一開波就窒呀卡瑛姐, 勁搞笑. 大家為左唔想畀呀卡瑛打. 就唯有係咁搵位攝, 務求身邊都塞滿晒d唔係卡瑛既人.
燒既野食其實無都特別, 都係果d, 不過我地個金菇都整得幾好食, 而d綿花糖呀肥仔就食到好似食春袋咁, 勁變態. 而當d蕃薯……呀, 講起蕃薯, 就不可不提阿瑩姐既愛的宣言. 真係震撼呀, 原來阿肥mio個屎忽對呀塋姐係有咁大吸引力, 令佢可以放低矜持同尊嚴, 響我地面前大聲咁講…….”我淨係要你一個!!”
之後, 我地吃到七七八八就碌晒上去放風箏果個山頂果度玩, 阿翟生同光頭唔知做咩得罪人, 就畀成班人趕晒落山, 兩條友好似傻佬咁通山跑(唔佢係猩猩都唔得….). 去到哩到, 我地都好似已經玩左好耐, 其實, 哩個時候阿文海終於到喇, 我地就成,班友一齊佢, 等呀光頭一帶到佢上山頂, 以”我地咩班架??”為記, 就衝晒出去一齊做佢. 但係…….衝就好成功喇, 做就始終做唔到, 下次啦唯有……其實, 夜晚坐響果個山頂係好舒服架真係^^
之後, 我地打電話畀個小巴佬, 佢竟然話要成十一點鬆d先可以入來接我地出去, 痴線, 果時先九點半咋…….咁我地咪投暗票, 決定行出去大清水迴旋處果度搭巴士出去咯. 果段路其實幾遠架都, 但我地又唔係好覺喎, 可能因為一來又係下坡道(o岩阿建喎…: D), 二來又一大班友一齊行……玩得好癲架佢地, 阿塋姐同佢個friend就真係high晒. 係咁玩阿mio, 光頭同翟生佢地三個. 其實都唔係話邊個玩邊個既, 因為大家都好high. 開頭都係你一句我一句咁窒下, 之後就開始摸喇, 做都咁都唔識珍惜……我都無野好講喇真係. 去到最尾, 佢地5個仲搭埋同一架小巴, 真係威水…..我好想知發生左咩事呀真係……哈哈 : D
之後, 其他既人都搭埋巴士出坪石走喇. 咁我地個大旅行日就完左喇. 都幾開心架今日, 唔好講笑, 好少可以真係咁大班人一齊出來玩呀真係……不過有樣野我覺得幾對文海唔住, 就係佢一入到來, 我地就話要走, 要佢白行一趟……><真係唔好意思呀文海……
文章定位：
