前幾日同鵬同學傾計仔講起, 原來學校有好多野都係剝奪緊學生們對學校既歸屬感.
各位試想一下,一個比較正常既中學生, 唔計訓覺既時間, 響屋企多丫, 定響學校多哩?我相信一定係學校!所以, 學校就好似我地年少時候既另一個家咁. 其實校方本身都察覺到哩一點, 所以近年家長教師會非常之流行. 就係咁解.
如果一個家庭, 好溫馨好融洽, 我地會話哩一個係一個好好既家, 模範家庭云云,
於是乎, 人人都會去學點去maintain一個好既家庭.
[為左囡囡, 辛苦d都無法子啦.] ß 成日都會聽到好多家長咁講. 佢地唔只講, 仲有
做添, 就好似一有名校派幼稚園入學表格, 就打晒蛇餅咁.
不過我就發現到有一個好怪既現象, 學校成日就口口聲聲同我地講, [我地係你既第一個家, 所以係地要點點點同點點點呀……], 不過, 我就覺得佢地好多時都忽略左要去畀學生有歸屬感.
其實如果學生對學校有歸屬感, 對學生, 老師同校方來講, 都係好事.
學生如果有歸屬感, 佢地就會做好自已既本份, 就好似校服儀容呀, 讀書會畀心機d呀, 會比較熱心去幫學校做野, 當學校有咩事時, 都會出聲, 出力咁幫. 大家都會同心協力去搞好一間學校. 因為如果有歸屬感, 佢地就會覺得間學校自已係有份既, 自自然然會好好咁對待.
但香港(我唔知其他地方係點)既學校, 絕大部份都好大喜功, 鐘意做門面功夫. 為左達到咁既目的, 就本末倒置. 就好似校服儀容咁, 好多時學校既訓導處好”食古不化”, 一味咁認為, 如果要將自已學校升格, 就要學生果果都好似校服公司d公仔咁,
唔得架. 以”黑襪”為例, 香港作為國際大都會, 學校帶學生去公開場合時, 都要學生”好好睇睇”, 唔好失禮人. 不過, 竟然就要d學生個個都白襪仔咁, 以國際既standard來講, 非常失禮呀. 你試下叫個學生去BIG5著對白襪仔見工丫, 我敢講一定打左個折! 哩樣野, 學生自已都知, 偏偏學校就要響哩個位同d學生抗衡, 好似有d損人(令學生uncomfortable)不利已(摧毀歸屬感). 要將學校升格, 唔係一d咁既門面功夫做足, 就可以架, 既然係咁, 係唔係應該將d時間放響教好學生本身, 而唔好放晒d時間同manpower去d咁既野上面哩? 大家可能以為, 學校咁去做, 係因為d名校都係咁. 不過, 剛剛相反既係, 名校反而捉得唔嚴, 佢地容許學生響校服方面好多變化. 學生們有自由, 有歸屬感, 反而更加唔會畀自已既校服儀容損壞到學校. (唔統一, 不過人人都唔會過份, 行出來, 你會覺得個學生齊齊整整!)
另外, 有另一樣野就係放學留校, 我真係唔明. 點解一間學校要畀學生放學留校係咁難!?諸多藉口, 夜校, 清潔公司….etc.層出不窮. 日日放左學, 留一陣就趕人咁, 好難會令人覺得哩個地方係屬於自已既. 無錯, 如果我地唔走, 清潔公司可能會唔夠時間做野, 又或者學生有意外會受傷…等等. 但係唔係個工作方法一set死左就一定唔改得??外判既service仲易傾啦其實, 問題係點傾同肯唔肯傾! 學生有無錯係可能有意外, 但係直到夜一夜都好, 學校都仲係有人, 起碼有咩事都會有人睇住, 其實講到底, 就係人人都怕問責, 都怕要負責任!就係咁, 又要犧牲學生同學校既關係….
仲有既就係, 作為前線既教育工作者, 教師係好重要既一個角色, 佢既一言一行, 對學生既影響都好深遠. 而佢地響班房入面, 又可話係學校既代表. 老師們既所有野都要好小心, 如果唔係, 又會影響到歸屬感. 就好似上堂咁, 如果老師既態度好唔負責, 學生就會覺得師生間既關係好疏離. 如是者, 就會衍生到好多問題, 例如….
/ 學生間會互相談論, 甚至以訛傳訛, 有損校方威信
/ 學生對校園生活失卻興趣
/ 師生摩擦增加
等等…… 所以, 老師既行為, 都係一個好值得注意既環節.
[[當然, 好多學生本身既行為都係好有問題, 令老師好頭痛(>__<) 哩一點我相當讚同. 不過, 空穴來風, 的確有教育從業員既行為係有問題, 損害左師生關係同學校聲譽, 不過, 我今日講既不在此例, 故此恕略]]
其實我仲有好多野響個腦入面想講, 不過時間關係, 就此絕筆.
文章定位：
