我有一個瘦小既媽咪。
呢個咁單薄既身體，生我同我哥，都係開刀生，生完之後身體好差，我地bb果時都係由爸爸黎湊。
但係呢個咁瘦咁薄，又傻下傻下既媽咪一d都唔弱，心入面愛呢個家既力量，反而係全屋最強。
佢有個威嚴既老公、有個迷失方向又大脾氣既大仔、仲有個脾氣複製自佢老豆又反叛既女。
呢三隻野，是但抽其中一件出黎都惡頂，莫講話三件一齊黎。
呢三件咁惡頂既野，長期處於冷淡狀態，好少碰埋，但係一碰埋，火屎都飛埋出黎，而我呢個媽咪，往往就係修橋補路果個。
媽咪幫爸爸手打理佢地間廠，以佢咁弱小既身體，其實挨得到真係一件好奇蹟既事。爸爸脾氣都幾大下，又成日趕貨，又要睇住成廠d人有冇做錯，仲要佢好多時出出入入大陸睇廠，加上要應酬一大堆又仆街又貪心既人際關係，我真係唔可以想像比著係我會點。
記得佢話佢當年間廠岩岩起家果時，唔知點自己一個女人唔知做乜比人叫左去個茶餐廳，搵佢講數定不滿果d，佢話好彩佢當時夠鎮定，如果唔係...(唔記得)。說時沾沾自喜，的確，媽咪係好威喎~
記得我細個果時媽咪成日係梳化度睇睇下電視或報紙就合埋眼訓覺，因為佢長期失眠，係床訓唔著，要係梳化先訓到一陣。
有一次，我襯佢合埋眼望真佢個樣，然後驚嘆一聲「媽咪，你d睫毛好長呀…」
純粹一句由衷讚美既說話，但係佢竟然厭煩地回我一句「你大個要扮靚扮飽佢！」
當年幼少既我，個心頓時劃出一道血痕，可能因為咁，我唔再敢表達自己啦…
其實而家諗返，係佢當時做野太大壓力、太辛苦，難得休息一陣，我仲講埋d無謂野煩住哂佢休息。
我知媽咪係鍚哥哥多d，哥哥點自暴自棄、點避開我地都好，媽咪都盡心盡力咁想去關心佢，成日搵埋哂d爛藉口去睇下我哥，例如：「中午去邊食飯好？去哥哥間鋪頭食啦！」、「丫~我件衫有冇擺左係你間房呀？」說畢就鏟左入哥哥間房度扮搵順便爭取機會同佢講多兩句說話等等，明明佢地享受慣要坐得舒服而哥哥間鋪頭就坐得唔舒服既 ，明明唔見衫都無可能係哥哥間房，好明顯睇得出都係搵藉口，所以真係話佢傻下傻下，但係其實又真係傻得幾可愛。
媽咪係呢間屋既和平使者，但係相反，我諗我係全屋同佢最多火花果個，我好多時候想法同佢都有分歧，再加上我既固執。
其實都唔難明，一黎我無哥哥由細到大都咁乖咁聽話，佢話好我就話好；二黎我有自己既意見但係我又無爸爸既威嚴，所以媽咪不甘於聽我既說話。(假設我既想法都係正確既情況下)
我知道媽咪唔係咁相信我。例如有一次係澳日娛樂版度有張伊能靜既相，但係個白痴記者竟然話係黎端恩，唔記得媽咪講乜，總之係指住幅相黎講黎端恩既話題。我就話返比佢知，果個係伊能靜唔係黎端恩，媽咪竟然同我爭論佢明明係黎端恩，但係佢係連伊能靜係咩黎都唔知就同我咁肯定佢唔係伊能靜。
可想而知，媽咪對於我既信任，有幾低。就連我幫佢出show影既相，佢都覺得唔滿意。
或者因為我細個反叛過，呃過佢地，傷過佢地既心啦，可能我真係罪有應得。
我最叻企埋同爸爸同一陣線黎蝦媽咪，因為只有果個時候我先至可以keep到我既想法之餘，媽咪又唯有接受我既想法。(唔知點解，大多數時候我同爸爸都係想法一致，yeah! give me 5!) 呢個時候，媽咪就會嘟下個咀，吟吟沉沉幾句聽唔到佢講乜既說話，而我，就露出一個得戚既笑容。
雖然媽咪係鍚哥哥多d，不過我始終最鍾意都係向佢撒嬌。我記得我前一排做論文壓力大到自己係度喊，含住眼淚走去佢間房度。我聽唔到佢講乜，其實講乜都唔重要，但係佢講既時候，佢摸下摸下我塊面，果種摸法，係真係好愛果個人好憐惜果個人先至會摸出同一個韻律。呢個韻律，將我屈係心入面既壓力，一次過釋放哂出黎，喊完之後，我先至可以繼續通頂。
又記得有一次，我又遇到d令人洩氣既事，得我自己係屋企，好氣餒好唔開心，我走左入去媽咪間房，攬住佢果件成日著、掛起左既晨褸，聞下媽咪既味道，感受下媽咪既餘溫。之後，我又正正常常咁去做我要做既事喇。
哈哈哈，又諗返起細個睇過一套叫彭彭呠呠車既卡通片，故事係講彭彭搵返媽咪既旅程，架呠呠車聞下朵花就會足滿返力量，而佢媽咪頭上就正係插住一朵花，我相信彭彭唔係因為鍾意鮮花味道而叉滿電，係因為鮮花既味道代表左媽咪既味道。
媽咪心入面愛既力量真係好大，佢一個人既愛，將我地三隻野拉返埋之餘，仲撐得起我地每一個人。
記得以前細個果時，我比人問我邊個靚（指住兩個亞姨），我話我覺得媽咪最靚，我係真心架，覺得媽咪係當時最時髦又靚既媽咪。就算而家，我都係咁覺得。
好多謝靚媽咪遺存左佢雪白美腿同ok胸比我，嘻。
佢話佢當年比人叫佢做長腳蚊架喎~哈哈~
呢幾日，爹娘去左美國旅行，無人買宵夜比我食，無人比我撒嬌，自己係度喊都無人理喇。
文章定位：
