Days of Being Wild 本新聞台已停止更新

286愛的鼓勵 0訂閱站台

<八美千嬌8 Femmes>絕對係一部奇片----既有靚人靚衫,又有離奇謀殺,仲有失驚無神載歌載舞,熱鬧到震,十分之有賀歲片格局。

故事發生於五十年代法國一所與世隔絕的大宅中,一家人正值歡渡節日,突然大宅男主人馬修被發現刺殺床上!屋中八條女----分別是男主人外母 (丹妮艾爾達里愛Danielle Darrieux)、老婆家琶 (嘉芙蓮丹露Catherine Deneuve)同兩個女兒素湘 (維珍妮萊杜蓉Virginie Ledoyen)與嘉芙蓮(露迪雲仙妮亞Ludivine Sagnier)、家琶細妹娥古絲汀(依莎貝雨蓓Isabelle Huppert)、馬修細妹貝麗(芬妮雅當Fanny Ardant)、僕人香奈兒 (費明妮李莎Firmine Richard)與露薏絲 (艾曼妞琵雅Emmanuelle Beart) 一時你眼望我眼,互相懷疑又互爆陰私,於風雪飄搖之中爆出一台勾心窩肺好戲….

呢部戲真係一字記之曰「靚」!八大花旦淨係數名都數到「口軟」,而且本片以群戲為主,本片大部份時間八旦都係同場獻技,一於鬥排場、鬥艷光、鬥演技鬥個不亦樂乎;不過,八旦可謂旗鼓相當,誰也叼不了誰的光。當然,導演法蘭索瓦奧桑(Francois Ozon)除了以舞台化導技令八旦聚首一堂之外,為求熱熱鬧鬧更不惜設計每旦一段solo歌舞,盡顯八旦才華!因此全片可謂處處新鮮幕幕驚喜,正是老爺死o左亦要整場歌舞唱首歌仔,一於奉旨精神分裂,玩o左先算。

實則承啟好鬼鍾意呢個安排,因為呢部戲純以故事而言其實老土到嘔,又係o個種「雷雨」式大家族越揭越臭倫理「大劑」劇。反而導演以荒謬劇、歌舞劇方式重新包裝,配以all-star陣容,又帶來一新耳目景象,死都拗番生。

雖然八旦各擅勝場,但係承啟亦有偏好。最抵死是依莎貝雨蓓, 雨蓓食住去年<鋼琴教師The Piano Teacher>餘威,再演古肅老姑婆,令人拍案叫絕;超級靚女維珍妮萊杜蓉係承啟入場原因,今部戲維珍妮依然靚得「交關」,大近鏡令承啟頓時屏氣凝神!演過<職業特工隊Mission:Impossible>的艾曼妞琵雅今次演冷艷女傭,其招牌雷公咀份外迷人;嘉芙蓮丹露份屬國寶美人,風韻十年一日。

有些電影是用來研究,但有些電影是用來享受,<八美千嬌>絕對屬於後者。因為本片可能拍法正路、視野一般;不過肯定可以令看官睇得高興!老實講單看八大花旦同場較量已經值回票價,加埋靚衫加歌舞,真係「仲想點」?

欲看從速,承啟飛身推薦本片!


附圖:<八美千嬌>soundtrack封套