4月6日 非常好天氣
最後一日喇, 剩番幾個鐘時間. 一朝早睇MTV台, oh my god, 有兩個美少年喺度打茄輪, 睇到我地嘩嘩聲, MTV喎, 冇理由咁搏架嘛! 跟住我地就去經過多日嘅聖瑪莉BAKERY買麵包, 啲麵包真係好食架! 都係啦, 買埋啲手信佢, 又係義美. 跟住又係西門町, 因為要買老天祿鴨舌. 上去玫瑰之前, 見到大幅poster, <十七歲的天空>, 哎吔, 咪就係睇到我地目瞪口呆, 嗌晒嗰對男同志, 原來真係戲嚟架, 如果香港上, 真係要睇, 仲要係兩個個樣都唔差吖嘛! 喺玫瑰唱片買咗一盒4隻陳珊妮精選, 真係好抵呀, 為港幣都係$60一SET(我從來不是幽默的女生, 呵呵), alison就買咗隻梳化歌嘅碟.
之後就趕住行埋誠品西門店, 見到有個counter專賣有designer graphic嘅文儀嘢, 死啦, 又好似對人好得滯添, 尋日先買完件tee咋喎, 都係是但啦, 冇得比嘅, 佢自己去東京嗰次都幫我添置咗好多衣服鞋物, 樣樣都有牌子(乜我真係咁拜金咩?!)! 最後揀咗Eames嘅name card holder, 如果平啲都買多個俾自己, 因為真係好靚架! 有諗過karim rashid嗰個嘅, 不過同臻臻兩個都覺得Eames好似啱佢多啲嘅! (連我啲friend都幾了解佢, 佢真係頭腦簡單, 容易俾人看穿)
跟住又急急腳去食嘢, 去咗間連鎖牛肉麵專門店, 總算樣樣台灣食物都試過吓, 但真係好抵, 牛肉麵, 排骨飯再加個灼菜都係港幣三十幾蚊. 為我地台灣食之旅加上一個完滿嘅句號!
返酒店攞番行李, 再搭番飛狗去機場, 喺lobby有人嗌alison喎, 竟然喺他鄉遇到friend, 仲要係丹丹啲friend嚟架, 發覺大家都係搭同一班機, 真係好橋!!! 今次就真係告別台灣喇, 好唔捨得呀, 全程飛機都冇瞓過, 都係傾偈...傾偈...傾偈 ......
番到香港出埋閘, 個個都問我唔駛打俾人咩, 唓, 我都冇叫人嚟(係有做過提示, 係好隱晦到自己先知嗰隻囉, 不過真係冇預到會架!), 話口未完, 個傻仔就鼠咗出嚟, 真係嚇死人, 阿臻臻係咁笑, 鬼死咁尷尬添, 不過都好開心...有人幫我拎行李! 之後就各自搭巴士番屋企喇!
文章定位：
