4月4日 好好天氣
今日早起身, 一早嚟個摩士burger早餐(MOS&BURGER). 呢間係專食rice burger, 記得N年前大快活都出過rice burger, 仲搵埋金城武拍廣告(即係而家所講嘅代言人). 咬咗alison個rice burger一啖, 唔該香港學人地就跟得足啲啦, 難怪出咗一排就唔見影喇!
食完嘢之後就搭捷運去新北投, 享受溫泉. 今次我地揀咗嚟春天酒店泡湯, 掂呀, 剩係個位置同環境已經比山下嗰啲嬴晒, 服務都好周到. 我同臻臻, 阿yan就喺戶外浸, 因為某些原因...菠菜就同alison喺房度浸. 個感覺好新奇, 好得意呀, 我地3個係咁影相, 呢啲咁難得嘅嘢梗係要留番啲倩影架啦! 如果再有機會, 真係要book少晚酒店, 嚟呢度過番晚夜, 咁最好就係同男朋友啦, 真係會好開心個喎!
泡完湯, 我地就去天母區行街同食嘢. 去咗P.S.bu bu食lunch, 成間餐廳都係以mini cooper做主題, 啲座位係係擘開咗一半嘅mini(大家有睇過流星花園, 都會記得阿杉菜同道明寺坐喺架粉紅mini cooper度食雪糕) 食完就去咗對面按摩, 佢地全部都按腳, 而我就...刮痧. 係咪好勇呢, 都估唔到自己原來都忍得痛, 其實都幾舒服, 不過個背脊就又紅又腫, 掂到都會痛. 我同佢地係分開嚟做, 我喺另一層嘅房入面都聽到佢地嗌到鬼晒咁嘈, 搞到我俾人刮緊嘅時候都忍唔住笑添!
行落去係一條好似東京嘅街道, 好多賣日本品牌嘅水貨鋪, 又多樓上鋪, 平過香港好多呀, 我喺呢度都執到正嘢, 最衰stussy專門店摺咗啦, 唔係都可以執一, 兩件俾人. 呢一站完咗之後, 就去唔可以唔到嘅士林夜市. 其實都係一個比較集中嘅大排檔, 有齊台灣出名嘅小吃. 我地試咗蚵仔煎, 魷魚乜, 十全排骨&羊肉湯, 魯肉飯, 大包包小包, 炸三明治, 鹽酥雞, 水煎包, 地瓜球, 青蛙下蛋, 冰糖士多啤梨. 好彩5個人, 咁就可以樣樣都試啲, 唔係就食一兩樣就飽死咯! 咁循例都喺士林行一陣, 不過真係頂唔順, 多人到爆, 仲迫過女人街. 兜咗一陣就轉移去誠品打書釘喇!
我地去呢間係開24小時, 入到去參唔多成地都係人, 一個二個坐晒喺地下度睇書. 我好快咁scan咗個埸, 其實有好多書香港都有, 又唔係話好平嘅, 加上我一朝將所有嘅疲勞迫晒出嚟, 都係喺隔嚟個cafe度抖吓! 阿yan, 菠菜同alison都買到嘢呀, 我同臻臻就全部時間坐喺cafe度, 唔係齋坐架, 我地好努力咁再plan第二日的行程.
文章定位：
