(07-02-04)
05-02-04，起唔到身，索性唔返… …就當自己休息下啦，天氣又咁凍，得9度，應棍最怕… …今日，將過去一年既DC相曬哂出黎，整理下notes咁。再睇返download左既《清宮秘檔》，thx羅琳。
夜晚，老爹又播《再見王老五》睇，呢一齣係爾冬陞1989年既作品，一睇片名就知齣劇係講結婚啦。唔知點解，應棍老爹每年總係要睇幾次，所以應棍都就黎可以成齣劇背出黎喇，齣劇同近年爾冬陞既作品有少少唔同，幽默成份居多，粗中帶細，可以話係90年代香港人既結婚寫照，應棍覺得都幾適合新婚夫婦睇架。有好幾個片段次次睇都覺得好好笑，例如：
(1) 鍾鎮濤到大傻o係財務公司借錢果一段，大傻諗住俾把生果刀俾鍾鎮濤切橙，點知一打開個櫃，啲「架生」就一次過跌哂出黎，最扺死就係大傻仲勁鬧人：「你地班xx，都叫你地唔好將啲架生擺入我個櫃度，邊條xx擺既？」呢個時候，鍾鎮濤已經嚇到連個橙都揸欄埋，無他既，咁多「架生」證明大傻佢地好狼，若果鍾鎮濤環唔到錢，你話大傻會點做喇，實行砍開佢一碌碌啦。
(2) 鍾鎮濤搞大左張曼玉個肚，林蛟問鍾鎮濤：「喂，你點搞架？你唔識用避孕套呢樣野嗎？」鍾鎮濤就話：「有呀，我用左喇。」林蛟：「用左？擺o係手指公呀？」
應棍估計老爹咁鍾意睇呢一齣電影既原因係因為劇情同佢自己結婚既時候好似，點解咁講呢？因為我次次問老爹呢一齣電影裡面所發生既事係唔係同自己好相似既時候，佢都無正面回答應棍既問題。到底係唔係當真呢？咁就要有待觀察喇，咁當然啦，應棍又覺得佢唔需要借大耳窿既。
*********************************************************************
06-02-04，呢幾日食得太多屋企飯，所以決定買個麥記食下，再買返本好耐無睇過既《Milk》睇下。食完lunch，做左一陣case note，不過都無乜心機，之後成日online，但唔知做緊乜野。
Online既時候發現左一齣叫《迷失東京》(Lost in Translation)既電影，係《Virgin Sucides》導演Sopfia Coppola蘇菲亞哥普拉既最新作品，乃本屆威尼斯影展最受歡迎的作品，更被美國影評協會(AFI)選為十大電影之一及三藩市影評人組織最佳電影；男主角標梅利更分別摘下美國電影學院紐約影評人協會及全國影評人協會最佳男主角。電影去年更於威尼斯國際電影節及多倫多國際電影節公映，分別奪得最佳電影、最佳導演、最佳男主角、最佳女主角及最佳編劇多個殊榮，亦於2003年的金球獎獲得共5項的提名，應棍有時間一定會睇。
睇過《Virgin Sucides》(1999)之後，應棍覺得齣戲好有70年代既玩味，亦將一種少女自殺的黑色美麗刻畫得非常細膩，你會睇得有啲唔安落，但係又好投入o係70年代果一個禧皮既世界。齣戲令應棍好鍾意Kirsten Dunst，佢既眼神好誘人呢。另外，成齣電影既音樂亦非常出色，除左一系列既「禧皮歌」外，更有AIR親自作曲既background music，令到果一份黑色美麗更為突出，齣戲唔係話非常出色，不過各方面都好平均，最緊要係齣劇既黑色氣氛，睇完之後就留下一個幾深刻既印象。大家可以去我shared files download隻soundtrack聽下。
夜晚又整返餐住家飯食，炒左少少瘦肉、雞脾菇、番茄，再整個湯，之後就睇Fergus借俾我果隻《Saturday Night Fever》，見到「肥尊」勁歌熱舞，真係覺得好正，「肥尊」舞藝的確非同小可，又覺得70年代真係好正！好多Bee Gees既歌同Disco歌，電影soundtrack絕對值得一聽，大家又可以去我shared files download隻soundtrack聽下。
70年代呀… ... 太美妙喇。
後記：
《Saturday Night Fever》Poster，
當中所運用到既字體係70年代非常流行既，
好似《油脂》title用既字。
文章定位：
