好高興可以見證基仔的第一次紅館個唱！老實講，其實我都係第一次去紅館睇演唱會，其實我係有少少刻意留返我的第一次俾古巨基^^
（１）必殺技、第2最愛、藍天與白雲、笑說想
千呼萬喚始出來，Opening是基仔回歸樂壇後的大熱作必殺技，基仔個Look好閃，仲有個型爆的藍色頭。跟住唱第二最愛，好開心呀佢對住我地呢面台唱架，因為呢首歌對我黎講個意義真係好大，就係由呢隻歌開始，我喜歡上古巨基的聲音，所以佢唱第二最愛時，我都好感觸。然後基仔唱左第一次自己作詞的藍天與白雲，以及第一次自己作曲的笑說想，雖然現在的基仔轉了style，但兩首舊歌聽起來，除左覺得基仔的唱功的確進步左好多之外，都唔覺得同以前話有差天共地的分別，只屬個人意見。
（２）monica、悟空、愛神
有個頗性感的紅衣女郎出黎跳舞，我心諗：「你千祈唔准掂基仔呀！」跟住紅頭髮的基仔就出黎唱左Monica、悟空、愛神。睇見佢同個dancer跳時佢都唔敢摸落去。
（３）be my valentine
第一次聽基仔現場唱呢隻歌，好正呀！好鍾意基仔唱呢d歌。
（４）心跳回憶、飄流教室
基仔話要唱下滄海遺珠，於是唱左呢兩首冇plug但偏偏好多人識的心跳回憶、飄流教室，好好聽呀～～其實基仔的滄海遺珠，真係多到數唔晒呀！基仔，不如你遲下開個古巨基蒼海遺珠演唱會吖 ^^
（５）羅馬假期、你快樂所以我快樂
一段Jazz的前奏，一聽就知係羅馬假期，yeah yeah~~唱完羅馬假期後果段前奏，我聽極都聽唔出係乜歌黎，等基仔一開口竟然係唱王菲的你快樂所以我快樂，之前聽mini live聽過，超正～今次仲要唱Jazz版的你快樂所以我快樂！簡直正到無話可說！！
（６）史上最強漫畫王大乱鬥、波斯貓
基仔苦練跳舞多時，係時候Show time。唱史上最強漫畫王大乱鬥時，基仔大跳tick tuck舞（我唔知點寫），基仔你好叻呀！出道十一年今次係基仔第一次表演跳舞，淨係份誠意己經一百分啦！不過佢跌左支捧，佢話：「唔好以為我失手, 我係特登ge, 我覺得咁樣靚D」唱波斯猫時基仔扮貓好得意架！基仔話：「我想話俾大家聽, 我除左個頭之外, 所有關節都會郁ga!!!」基仔又問我地佢跳得好唔好，又話個排舞老師話基仔同佢剛識城城果陣有得比喎，但果陣城城係六歲，跟住基仔又話：「你地唔好睇少六歲，大家有冇睇殘酷一叮，三届台主莫生都係六歲咋。」
（７）來年來日
我發夢都冇諗過基仔會唱呢首歌，係我最鍾意的專輯”愛與夢飛行”的track1來年來日，好好聽呀！我第一次聽基仔現場演繹呢首歌咋！我好意外呀！
（８）I believe、can we try、其實我...我...我、我對門匙說、大雄、夢中人
如果問我全個show我最鍾意邊part，我大概會答係呢part。呢部分有四個和音，但我淨係識側田，側田唱歌都好好聽呀！呢part係嗚謝的一part，部分嗚謝係唱出黎添架喎。聽大雄真係聽到我勁冧勁陶醉，呢首應該都算係我近年最愛的一首歌了，聽親呢首歌我都會跟住搖，當然今次都唔例外。最surprise的是，基仔唱到大雄最後一句之前，舉起食指示意要我地靜，跟住，大雄接住的竟然係王菲的夢中人，我好鍾意呢首歌架，所以好開心，唱夢中人時勁high呀！超級好聽！基仔果然都好鍾意王菲喎，一共選左兩首阿菲的歌黎唱，兩首都好聽到爆！！
（９）任天堂流淚、傷追人
小女子對機械人冇乜研究，不過基仔坐在高達（應該係高達卦）個肩膀到升上黎的時候，場面真係好壯觀，佢唱左任天堂流淚，其實機械人同任天堂流淚個feel好似唔多啱。然後佢又坐在機械手上面唱傷追人，隻手升到好高，佢仲伸隻腳開黎坐，嚇死我呀！我真係好驚呀！好似好危險咁喎，佢又有少少畏高架嘛，總之佢一路唱我就一路驚。跟住隻機械手送返佢去個台度唱，我先冇咁驚，但好搞笑，周圍ｄ人部相機轉移晒去個機械人果度。
（１０）側面
估唔到基仔仲有跳舞的部分喎，一百分誠意啦。雖然在別人眼中基仔可能真係跳得唔係話好好，但係我知道基仔為左今次真係好努力去練去排，基仔，you are the best!!
（１１）我愛毛查查、至 net 小人類
基仔請左一大班卡通人物出黎，然後呢個就係握手時間啦，ｄ人蜂擁上前，但ｄ工作人員攔得超快。我們最後湧到去個彎位度，但係我係完全掂唔到的。
（１２）愛很簡單 (與陶喆合唱)、飛機場 (陶喆)
基仔話好欣賞一個人的假音，呢個人就係陶喆啦，跟住基仔同陶喆合唱愛很簡單，好正呀！我好鍾意呢首歌架，好感動！講起兩個點樣識，陶喆話九七年聽到一首國語歌的假音好正（九七年正是基仔推出首張國語專輯”忘了時間的鐘”的年份），之後就有所接觸，兩位音樂人星星相惜，基仔話好多謝陶喆做佢的唱片監制。之後基仔去休息，陶喆唱了飛機場，陶喆都好正！
（１３）勁歌．金曲
演唱會theme song，場面好正，我覺得最正係唱日月星晨風雨潮果陣，有塊金黃色的紗巾吹起，成個場面都好靚，唔係好靚，係超靚先啱！好好feel！！真係好match到個主題，好壯麗。
（１４）愛與誠
基仔話有首歌連三歲細路都識唱，就係呢首唱到街知巷聞的愛與誠了，於是全場大合唱愛與誠。
（１５）愛的解釋
基仔入左後台，現場播返基仔細個的相片同埋新舊的cd封套出黎，唔知點解我竟然眼有淚光，可能這些相片令我諗返起基仔由出道至今這十一年黎一路係點樣行過黎，最後行到黎今晚呢個紅館舞台上面，開佢的第一個個唱。睇返ｄ相，我好感觸，由佢的飯碗頭到今日的型仔頭，由佢圓碌碌到今日面尖尖，由佢鄰家男孩到今日個個讚佢型仔…我都唔係好識講，反正我好感觸。之後基仔再度出場，佢話：「我頭先聽到你地叫encore，我好想即刻跑出黎，因為我唔想你地再等喇！」唱了愛的解釋的結婚進行曲version，我都係好感觸。
（１６）友共情、歡樂今宵
友共情代表基仔同歌迷間的友情，大家好似一家人一樣，基仔話佢好似粒聲唔出就走左唔講幾時返屋企的人，覺得好對唔住大家（唔好咁啦基仔，我地等你係值得架！）果陣期間只可以上網睇大家留言，又聽到有歌迷俾人話鍾意古巨基好out（我識事主，不過我一向都係咁樣講，係果ｄ人唔識貨！！事實證明一切！！）。歡樂今宵又係另好令人感觸的一首歌，基仔話「從夢裡伊甸／來到我枕邊」其實都好表達到佢今晚達成開演唱會的心願，當時其實基仔是有機會開演唱會的，但他沒有信心，想不到一拒絕便要到八年後的今天才可開演唱會>.<（或者真係天意，如果基仔在98年開演唱會，我就冇得見證）。
結論：演唱會真係好正呀，個氣氛又好好喎～基仔的狀態同水準都好穩定，不過可惜佢唱好少舊歌，多數都係新歌，但大家都好投入，好開心呀～～
希望黎緊落黎呢幾場基仔都可以keep住呢個狀態or有更好ge表現啦~~最緊要順順利利!!!good show!!!!
文章定位：
