地球村e 時代早著已經來臨！所以中國ka SARS 病毒飼大了後，無kui e 國家會凍逃過hou病毒侵入e 運命。
尤其是伊厝邊隔壁e國家。兩岸e 交流實在siuN 頻繁，SARS早著tiam tiam a 入來台灣a ！
和平病院代誌爆孔晉前，看著官員ti 電視頂對SARS 過度樂觀e 態度，hou 阮真煩惱，事實證明阮e 煩惱m 是加e。和平病院事件發生絕對m 是無可能e代誌，m koh 看起來1開始市政府並無任何應戰e 準備，和平病院第一線e醫護人員，只好ka 救SARS e責任擔起來，in 知影等衛生局e 人來，實在siuN 慢a 。
422 hit 工，病院內已經有teh 風聲SARS 湠開，只是院方一直無公開說明kap 處置。等封院e 消息傳來，第一線e醫護人員ma m 知煞落會按怎？有e人趕緊來離開，有e 人選擇留落來，留落來是因為in 知影病院真需要腳手，in 若走了後，煞落來 e khang-khoe 誰beh 做？留落來是因為無私e愛心kap 敬業e 精神。
真濟人ui 媒體看著和平病院e 護理人員喝咻「我們為什麼要照顧SARS病患」、「我寧可辭職，也不願再照顧SARS病患」，引起像海湧e 罵聲，質疑護理人員in e 職業道德ti 叨位？講坦白，你若肯將心比心，你會發現和平病院護士情緒e 不安kap 驚惶，其實咱愛理解kap 諒解。ti 充滿病毒e 和平病院內面「就地隔離」此種隔離會hou 無受著感染e 人員感染著，若換作是你，你kam beh ？1方面照顧病人，1方面煩惱家己m 知當時會破病，擱煩惱m 知是m 是有機會好好出去看厝nih e人1 面，咱kam 免體諒in e情緒？擱再講，抗爭了後，真濟優秀e護理人員，猶原繼續辛苦照顧病人。m koh 媒體hou大家干單會記得in 驚天動地e 抗爭。
和平病院e 醫護人員，一定愛隔離，m koh m 是粗魯e 集中隔離。Ka 千外人和平病院e 員工全部叫tng 來kap SARS病人關作伙？ti SARS 傳染方式無完全清楚e 情況下，千外人作伙冒著交叉感染e危險，然後na 隨個隨個病發，tu 好證明台北市衛生局這e措施是對e 。反正死道友，m 是死貧道，這種心理實在真be 見笑。SARS並無恐怖，恐怖e 是人類家己本身e 軟弱kap 自私，kap 怪罪、牽拖別人所產生出來e 災害。全副武裝e 核生化防護衫是m 是所有照顧SARS e第一線醫護人員攏有通穿？抑是邱局長入去才有通穿？hou in 最好e 裝備，才會凍hou in 安心作khang khoe，kam m 是？
新竹市長林政則chhoa 頭m 收ui 和平病院送來 e SARS 病人，阮真正 haiN 頭 m 知beh 按怎講，阿是大學生卡有良心，清大、交大真濟學生隨ti 網路開罵，有人khau 洗講原來台北到新竹擱要發簽證，ma有人講萬不利得病，干單剩死路1條，因為外縣市會凍m收新竹e學生，擱有人公布市府e電話，叫大家敲去新竹市府抗議。有清大e網友提出SARS e新解說，S是「sacrifice」犧牲、為自己e自由犧牲，Ａ是「appreciation」感恩、感恩付出愛心看顧e 人，Ｒ是「reflection」反省、反省病毒e根源，Ｓ是「support」支持、支持病患。
M 知是眾人e 壓力，抑是高層e 關係，新竹市長去參加行政院緊急防治ＳＡＲＳ會議後，總算改嘴，講hit 工伊去新竹病院是去關心疫情，m 是抗爭，擱叫全體市民配合防疫工作，度過未來2 禮拜e危險期。唉！政治人物從來罕nih 為著家己錯誤e行為會失禮，按呢是beh 按怎教gin-a 愛坦白勇敢面對家己e 過錯咧？
高雄市衛生局設立咳嗽發燒特別門診中心，ma 有附近e民眾抗議，beh 去看病e人煞hong 擋ti 外口，in 攏無想著萬一破病e 是in 家己，抑是家己e 親人，in e 做法kap 看法，凡勢會無仝款。SARS 考驗e 是咱e人性kap 愛心！
咱全體國民愛ka SARS當作關係全民生死e代誌，m 干單是個人e生死，更加是全台灣生死存亡e 代誌，這不是阿扁仔e 危機、政府e 危機，是歸社會、全民e危機。大家愛知咱攏ti 同1條船！
希望媒體愛體認著家己e 社會責任，m 通一直khia khang ，拚勢找病院e疏失，誘導、刺激醫護人員情緒性e講話，甚至斷章取義擴大報導。愛知影傳播焦慮kap不安，造成負面e影響，對大家攏無好處。
希望SARS m是害咱互相猜疑、怪罪，m 是奪走咱生命e殺手。是hou咱體會著大家攏生活作伙，需要相互扶持、幫忙，用對e方式ka 代誌做好。
SARS hou 真濟人體會人生e無常！咱看家己生活e台灣，家己e人生，歸十年經濟e富裕，hou 真濟人全心求名求利，叫是「夢有外大，腳步就有外大」，慾望無限，ui 經濟到權力，ui 文化到愛情。Ti SARS 頭面前，咱才了解回歸生命e 原點，其實只是平安 e 生存。過度e 慾望kap 消費，對生命並無任何e 意義kap 價值。生命百劫回歸，若知影珍惜，其實猶 be siuN 慢！咱全民團結起來，用無私e 愛心化解台灣e 危機！
文章定位：
