世界盃終於踢到季軍賽，今日可算係我睇到最感人既一場比賽。土耳其同韓國一開始就冇被睇好，出乎意料地兩隊到進入四強；之前外界亦對裁判既決定非常關注。
雖然之前好唔鍾意韓國隊踢波既方法，但係眼見佢地努力咁踢，能夠淘汰咁多隊歐洲勁壘，為左呢個世界盃博哂命，真係好想佢贏；相反土耳其既傳波唔夠準、後衛防守較差，所以幫韓國隊好似變成理所當然咁。但係比賽一開始，土耳其就破紀錄o係11秒就入球，兩隊都o係十分鐘之內都再入一球，呢場比賽實在令人有Ｄ驚喜。到後來睇到土耳其既門將原來受左腳傷，但係為左防守都奮不顧身咁面對韓國隊既瘋狂搶攻（真係認真的男人最帥，正～ ：Ｐ），突然間好想場比賽快Ｄ結束、韓國唔好再攻門，等魯斯圖可以快Ｄ休息。不過韓國突然間又o係球賽結束50秒前既傷停時間內又追一球，唔到最後一秒都唔放棄，呢句真係佢地既寫照。
最後呢場比賽以3：2結束，但係我覺得以前想邊隊贏、覺得邊隊好既想法已經唔再重要。比賽時遇到碰撞，都會主動扶起對方球員；球證整場比賽都充滿善意，判決公正，笑容滿面；賽後兩隊既球員唔單止馬上握手，仲搭住膊頭、手拖住手咁多謝在場觀眾、交換球衣；在場既韓國觀眾亦好樂意拿起土耳其既大型國旗為對方祝賀。呢Ｄ先係有風度既表現，我終於睇到一場動人既足球比賽，旁述亦講左句（我覺得係佢做世足旁述咁耐，講得最岩既一句）：今場比賽無論誰贏誰輸，韓國同土耳其都o係度寫緊自己國家既足球歷史，呢場比賽係佢地有史以黎最高成就既一個比賽。無錯，無論邊隊贏都好，佢地已經有超水準既表現，佢地都為自己國家寫下光榮既一頁。
文章定位：
