http://hk.me.nextmedia.com/template/me/art_main.php?iss_id=192&sec_id=6619721&art_id=14360967&pageno=1
http://hk.me.nextmedia.com/template/me/art_main.php?iss_id=192&sec_id=6619721&art_id=14360967&pageno=1 視頻
男人四十一枝花，任賢齊，今年四十四。
早聞說，他很「冧女」，難得當事人又不妄自菲薄，「我係貴價藍籌股，唔係好靚仔，但亦忠亦奸，啱啱好。」
言簡意賅，男人不壞女人不愛。自言愛飛車更愛冒險，一把年紀，偶爾仍會玩到唔願返屋企。
咪住先，小齊，難道你唔記得，自己已經有仔有女？
「我冇 dream life，夢想同生活，根本兩回事。」
他的夢想，駕着電單車，跑絲路，多瀟灑。
現實呢，年中九成時間穿梭中、港、台，為生活營役。「成班人跟我搵食，我唔停得！」
終極目標，賺夠錢在港買樓，好為一對子女置個安樂窩。
亦正亦邪，表裡如一。「冧女」，有原因。
曾經以為，女人到某個年齡就會討厭長不大的浪子；其實，既要飯票又要激情，女人，真貪心。
唔夠膽問銷量
任賢齊， 90年出道， 97年憑《心太軟》大賣，被封「情歌王子」。轉眼 13年，後浪不計其數，眼下天王天后出碟，也不過賣三幾千，搞音樂，難免意興闌珊。人到中年，「王子」如何自處？
「依家仲邊有人買 CD？當年《心太軟》賣 130幾萬，緊接住《愛像太平洋》只得 30幾萬，當時反應係『嗰一百萬張去咗邊？』好傷心！再後來，十萬、幾萬，最近兩張，唔夠膽再問銷量。
「我唔介意作品俾人免費 download，有些歌星會同電訊公司、網絡供應商合作收費下載，但層層分賬，歌星收入，所剩無幾，我寧願當宣傳，俾人免費聽，做紅咗首歌，再登台、開演唱會，拍戲、接廣告，咪仲襟計。」
近年拍戲多過唱歌，成功轉型，於大陸尤其吃得開，搵到，自然忙到甩轆，偶爾還會出席俾面派對，為老家台灣好友捧場打氣，一星期游走中、港、台三地，食飯瞓覺都冇得停，咪話錢易賺。
「雖然艱難，但從沒想過放棄，成班人跟我搵食，好似助手，為咗我到依家都仲係孤家寡人，人哋咁仆心仆命，我又點可以停！」
我唔 out
除了講演技，做娛樂圈，仲要講做人，小齊受歡迎，表演之外，還出名守時兼親切有禮。訪問當日，他比原定時間早到一小時，朝 10晚 7，全程面帶笑容。他說，天份加努力，再俾多兩錢心機 keep住外形，自信人老心不老，不會被淘汰。
「我好有自信心，總覺得自己值一百分。
「做藝人，要有品味，又要 keep住身形，清楚潮流，知道什麼適合自己，就唔會 out。好多男人最怕襯衫，但我偏偏鍾意 shopping，試衫係樂趣，見到自己著起件衫靚仔又有型，好有成就感！
「男人，好似我咁嘅年紀，十居其九走晒樣，身材變晒形，我幾好彩，仲有咁多頭髮！
「以前鍾意曬太陽，覺得成身黑黝黝、甩晒皮，鬼咁 man，依家，做得演員，最基本都要俾人見到個靚仔樣，所以，近年晚晚又精華液、潤膚露、眼霜，成個女人咁！就算幾忙，都會在酒店房做 sit up，就快拍《夏日的麼麼茶 2》，到時日日著滑浪褲，有肚腩，幾冇面。
「 Keep fit係尊重自己身份。
「後浪？我未驚過！出道時，同期有金城武、林志穎，講靚仔，冇得比；自知唔係青靚白淨型，但一樣有市場，有自己位置；
「後來 F4，到依家飛輪海、棒棒堂，大家年齡更加有一大段距離，唔通仲同人爭 fans咩？男人老，唔緊要，好似 Al Pacino，咪愈老愈有味道，最緊要，呢度（手指着頭）唔老，有內涵。
「大家 target都唔同，我演繹角色，並非一般偶像劇，內容有深度，可以討論。」
有深度，是指自己將會揸電單車，去絲路拍紀錄片，小齊想透過「一個男仔心態的冒險經歷，去展現一個男人如何看待這世界」。
一時男人、一時男仔，如此深奧如此複雜，我等女人仔，講真，唔多明。
但可以肯定，愛冒險愛刺激，不減當年，至少，一提起飛車，眼中有團火。
我說他不成熟，當事人想了一會兒︰
「其實，我已經成熟咗好多，以前一上車，唔會睇後面，因為我唔准有人爬我頭；廿零歲最好勝，唔撩得，一話鍊車，嚟咪嚟！有次，差啲冇命。」
情節如拍戲︰山路鍊車，途中突然閃出個晨運阿婆，電光火石之間，一係撞死阿婆，一係連人帶車衝落山。
結果，車停住了，冇事發生。
自此，才明白一時衝動，累己累人，於是將熱情轉投賽車場上。
只是，仍藏不住好勝之心。
「我冇變過，想做就做，唔理後果，一個彎位，就算只有十份一機會可以爬頭，照踩油。」
自信車技不凡，上得山多， 05年 3月，在泰國參加「亞洲區越野機車賽」，不幸翻車，右腳小腿骨折，打了六星期石膏，至知衰。
「開唔到工，仲要搵人照顧我，造成公司混亂，開始識諗，做人唔可以只顧自己。依家，冇 9成把握都唔會爬頭，好穩陣 o架！」
另一修心養性的原因，是意外發生後三個月，大女兒 Rati出世了。
我負擔重
任賢齊與女友育有一子一女，一家現居於香港，有香港身份證。
江湖傳聞，他因「男人老狗著住條底褲影相咁肉酸」，曾經拒絕一份一千萬的內褲代言人合約。
「一千萬？係千二萬。」
聊聊數字，輕描淡寫，唔知，仲以為講緊千二蚊。
「換轉依家，我會拍，有家庭負擔，香港樓價，實在太貴。
「依家家庭比重多咗，就算忙，都盡量抽一、兩日時間，返屋企陪仔女。
「人人都話巨蟹座男人好顧家，我諗自己係『寄居蟹座』，邊度都係屋企！
「以前，成日玩到唔記得返屋企，做咗老竇，安排生活，唔容易，我仲覺得自己係細路仔，惟有邊做邊學。
「我唔囉唆，唔打細路──以前阿爸成日鬧，我都唔聽啦。依家仔女頑皮，心諗，報應喇。
「對子女亦冇乜期望，最緊要開心，有正確價值觀。大女讀國際學校，就是這原因，西人唔識我，子女唔會被我身份影響。
「作為父親，我諗都合格啩！」
後記
做慣人訪的記者都知道，所謂「最後一條問題」，往往就是被訪者最不願意回應的事情。
多年來，任賢齊與女友 Tina已傳過 N次婚訊。
終於來到訪問尾聲，小齊，你……結婚未？
他苦笑，「你覺得我依家有差別咩！」繼而雙手抱頭，作苦惱狀，「俾時間我……解決……」
咁嚴重？不過一個「交代」啫。
他即拉住助手，冇厘正經︰「咁快啲攞個膠袋俾我啦。」
我不禁會心微笑。
男孩之所以永遠長不大，因為他身邊總有一個女人，一生一世照顧他。
這種男生，世上最幸福。
文章定位：
