上篇都講咗，我要幫對方公司手，有時好麻煩，估唔到，尋日就大件事發生喇﹗
上星期五咪話一連炒咗兩個 Sales 既，尋日朝早對方公司老頂（長野 san）開舊 salesman 部機時（新嗰個仲未有電腦，所以以下講既 salesman 係做咗幾個月嗰個），發覺 Outlook Express 度，由 05 年 11 月 12 日至今年 7 月 3 日既 e-mail 全部冇晒，長野就以為嗰個人攞咗 D 客人資料走佬。佢老婆（女長野 san）就依嘩鬼叫，話佢正衰人，信唔過，於是即刻打電話摷佢出嚟問佢攞番 D 資料出嚟。唔知係特登定係咁橋，前 salesman 又冇聽電話，搵唔到佢，咁長野兩公婆就認定佢偷公司資料，嘈喧巴閉話要報警拉佢。當時 Part Time 文員嬸嬸（同我阿媽差唔多年紀）又係下晝至返，成公司除咗佢兩公婆之外，得番我一個，咁結果係官字兩個口（佢兩公婆夾埋有四把口）的情況之下，加上佢老婆好似失控咁，摷咗柴灣警署既電話俾我，嘈生晒叫我快 D 打電話過去，咁我就做咗一生人第一次，亦希望係最後一次既事：報警﹗
私：你哋做咩兩個偷笑，一個擰歪面呀﹗
三子：你睇唔到我哋既眼神，有幾…咁同情你咩﹖
私：…………（-_-*）
12 點左右，諗住夠鐘出去食飯，點知軍警上到嚟，因為長野兩公婆係識講國語、英文，但係老公淨係識聽廣東話，老婆識講少少，而軍警就淨係識講廣東話（D 警察唔係要五科包中英數合格咩﹖）所以變咗我冇得出去食，留喺度做翻譯。嗚…太詳細既唔講喇，總之結果仲搞到要搵埋 3 位 CID 上嚟錄口供添，而我仲俾個四眼賤人 CID 大聲話我：你哋都未搵到嗰個 salesman，報咩警啫﹖佢都癲既，唔駛佢做呀﹗政府請著呢 D 垃圾真係有冇搞錯﹗好彩老嗰個（寫 & 作口供，only 識廣東話）聽到之後同我講：唔緊要啦﹗你都係打份工啫，老闆話報警咪要報警囉，算啦，總算搞清楚，而家咪安落晒囉。呢 D 至係人講嘛﹗四眼賤人學嘢啦﹗不過大把嘢你學呀﹗首先係你做人既態度要學，其次係你究竟講國語定講廣東話呀﹖英文都唔識講，而家警察真係冇人做咩，連你 D 咁低質素既垃圾都可以做警察﹗
另一位 CID （睇個牌至知佢係警長），真係讀多咗 D 書，不過佢 D 國語真係……只係好過四眼賤人少少咋，我諗我識既所有朋友都好過佢﹗後來搞咗好好好好好好好耐，元兇終於聯絡得到，仲叫到佢返嚟解釋究竟發生咩事﹖原來佢話 e-mail 容量好大，所以搬咗去另開一個 file 做 Backup，佢話之前已經同長野 san 講咗喇…唉﹗我之後都費事再理喇，我仲未食飯架﹗女長毛…呀唔係，女長野都話因為我出唔到去食飯，請我食…飯盒+飲品喎﹗
私：我都冇眼睇呀﹗阿太，遮埋我啦﹗
慶太：我冇手喇﹗腳得唔得吖﹖
私：嘩~~~﹗（逃走）
到臨放工時，因為我同新廠有誤會，導致今日長野要帶去日本既樣辦收唔到，所以放工後又要我去深水埗攞辦，真係慘﹗我想做番屬於我自己公司既嘢呀~~~﹗
今日同 Part Time 嬸嬸傾計，佢叫我小心佢兩公婆，因為佢用人用到好盡，不過因為我唔屬於佢哋公司既，佢唔可以對我點樣。但係我驚佢兩公婆同我老細打我小報告，喺我背後話我呀﹗唉﹗寄人籬下滋味真係唔好受﹗
文章定位：
