星期五，同 Bi Bi 一齊約去石峽尾報名，諗住一齊讀一級日文啦﹗點知報名時，有個阿叔見我哋咁多問題，於是講咗好多嘢俾我哋知，其中一樣就係：BJT 商業日語能力試﹗聽到呢個我哋即刻呆咗。吓﹗原來仲有一個能力試既咩﹖聽佢講原來呢個仲堅過平時既日能試，仲唔同日能試咁只係一年先得嗰一次，BJT 係一年有兩次，今年既 6 月已經有一次喇。而且考到一級日能試既人，好多都未必可以考到 BJT 既最高級添喎。
唉﹗走咗之後，我同 Bi Bi 都突然間覺得自己好似仲有好~漫好~長既路要行咁。一諗起咁樣，我就好似冇晒心機咁，頭 dup dup，眼濕濕。Bi Bi 聽到呢個 BJT 有兩個鐘係考聽力既，就即刻打退堂鼓喇。但係，其實學日文既主要目的，都係要聽得明人哋講咩既啫，如果要去日本讀書或者返工，就算係再悶既都要識聽架啦﹗所以既然知道有個 Test 可以測試自己既日文水平既，我覺得一試無妨啦。況且，呢個考試又平 D，$250，平過日能試 $70，又可以入去香港大學考試，扮下大學生都好啦﹗而且又會多一張沙紙，搵工又可以叫價多 $2000。嘻嘻﹗呢個我自己諗啫。一舉幾得，好﹗一於試下先﹗希望大家俾 D 鼓勵我啦﹗
8點幾我哋先至落到去朗豪坊食嘢，因為我哋一直聽嗰個阿叔講講講。本來 9 點約咗之前讀日文既同學食飯，諗住可以捱到啦﹗點知走得嗰陣時，兩個都變咗好似鋼鍊裡面要食人嗰隻嘢咁﹗Bi Bi 仲餓到痛添﹗我好怕佢下個禮拜上堂會頂唔順呀，因為佢放工 6:30，但係 7:00 就上堂上到 9:30。我諗真係要帶定多 D 嘢食喇﹗好彩我 6:00 就可以撇。到時再食碗魚蛋粉都得﹗唉﹗我哋真係做咗小苦妹喇﹗
9 點鐘，去咗北京樓食飯，食咗我最鐘意既賽磅蟹、片皮鴨、甜酸蝦球等，真係好好好好好好好好好好食呀﹗而且佢哋仲叫埋而家教緊佢哋日文 Miss 一齊去添，又可以乘機免費學日文喇﹗佢真係好掂架﹗
好喇，聽日我要預習喇﹗我諗呢度唔會再寫得咁密喇﹗但係都要繼續睇呀﹗嘻嘻﹗
夜露死苦﹗
文章定位：
