尋日 1:30 放工，搵咗阿媽陪我去五十嵐食 Lunch，因為佢跟住要去婚禮，而我就因為約咗大 C 5:30 去青衣地鐵站等，時間尚早，咁我就返屋企 zzz......
終於見到廖啟智喇﹗咦﹖唔係好似啫，好樣 D。不過可能一早落機之後又要趕去會展，所以 D 鬚根突晒出嚟，好啦﹗咁就叫佢做黃子華啦﹗介紹完之後，佢就即刻攞咗紀念品出嚟送俾我哋，好得意呀﹗係一支原子筆，但係釣住舊壽司，我既係吞拿魚，大 C 係玉子，（本來我同大 C 既係掉轉，但係大 C 係食齋，所以佢要同我換，嗚﹗其實我都鍾意玉子架﹗）雖然我喺 City Super 見過，但係都好多謝佢﹗因為好識做。搭車去欣澳站時，佢攞咗本香港食店指南，我同大 C 睇吓，發現唔貴既都唔登出嚟﹗擺明搵老襯啦﹗不過佢話想去高級酒樓食海鮮，揀咗一陣都揀唔到就落車喇﹗一陣先再睇過﹗
去到欣澳站，個站都已經好得意喇﹗期間都係大 C 同子華係咁用英文講嘢。因為我唔係同佢好熟，所以我都係得個聽字﹗但係上咗車，進入奇妙之旅之後，大家都好似變咗大細路咁，周圍影相，我亦都開始發揮我既日文基本功（即係講 D 好簡單既日文）努力咁同佢講，好彩佢都啋吓我﹗哈哈﹗
去到喇﹗真係好大呀﹗又好靚呀﹗好似歐洲 D 火車站咁樣。咁我問佢日本迪士尼有冇咁樣既車站時。佢話淨係去過一次，仲要係廿年前去過﹗吓~﹗︴("*﹏*")︴
去到噴水池之後，我同大 C 一齊影相之後，諗住幫子華影，佢竟然怕醜唔敢影﹗哈哈﹗男人老狗竟然會咁﹗大 C 咪死命叫佢影囉，咁難得嚟到香港迪士尼……門口喎。冇入去啫，扮吓嘢到此一遊都好啦﹗係咪﹖大 C 仲係咁搶佢部相機，佢至肯企埋去影咋﹗俾佢激死﹗跟住我哋去售票處，睇下六點後會唔會有特價啦﹗突然間我竟然見到 Rita 喎﹗佢就話剛剛問過，無論任何時候都係 $350。所以佢都唔諗住入去，過去行下嗰個咩嘢湖就走喇﹗我哋見到咁樣，加上 8 點先至放煙花，再出番去至食飯就真係唔駛瞓喇﹗於是我哋就決定走人，去市區食晚飯喇﹗
後天再續﹗因為聽日要溫書，再唔溫死硬﹗
文章定位：
