呢個可能係中國人ge一個劣根性。
自吹自擂、自我膨脹、自我吹噓、自以為是……意思都一樣，就係鐘意忽略缺點，將優點無限放大再放大。唔知係我敏感定點，我覺得中國人呢種傳統簡直係根深蒂固，仲要帶有傳染性，見到人地誇，你就會誇埋一份，仲要下下巴閉過人地添，勁過變種流感病毒。呢個問題上，我就唔敢分開港澳台地區同大陸啦，因為話明係傳統，度度都一樣，度度都受影響！
舉例黎講，長城係我地國家ge一個文化象徵，本本旅遊書都只會介紹佢有幾咁威水、幾咁歷史悠久、幾咁雄偉壯觀。可惜呢d全部係表面野。實際呢？唔信我講你可以自己親身去八達嶺長城感受一下，人為破壞得幾咁嚴重。每日n多遊客黎踐踏文物，d城磚俾人劃、俾人偷，掛滿一串串咩同心鎖、許願牆，擺滿一檔二檔紀念品，垃圾隨處見(又唔係大街廣場喎，你估有好多清潔工呀！)。政府ge保護文物措施呢？環保工作呢？公民素質呢？淨係識靠條長城黎搵錢！歷史上d王朝有長城保護咁又點，蠻夷咪一樣可以顛覆世界！呢d方面點解又唔見書上提到呢？唔講旅遊，講雪災。睇到ge都係英雄事跡，溫寶寶好關心百姓苦況，阿邊位領導落實政策幫助渡過難關，解放軍搶險、工人搶修溫暖人心……災情呢？領導一句說話，將地方真正了解民情ge解決方案打亂，出現問題之後居然一沉百踩，話地方辦事不力，領導英明決斷，可笑！衰野唔講，小小成就吹咩水丫！
本來我雖然同意呢個觀點，但係冇諗到理論ge下一步果然係實踐，生活之中果然能夠完全驗證，令人認同到五體投地。
上上個星期ge政經堂，要做一個關於家鄉ge環境報告。咁o岩上去present ge幾位同學都係廣東老鄉，有梅州、清遠同一個不知名ge小鎮。老實講，清遠勉強叫做多d人識，其餘兩個你去查地圖或者去旅行查資料先有可能聽過囉。第一個梅州ge同學，安左一個「客都」ge靚名，又話風光有幾咁優美，空氣質素有幾好，係廣東省三個空氣質素優ge城市；清遠果位，一句「珠三角後花園」在前，一句「優秀旅遊城市」在後，一堆所謂風景名勝講完，完全臉不紅氣不喘；果位「我來自小鎮」ge同學仲勁，民風淳樸ge水果之鄉呀！問你服未！咁樣做到底有乜野意義呢？
我完全唔明，當虛榮通過自我膨脹被滿足，最後得到乜野，又剩低乜野？係因為中國人多，虛榮心永遠無法滿足，所以即使再點樣膨脹，虛榮ge泡沫都唔會有爆破ge一日嗎？我唔係話優點唔值得我地驕傲，不過只看到優點係永遠無法進步的，只有找到缺點並正視，先會有後續ge發展。優點毋須炫耀，只要存在就總會有人注意到；缺點唔同，惟有日日擺在面前，你先會注意到，將佢抹走。
如果有人對以上言論想進一步瞭解，推薦一本台灣作家柏楊寫ge《醜陋的中國人》，裏面有一句非常精彩：「中國人不是極度自卑，就是極度自我膨脹，這一切都是因為缺乏自信和自尊(大意)。」不過先聲明，上面ge內容全部都係我原創架。
- 完 -
文章定位：
