今日將會完成意大利最後一站---米蘭。今朝一早就好凍，我諗大約得15度左右，加上微微細雨，真係凍上加凍。而為左完成今次使命，我亦都著得靚靚地，所以忍住凍都要著條裙！
米蘭有兩間LV shop，又係一大一細，而兩間大約相距十分鐘路程左右。我同Cindy第一隊入細shop，而其他人就入大shop。今日領隊阿Sam比左個Special Order我買，就係牛仔布o既背囊喇！距離開舖時間仲有成個鐘，所以我地可以周圍行下先，咁我同Cindy就去左米蘭大教堂影相同入去參觀下喇～米蘭大教堂雖然都殘殘地，但真係好宏偉。我同Cindy今次都係分開入，我會遲佢15分鐘入去。我同Cindy分開左大約15分鐘後，突然我o係路上又遇見佢，原來阿Sam仲未比錢我地呀！！(因為每次入店前阿Sam都會比定錢我地，買淨再比返佢。)而Cindy仲要係o係想推開LV度門前先醒起，”石Q”哥哥都已經見到佢，不過自己又邊有咁多錢買呢，所以一定要返轉頭搵Uncle Sam囉！(仲要行快幾步搵喎，如果唔係會阻住下一隊做野嘛！)
就o係Cindy拎完錢行到返去LV shop門前時，突然Molin竟然叫住Cindy幫佢地影幅相。噢！玩野咩！唔知”石Q”哥哥見唔見到添！Cindy都好無奈咁幫佢地影左幅相就急急腳入去喇。至於我，就遲多十幾分鐘先入去啦～又o係我想入去shop之際，又見到Molin佢地……今次佢大聲同我講話Cindy仲o係入面，(大家要對住空氣講野扮唔識，好似癲婆咁…)我梗係知啦，你唔好理我地點action啦！入到去間shop，我見地下有個好似好smart o既華藉sales，我梗係避得就避啦，咁就上去二樓。二樓見到Cindy仲睇緊，所以我又o拿o拿臨落返地下。終於見到個smart sales走開左，淨返個好似幾好人o既男sales o係度喎，我梗係第一時間把握機會行埋去問佢拎袋睇啦！
佢對我都無乜戒心，好快就介紹左我target o既背囊比我，噢！That’s great！佢好落力咁sell，我試左幾次就話買喇！呢個背囊成 €1000……哇，真係好貴呀！我再選多個銀包就埋單啦，臨埋單前有個manager走埋個sales度叫佢check清楚 d，當時都好驚佢唔比我買，但唔知點解佢好似check唔到我o係羅馬買過野咁，好快就叫我比錢喇～我見咁順利，比完錢後又叫佢帶我上二樓睇下 d 男裝Items，好快選左個Card holder、鎖扣包同散銀包，當佢入我passport之際，佢突然鄒晒眉頭，我就立刻同佢講下米蘭 d 天氣轉移下佢視線，點知佢又叫第二個manager黎。呢次無頭先咁好彩，manager唔比我買晒三樣，只可選一樣。咁我就選左個散銀包就去比錢喇！個散銀包€320，我比張€500佢，個manager好串咁話No change！我都好驚訝咁回應佢No change？之後我就比晒 d €20佢，一疊疊等佢自己數。
之後，我就再同Cindy去埋大shop度試下(唔用passport)，最後都買到少少。就係咁，意大利o既行程就告一段落喇！跟住我地就搭幾個鐘頭o既火車去法國南部o既尼斯，去到尼斯都已經七點幾，o拿o拿臨放低野就去阿Sam推介o既餐廳食海鮮。哇…真係好好味呀～～d蝦…真係鮮到呢…食完飯再去海邊度行下買下手信，不知不覺就已經十二點幾，今日真係帶住一副好攰好攰o既軀殼瞓覺呀…
文章定位：
