7月30日晚上10點30分，水貨團各成員齊集香港國際機場，有 d 成員都係初次見面。我地今次乘搭00:45am卡塔爾航空往意大利羅馬，中途o係中東國家多哈等候轉機。今次真係萬里長征，因為搭去多哈已經用左8個鐘，然後o係多哈等8個鐘轉機，好彩卡塔爾航空安排左酒店hea一hea，不過多哈人動作非常慢，check in 時得廿個人左右都等左一個鐘，酒店 check in 得十個人左右又等左一個鐘，所以都係得返四個鐘頭左右瞓。
酒店休息一會後，又要搭6個鐘飛機去羅馬，所以淨係搭飛機都用左兩日架喇。就係呢次短短o既酒店逗留期間，我地已經發現左Sammi同Tammi可能會係呢次行程o既遲到天后……
Day 3：
今日正式開工，朝早先去參觀意大利城中之國梵帝崗o既聖彼得大教堂，本來想贍養教宗o既,遺容，但由於越黎越多人排隊，所以最後放棄左。跟住我地再去古羅馬廢墟、鬥獸場、君士坦丁凱旋門等地方影下相，然後就搭火車去我地今日o既主要目的地---西班牙石板街。
西班牙石板街總共有兩間LV，一大一細。我地分開3 team 人行動，我同表姐Cindy一組先去細 shop、Molin、CiCi同Sandy就先去大 shop，最後Tammi同Sammi過多半個鐘去大shop。大家買完一間 shop後先返黎M記放低 d 貨比阿Sam，然後可以再試另一間 shop。由於LV 個 system o係同一個國家裏面會link up 左，所以如果用同一本 passport去其他 shop買袋，LV未必會賣比你 (因為估到你係水貨啦)。你有張良計、我有過牆梯，我地有時就要利用我地o既演技話自己唔記得帶 passport，然後亂作一個名同passport No. 比佢。因為照正路你要退稅一定要用返自己名同 passport no.，不過我地呢 d 水貨團，水貨老闆自然有辦法用假名都退到稅，所以只要LV d 人相信你，填d假野比佢入落個 system 度就得。
我同Cindy出師不利，一開始就已經迷左路，搵唔到間LV。(因為西班牙石板街D地方度度差唔到，真係好難認！)要行返M記搵阿 Sam問多次，就咁已經浪費左半個鐘。第一次正式開工，我同Cindy心情難免有 d 緊張。呢間細shop真係好細，長方形一眼睇晒，三個sales當睇我地唔到，無人黎serve我地。後來叫個男sales比d袋我地試下，佢都幾好心機咁serve我地，就咁我就選左兩袋兩鎖匙包埋單喇。(因為真係有 d 驚，所以竟然選左個cheapo既鎖匙包！)第一次開工買左€1210，算係咁啦。之後已經無乜時間去大shop，所以我同Cindy決定行下街，去許願泉影相，點知又迷路……o個日好熱、好熱，我同Cindy好辛苦搵到許願泉後，又迷路行唔返去M記，好驚！因為要趕去下一站佛羅倫斯，好彩最後我地都o係最後一分鐘搵到佢地，叫做有驚無險，但已經熱到痴晒線！
今次行動有段小插曲，就o係我地show完passport，我比完錢之際，好明顯個男sales係新黎o既，佢竟然唔知按錯咩制攪到出唔到單。就係咁混亂o既情況下，Cindy好醒咁換左之前已經填左o既tax free card，仲拎多兩張新o既添。當阿男sales再次入Cindy o既資料時，其實張咭上面o既資料已經係假o既，所以宜家Cindy真正o既身份仲未o係LV o既 system入面，咁對佢之後o既行動梗係有利啦！
Tax free Card o既正面
背面填資料，用完再改下佢，睇下下站用唔用到~
Day 3下集：
買完西班牙石板街後，我地旋即搭火車前往佛羅倫斯LV。由於我本passport 頭先已經曝左光，所以佛羅倫斯我就一定唔可以再 show 出黎。相反，由於頭先Cindy用左假資料，所以佢可以o係佛羅倫斯用真passport喇！而其他成員頭先都 show晒 passport，所以一陣大家都要好好演戲喇……
由於Cindy本passport未曝過光，所以我同Cindy被安排第一組入去。我地一齊入去然後分頭睇野，有個女sales問我係咪試袋，我好快叫佢拎個新款Lockit大袋黎睇，問下佢可唔可以載A4 file，佢話 ok 咁我就要喇。然後再睇下 d 銀包，選左一個後就比錢。佢叫我 show passport，我就話My passport is kept by my Daddy , I only bring the tax free card, can I buy? 唉…總之就扮晒無知啦！女 sales話要問下 manager先，o個刻我都有 d 驚唔得，不過可能佢見我買得少，所以ok左。臨比錢前我又同佢講我睇中左個銀包，「I love it very much，can I buy one more?」佢又 ok，所以埋單都有€1600，都好滿意啦！今日收獲唔錯，黃昏時又搭火車去米蘭，去到米蘭已經11:00p.m.，今日行程好緊迫，好攰啊……
文章定位：
