我星期六同媽咪一齊去咗睇醫生!已經有好耐無睇過醫生,雖然我淋巴腺發炎咗好幾日,痛到發脾氣,但我就係偏唔想去睇醫生,想佢自然好啦!!!!!但最後我都係死死地同老媽一齊去睇醫生,唔係我痛得際,而係我想有籍口陪我媽去玩啊!!!!!我地去咗食小籠飽,蒙牛雪條,上海燒餅....我地已經有好耐無咁樣一齊行街食0野啦!!!佢係一個典型0既"密室主人",佢一直0既活動範圍都離唔開土瓜灣同紅磡,對上一次出遠門係去銅鑼灣,係1999年0既事,0個次係我近年最後一次由佢陪我行街買衫!
我遺傳咗我媽咪一樣0野,唔係慳家,而係好鍾意行路!!呢d係我阿姨講0既!佢話當我仍0係我媽咪肚入面時,已經帶住我周圍行,由土瓜灣行去新蒲崗,到我出世之後,我就0係佢背脊跟住佢周圍走,哈哈!所以我睇到0既世界一定俾佢遼遠..
以前細個時我得過好多”怪病”,試過全身都”甩皮”,唔係講笑0架!!!真係由頭甩到落腳,當時每朝早起身我阿媽第一件要做0既事就係”掃皮”…..我仲記得0個時佢會叫我坐0係床唔好郁,等佢掃晒D皮先准落床玩!我又試過全個口爛晒生晒瘡…但我由細到大有一個醫生係全家都會一定只睇佢,一切緣於我全無記憶0既BB時代,根據我阿媽講,當時我”痌”足兩日,連兒科專家都帶我睇埋都未好番,0係人地介紹下就去咗睇呢間診所,”利民診所”…佢座落0係紅磡黃埔街,個醫生叫”莊清宣” 佢操一口唔鹹唔淡0既廣東話,細個0個陣覺得佢好高大,好慈祥,樣子好似我只係0係相中見過0既媽媽0既爸爸…..係呢個醫生醫番好我呢個連兒科專家都醫唔好0既病0既!!!所以自此之後我地全家都將佢奉若神明,有事搵”利民”啦!係我全家人0既口頭禪!
佢雖然係仁醫,收得平,又醫得好,咁多年0黎都無咩點加價,$50藥到病除,連<今日睇真D>都曾經訪問過佢,但佢有一個怪癖!就係佢好鍾意叫人打針!!!!!!!以前有好多人因為唔肯打針,結果俾佢趕走!!!!!佢鬧人好大聲0架!!!!!佢一發火鬧人,0個個人就會俾人永久BLACKLIST…..由於以前佢有好多人睇,多到每日睇150個人咁多,早,午,晚三更每更五十個籌都日日FULL,所以佢從來都唔得罪人!好多人俾佢呢頭鬧走,0個頭又走番轉頭!總有種兜兜轉轉還是覺得你最好0既感覺!
從來我都唔覺得時間過得快0架!但係前幾日當我陪住我媽咪再走入去時,望住佢同我媽咪講0野時,忽然覺得時間過得好快,佢同我媽咪都老咗好多,我抬頭望上天花,發現依然貼得滿滿0既贈聯”什麼妙手仁醫,仁心仁街…多到睇唔晒!!病床,醫櫃依然十年如一日….當佢摸我耳背兩粒腫起0既淋巴核時,我覺得佢就好似一直陪伴住我成長0既媽媽0既爸爸一樣!
哈哈…但當佢問我 "打針啊??”我就好驚咁第一時間講咗句, “醫生, 唔打針得唔得啊???”佢出奇地順攤話, “好啊!!!你唔駛打針啦!!!!”我真係好surprised0架!究竟係咪人老咗,D火就會收呢?定係佢已經無咗以前0既個份執著---打針快d好呢????
我總想同佢影張相,但我每次都唔敢開口,我好怕佢會忽然鬧我,咁我就好瘀啦!!!但而家佢0既樣已經0係我腦海裹面,只要我合埋眼佢0既樣子就會好清晰咁浮0係我面前,我真係好希望佢可以長命百歲,因為我就係我人生記憶裹頭好重要0既一部份!我有一大舊童年回憶都係同佢有關,亦係發生0係紅磡,所以我對呢個地方有份特別深厚0既感情!
我諗真係熟悉我0既朋友會知道我一個奇怪0既習慣,就係我非常非常0既怕”蹲廁”,其實呢種怕就係原於利民從前0既廁所,佢係0係一個後巷同一間理髮店SHARE用0既!!!!我到而家都好非常記得0個個又濕又黑又滴水0既後巷,又大又污糟0既蹲廁,我當時真係好怕自己會趺落去廁所度出唔番0黎0架!!!所以直到而家每次我一見到0個D廁所我就會好驚好驚!!!!!如果夾硬要我去,我就會好似細個時咁發出D嗚嗚嗚0既怪聲~~~~~~~阿CAT,你家吓明點解我同你講我0係又一村讀書讀足七年,但從來無入過花墟球場0既公廁啦!!!!我諗0個晚如果唔係你肯陪我去,我呢世都唔會知原來0個個廁所唔係我想像中咁污糟0既!佢好似係我去過最乾淨,最安全0既蹲廁!!!!!
紅磡有利民,有一個好好人但脾氣古怪0既莊醫生,有我地0個份厚厚0既病歷表,有聯記漢堡飽,有一條從前可以見到海,現今只能通往POLY 0既天橋,有粢飯,有全港唯一一家用炭爐做0既上海燒餅,有雜果皇帝蕉PANCAKE,有小籠飽,有童年0既梁慧能,而家0既我,有媽媽,有第三者不能理解亦牢不可破0既世界!
<三人行>
填詞：林振強
作曲：Margie Adam
編曲：褚鎮東
監製：舒文/陳永明
童年時逢開窗 便會望見會飛大象
但你問為何我這樣失常
而旁人仍痴痴 話我現已太深近視
但我任人胡說只是堅持
飛象兒共我 常在那天上漫遊
要用笑做個大門口 打開天上月球
齊話聲 漫長漫長路間 我伴我閒談
漫長漫長夜晚 從未覺是冷
漫長漫長路間 我伴我閒談
漫長漫長夜晚 從未覺是冷
年齡如流水般 驟已十八與星做伴
沒有別人來我心內敲門
而旁人從不知 亦懶靜聽我心內事
但我現能尋到解悶鎖匙
星與月兒共我 常在晚空內漫遊
笑著喊著結伴攜手 空中觀望地球
從前傻頭小子 現已大個更深近視
但已練成能往心內奔馳
而旁人仍不歡 罵我自滿以心做伴
但我任人胡說只是旁觀
心就如密友 長路裡相伴漫遊
聽著我在說樂和憂 分擔心內石頭
漫長漫長路間 我伴我閒談
漫長漫長夜晚 從未覺是冷
漫長漫長路間 我伴我閒談
漫長漫長夜晚 從未覺是冷
文章定位：
