尋日係阿媛既生日，作為friend底既牛哥、小綺同我，當然會同壽星女慶祝啦。
1:00p.m.
與牛哥「偶遇」於香港站，之後與小綺及媛會合，就踏出我地既慶祝活動之旅嚕。去邊？哈哈，陳小綺竟然諗到去梅窩玩，太好喇（今次全程都係小綺計劃架，好勁呀）！
2:00p.m.
去左食野，可惜牛哥與小綺都唔食得海鮮，所以‥‥‥惟有叫兩碟海產啦，桀桀！最後都係捨命陪君子啦。係一個可以望到海邊既地方，一路傾計，一路食野，真係好舒服。食呀、食呀，但係都係食唔哂。傾到咁上下，媛就俾可愛既小蚊親吻左一下，咁我地就出發去玩嚕。
3:xxp.m.
斯文look既媛，無理由咁去玩架嘛，結果就要買拖鞋同短褲。短褲？哈哈，每人一條，正呀。有似瀨尿後小朋友既牛哥、有似街坊裝既媛、有短褲仔但唔性感既小綺同埋樽領配紅褲仔既我。個賣褲太太話我地買褲都咁煩，洗手間嬸嬸就笑住咁俾意見我地。呵呵，四個騎呢大學生就咁出發！
4:30p.m.
租單車，可惜小綺唔識踩，要牛哥載。好耐無踩過喇，幾好玩。小綺就驚到死，落斜時就哇哇大叫，無他既，牛哥都踩得辛苦啦，見到佢架車條車軚都扁左，呼‥‥‥我都唔好受啦，上斜時（梗）親，男人最痛啊！之後去攀山同涉水，影左幾張相啦。回程時我竟然炒車！好彩就無乜事。比起炒車，我地既臀肌重辛苦啦，坐得好痛呀。
5:30p.m.
去沙灘。大家除哂鞋，一試凍到腳趾尾既滋味。牛哥未放過風箏，咁我地就幫下手啦。買左隻風箏，點知一開始竟然唔係牛哥放，而係我‥‥‥跑到隻狗咁，重要俾陳小綺影埋相、拍埋movie，可惡！不過最後都係由牛哥與媛合力放左隻風箏上天，so good！今次既生日會以雪糕當蛋糕，重開心啦。
之後我地重一齊許願，幫第二個願。結果，我同媛既願望就差唔多，牛哥亦被迫地接受佢既願望，而小綺就‥‥‥格格不入啦！每人一支蠟燭，我點都會keep住佢架。
我地重有玩（咩）人仔，由輕量級挑戰重量級‥‥‥結果？估到啦。
7:xxp.m.
趕唔切去聽俾小綺話kitsch既蒼狼樂隊嚕！當然，朋友重要過聽音樂好多。回程時同媛傾計，唔‥‥‥原來大家都想咁咁咁，不過無計啦，咁咁咁都唔係咁易，rite？
9:00p.m.
同媛爸媛媽一齊食飯？哈哈，無心理準備添！媛一家好識食，比起一個乜都唔理就食既我‥‥‥哈哈！食既野都唔算好多，但係，我竟然飲左四杯啤酒‥‥‥四杯！以前都未試過咁多，但係我又好似頂得住喎。都係牛哥啦，成日倒俾我！想灌醉我？
10:xxp.m.
到媛家一坐。見到名不經傳既比比喇，真係幾靚喎。媛個工作坊都唔係好亂啫，最少俾我既好。趕完paper既大學生，係咁架啦！
11:4xp.m.
終於完結今日既旅程，撘車返元朗時，我訓到無哂知覺添，好彩無流口水。由香港東南走到香港西北‥‥‥唔訓都無野好做啦！
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
總結：
~最偉大果個係陳小綺啦！由買禮物到plan行程都係一個人諗（我同牛哥都有諗過架，雖則只係諗‥‥‥）不過諗到去個咁好既地方慶祝，抵讚啦！好少有機會可以俾我地讚你架，珍惜下喇。
~我地全日不停咁話好正、好舒服，點解呢？日日都係做野，paper、莊務、家庭、感情，總之乜事都煩到我地。但係去到一個咁令人自由自在既地方，煩惱都立刻放底哂！
~計落，我地四個都好耐無一齊玩喇。同陳小綺就成日一齊啦，日日俾佢恰；媛平日要返工，而且又少一齊上堂；牛哥就更少見嚕‥‥‥見到你日日都好辛苦，喇，今次輕鬆返啦！
~臀肌真係有d酸痛。不過都唔係重點，重點係‥‥‥我好似飲醉左。今日個人都呆下呆下，想訓想訓，重成日覺得個身有d酒氣添。呵呵，下次唔敢喇！
~竟然俾陳小綺發現我既口頭禪。「重點係‥‥‥」、「一瞬間‥‥‥」，重點係連我都唔察覺自己成日講‥‥‥噢！
~媛，同我一樣咁大喇！望你願望成真啦！
~下次再一齊玩係幾時呢？接機？
文章定位：
