2003 年 04 月 13 日 星期日 【晴】
最後一課
或者今日未必係最後一次補習
(可能以後心血來潮想考TOEFL或IELTS...)
但斷斷續續補 Sham Sir 一年幾
今日終於係 say goodbye o既日子
記得舊年讀緊中六o既時候
有讀物理o既朋友都話o係學生會補 Sham Sir
結果就報左 Wave 班試一試
o個時上堂時間係禮拜四夜晚八點半
但 Sham Sir o的班出名超晒時 (到而家都係 ^_^)
往往去到八點九甚至九點先正式上堂
接近十點半先落堂
學生會設備又無大型補習社咁好
上堂要一手拎咪一手o係 projector 上面o既 slide 寫o野
projector o既光成日直接射向對眼
所以成堂 Sham Sir 都戴黑超
聽講佢因而有眼疾o添
我覺得佢o既教法幾適合我，筆記又正
結果跟左佢成期o既 Wave
又問左朋友借之前o既 Mechanics 同少少 E&M
五月底遵理報紙頭版賣廣告話 Sham Sir 過檔
我亦都跟埋跳糟，連帶部分同學都受我影響
Summer course 補完，繼續補 Matter o既時候
已經變晒全 Video course 了
而且仲去左地鐵通車無耐o既將軍澳上堂
聖誕節補完 Matter，隔左個幾月
再補番 E&M 當中o既大 topic EM induction
上完o個六堂就等到今日同佢告別
講番今日，最大得著係佢講左一o的實驗陷阱同
考生常犯錯誤引致做唔到 / result錯左
佢亦都錄左幾個 past paper 實驗
清楚解釋儀器o既操作同點樣接駁
最緊要就係考完心有不甘就要去考評局投訴
仲話年年都大排長龍 ^_^
補完之後對 Practical 信心係多左o既
期望禮拜四會有好消息俾返 Sham Sir 啦！
P.S.今日o係灣仔地鐵站新城娛樂台派口罩同一袋o野我
(仲見到慢必o添！) 返屋企打開袋o野
除左有好多宣傳單張同一塊鏡同兩粒治痱滋藥外
仲有...原裝進口、多種香味、Wonder Life、
For Happy Hours By Two...哈哈，唔知幾時用得著喇...
(註：我收到o既係朱古力味...)
2003 年 04 月 16 日 星期三 【晴】
戒炎避炎
香港仍然籠罩在非典型的陰影下
最近更多了人因肺炎而死亡
有其他慢性疾病的長者更是高危一族
一旦中招康復的進度會較緩慢
而且病情反覆不定時也會有生命危險
雖則像我十多二十歲的年青人死亡率不高
但顧及到父母都較大年紀
假如他們有事就真的很麻煩了
有見及此我家姐都不敢常常回來跟我們吃飯了
話避免她在街外接觸到的病菌帶回來
而我自己都把出街的次數減至越少越好
大約隔一天才外出一次，而每次外出
所有要做的事、要買的東西都一次過完成
回到家立即洗手，所以衫褲和襪放在垃圾袋等待處理
之後再洗手，盡可能立即洗澡洗頭，連 underwear 也換掉
那就差不多可防止街外病菌在家散播了
以前一個月能否做一次全家清洗都成問題
現在天天都用稀釋漂白水抹勻全屋~
P.S.原來沖涼都好有學問
人可以戴口罩，戴眼罩
但額頭始終無o野遮擋
所以淋浴前要先清潔額頭
防止額頭有污糟o野沖落眼、耳同鼻
聽落幾有道理咁~~
2003 年 04 月 18 日 星期五 【晴】
是香港心
阿姨由加拿大空運 N95 口罩來香港
幾多個？十個？二十個？七十個？
都唔只！過百個啊！
我諗拎去賣都得咯！
最衰呢排無乜跳蚤市場開張招租
如果唔係開擋仔賣口罩都唔錯 ^_^
下晝無乜電視節目好睇
睇番幾個月之前錄低但一直無時間睇o既錄影帶
千嬅聖誕北海道音樂特輯+電影乾柴烈火
結果睇左兩個半鐘古仔+千嬅...
繼《同步過冬》之後又一首勵志振奮港人o既歌
無論政府、醫護人員抑或一般市民
都要繼續同心協力抗炎
We Shall Overcome, We Shall Overcome
凝聚每份愛 去熱暖萬心
大眾肩並肩 心照心 照應更親近
為前途 為人人關心
We Shall Overcome, We Shall Overcome
凝聚每份愛 去熱暖萬心
大眾肩並肩 心照心 盡發潛能
大眾多關心 發揮超級愛心 是香港心
2003 年 04 月 23 日 星期三 【晴】
絕對手軟
今日同兩個朋友去太子打羽毛球
最初老豆其實唔太同意
始終驚萬一中招就好麻煩
但自己做過風險評估
覺得個度唔算得係高風險地方
而且阿媽唔反對，所以都去得成
打左兩個鐘羽毛球
佢地去更衣室「洗車」
(我揀「抹車」，都係風險問題 :-) )
之後佢地話碌保齡
咁大個仔都未試過玩
趁呢個機會試下玩先
(睇人碌就睇得多，因為以前太古城中心
有間保齡球館，每次到個度飲茶都會去
睇人碌保齡同打機)
頭四球當然係意料之內──碌落坑
之後掌握左技巧，o的樽塌得越來越多
更試過一次全中，多次中九個樽
o個 round 有成 80分，唔駛包底算有交代 :P
之後休息一round，第三round又欲罷不能再打
但狀態始終唔及第一round，結果六十分都唔夠
點都好...始終叫第一次試，希望以後仲有機會玩
返到屋企沖完涼
先覺得隻右手酸到不得了
原因？ anaerobic respiration occurs in muscle cell (唔係沙士o卦...)
我諗要一兩日時間將 lactic acid oxidize to glycogen ^_^
2003 年 04 月 24 日 星期四 【晴】
第一封信
早幾日先話死左條心搵工做
估唔到今日就走去申請兩份工...
第一份係巴士公司請臨時調查員
負責數客，可以話係巴士迷至愛
但亦因為咁，消息一發放到
巴士迷集中o既討論區
競爭就會突然間大左...
雖則話可以打電話去申請
但我都係決定用醫貓寄求職信同履歷表過去
咁樣好似formal少少
(個求職信同履歷表格式係抄家姐同姐夫o既 ^_^)
最後揀唔揀我留番俾佢地決定喇
夜晚好友又俾左個連結我
話一間前英皇御准o既機構請臨時工
今次就填表格，表面上好似有好多職位揀
但聽聞好似只係招聘其中一個
結果就好似揀六合彩號碼咁揀左一個
唔知買唔買得中呢...等電話通知
2003 年 04 月 27 日 星期日 【晴】
風箏與鋒
繼續乖乖地留在家裡不隨便出街
連續八日沒有影車，繼續忍手，嘻嘻！
今日黃昏去鯽魚涌公園海皮鬆一鬆透透氣
東區走廊車來車往，但海濱走廊也人來人往
一些想跑步的也跑不快
除了有班長駐的釣魚發燒友外
還見到十多個外籍傭工排練啦啦隊舞
亦有人放風箏，有人厲害到把風箏放到很高很高
我想遠至杏花村柴灣也看到吧
條風箏線一定十分長，收線都收到手軟...
今日收到第一封大學邀請 interview 的信
下月中先去清水灣一趟，當然希望陸續有來 :-)
2003 年 05 月 02 日 星期五 【陰】
心曠神怡
無影相十二日，今日重拾相機
去完港島西端再過去東端
一個幾好o既舒展身心活動
再等到疫情進一步緩和後會考慮去遠D地方
但總有日子係定左一定要去「遠行」...
就係大學學系面試喇！
琴日收到馬料水大學來函
19同21號有個 admission talk (上年抽唔到時間聽)
真正 interview 係 26號
換而之今個月就算冇工開都有節目 ^_^
上個月愚人節買o既三包米
o係我同屋企人o既努力下
已經所剩無幾，都咪話唔厲害！
琴晚做統計，上個月外出次數係...
10次！！創晒新低...
文章定位：
