估唔到勁過飯咁快又搞完，附附碌碌都算過得去，不過真係唔知點解會有咁多人參加．食過勁過飯，亦即係話呢個sem 己差唔多到尾聲，時間原來真係好寳貴，大學一年級既生涯只剩番一個月，而上堂既日子．．．剛好半個月．心灰咗一下 =.=!
四月快到，阿妹就黎要會考，自問佢天資唔差，細細個小學時，差唔多年年考第一．理論上，我不用擔心，但係唔知點解我一番屋企，見到佢溫書，夜晚出去補習，我就覺得好對佢唔住．諗番以前，因為我，佢唔可以同我一間學校，一個form one仔入咗一間陌生既中學，冇人睇住佢，開頭實會好慘，好難適應．
仲好記得三年前既三月，枱上面放滿晒參考書，望着手錶計時做past paper，嗰陣我好羨慕有哥哥姐姐既同學，係屋企做到唔識可以有個人問下，唔使周圍問人拎 marking 同past paper，好幸福．所以我考完會考後，將所有同會考有關既野全部留低，仲諗住可以到時教番細佬妹，滿腦都係美好既幻想．
三年後到咗今日，妹要考會考喇，我開心因為佢健康成長（雖然刁蠻咗）．我內疚因為呢兩年來我冇教過佢咩．前兩年，佢係屋企一有唔明，都會問我，但我自知脾氣差，我每次答佢之前，我一定會責罵佢＜點解會咁都唔識！．．．＞，久而久之，佢愈來愈少問我書．入咗大學呢一年，佢都冇點問過我問題，仲話我好多野都唔記得晒，費事比我教錯．心裡不禁有一罪孽感，望一望書櫃，當年我的會考書仲係度，妹多數都係睇佢自己既notes同書，我嗰啲，應該一半都未睇晒．
而我細佬，話咁快就中三，又到選科既時候，我當然想佢讀理科，而第八科就讀econ．但佢目前既成績好有可能入唔到精英班讀econ，只可從CS，Arts，音樂，普通話中選一作為第八科．年年家長日，老師都咁樣講＜佢上堂好乖，好靜，成績中上啦＞．
暑假細佬去咗新加坡exchange，返黎開咗學冇幾咗，佢同學一家約咗我地食飯，佢同學媽咪同我媽咪咁講＜你幾個仔女好叻，唔使讀書都叻過我嗰啲，我個仔話XXX（我細佬個名）上堂都唔使聽書既，但問親佢野又識架喎，佢返屋企係咪哥哥姐姐教佢既呢？＞
有，就奇喇！佢番屋企係唔會掂書，學校又冇咩功課，考試前，佢求其睇一睇書就算．因為我想同細佬一齊番學，所以叫佢選我間學校，但學校好自由，係靠自律溫書，結果．．．細佬依家當然叫好啦，唔使做功課．
細佬踢波好叻，腳頭好勁，屋企唔比佢入校隊因為想佢比心機讀書，踢波只可做閒餘活動放學玩．可惜，他上了中三後，對online game著了魔，不用踢波的日子就對住部機．而我，根本做唔到咩，懷念之前細個同細佬爳機打既日子．細佬唔使讀書考試都中上，踢波又好，我唔想晒咗佢既天資，好想幫佢升到中四精英班．
爸爸成日話細佬妹要比心機讀書，好似我咁讀大學，佢就好開心．其實我真係好慚愧，今天我的所有都係父母比我的，我由小學一年級補習補到入大學，體魄又唔好，細個個郁下就話唔舒服，食又食得好過人，住又住得好過人，著又著得好過人，但係我唔生性，只係入到中大讀統計，仲要讀到一篤屎咁．
去親統計既活動，心裡總有一種悔疚，親自搞活動時內心係點就更加唔使講．有一次，見到媽咪對朋友個仔能拔尖入北大，嗰種心情，筆墨根本不能形容，覺得令屋企丟面．好興幸，中大統計比咗一大班讀統計同埋風險管理既朋友我，識到佢地好開心（如果能令朋友日日嘻嘻哈哈，我情願gap落去，唔介意比人叫做gap聰，只要唔好係公眾場所就得）同學一齊食飯，見到佢地講關於RMS course既野，見到佢地講自己啲補習學生，好羨慕，心裡不禁自咽．
自從今個sem有宿後，識多咗人，比起第一個sem開心咗，自己咁大個仔，唔可以繼續做二世袓，唔可以再好似以前咁，日日同細佬打交，做野要有番少少建設性．細佬妹的時期我都經歷過，我唔想佢地步我後塵，跟我呢個壞榜樣，因為以佢地既天賦，一定會比我優勝．依家，睇通咗，對自己冇咩期望，讀書阿伯行路（中中地）就可以了，只希望自己係屋企能有一點用，得閒教下細佬妹，幫得就幫．最好，細妹能夠拔尖，細佬入到精英班．
唔經唔覺，呢篇野我打咗５小時４３分鐘，唔知點解好想將心既野打晒出黎，可惜打得太慢．打完，心輕了一點．
文章定位：
