告訴我 每天都要讓自己大笑三聲．．．．有益身體健康唷！！！！

14,406愛的鼓勵 40訂閱站台

十箍銀會當創啥？買一份報紙，做一个免出門能知天下事的秀才？抑是，買一塊麵包，啉一杯家己泡的「下午茶」？

 

這个年代，十箍銀做無啥物大代誌，路邊停車也只會當停半小時而已！

 

會記得奚是小學二年時陣的代誌，時間大約是民國五十三年。

 

迄時陣，南部的囝仔無聽過「零用錢」這三個字，尤其蹛佇臺糖宿舍區的囝仔，也用袂著零用錢。迄時陣大家攏真勤儉，喙饞時上濟是討一角銀，買兩粒糖甘仔過慭罷了。

 

佇臺糖代用小學讀冊的囝仔，除非是家長開證明，因為無不蹛佇廠區宿舍內，若無中晝一律愛轉去食飯，不准帶便當去學校。

 

已經想袂起來，到底是為著啥代誌。

 

早起第三節下課的時，阿爸突然間來學校，互我一張十箍銀塊的紅色紙票，毋過是青色抑是紅色的確實我已經袂記得。

 

阿爸講：「中晝家己去菜市仔食中晝，然後轉來學校睏晝！」

 

佇同學欣羨的眼神下，將十箍銀細膩摺好匟佇褲袋仔裡，一直到甲第四節課下課時，倒手一直攏無抽出褲袋仔過。

 

十箍銀呢！真恐怖的十箍銀呢，阿爸就安呢互我矣！

 

宿舍區的後門外，無偌遠的所在就是南區市仔。

 

食了兩粒土豆粽，才開一箍銀爾爾！但是九个一箍銀的銀角仔，佇褲袋仔裡真無安份咧「誇啷！誇啷！」叫！

 

擱食一碗仙草冰，結果擱加入八个一角銀，加入噪動的行列！

 

猶擱有啥物好食呢？

 

擱食吃一碗米苔目吧！處決了五个一角銀，是有較安靜矣。但是，八个一箍佮三个一角的銀角仔照常是吵甲袂安份呢！

 

買一塊墨條吧！雖然厝裡迄塊猶擱真長的，但是無安呢裀著袂安份呀！擱再買一隻大楷毛筆，竟然猶賰兩箍三！

 

擱買一隻小楷毛筆吧！

 

「三箍銀一枝！」

 

共頭家出價，有喙講甲無瀾最後以兩箍三成交！

 

究竟我已經買了墨條佮大楷毛筆了，頭家嘛真大方講：「半相送啦！」

 

哈哈！口袋仔裏總算一點聲說攏無啦。

 

欲暗放學轉來到厝，阿母只問我中晝飯安那解決咧，阿爸也無問講有賰錢愛還伊！

 

那知！到了七點左右，腹肚煞陣陣的絞痛，紲落開始走便所。管你是家庭常備良藥「慕地拉斯」，這時陣完全失去效果啊。

 

唯醫院轉來，阿爸才問講中晝到底是食啥貨？

 

兩粒土豆粽，一碗仙草冰落肚了後，擱來一碗燒燙燙的米苔目！如此這般食燒食冷袂「落」赫濟才奇怪！

 

「我叫是十箍銀，攏愛用乎了啊！所以才．．．」看著阿爸咧變面我是感覺蓋無辜毋知欲安那才好。

 

刊載於「海翁台語文學雜誌」第60期（2006.12），p.85。