《我的...心情紀錄本》 ☆我會係依度同大家分享我的喜怒哀樂，關於我一切一切的事情！☆

1愛的鼓勵 0訂閱站台

今日下午到屋企附近既商場食飯，又周圍睇下野，平時同老公一齊，佢一定唔俾我睇架，除非你話俾佢知，你要去買咩啦，如果唔係…佢都唔想我行！唉，跟著一個心急既人，遲啲ＢＢ出世之後，唔知會唔會一樣係咁吹我快啲呢？同佢去餐廳食飯，當我放低餐具既時候，佢就會話去埋單，時時都係咁樣就行左出去，好似唔俾你坐多陣咁！有時我會整古佢架，早過佢俾錢出黎，之後自己去附近既店舖睇野，等佢見唔到我，周圍搵我！哈哈，都幾無聊呀！

 

嗯，係商場見到好耐無見既舊同事，同佢傾左好耐，佢一見我就話我肥左，哈，唔知係咪真係咁明顯呢？我話俾佢知…我有左BB，所以好似肥左囉！點知…講下講下…佢就話俾我知佢既經驗，真係唔好意思提起佢既傷心事！

 

係佢33歲時無諗到會生ＢＢ，但之後因為她奶奶想佢生，而佢老公既哥哥竟然係基佬，咁屋企就得佢兩個仔，這樣佢唯有去試下啦...驗身時，就只係她去化驗所做檢查，但她老公可能因為唔想去做檢查，而無去做。朋友檢查完後發現她的卵子不合格，不優良，之後打針食藥調理返正常，點知都係未有懷孕，之後去睇中醫，突然間…中醫問她：會唔會係你老公問題呀？她才醒覺，係喎，老公沒有做檢查喎，之後叫他去檢查發現原來他的精子數量唔夠，都係難中，最後醫生見議他們做人工受孕，當時她已經38歲了！

 

原來人工受孕都未必會中架，因為如果結合了之後沒有著床都不夠成孕，當她第一次接受人工受孕，成功懷孕，但…7日後她因為感冒唔舒服，又無諗到係唔可以飲感冒茶，咁佢飲左第二日即刻見紅，去睇醫生…醫生就話ＢＢ已經無左。因為佢覺得年紀已經很大，她沒有時間再等，所以她決定隔一個月就再做人工受孕，其實無左ＢＢ仲傷過生完ＢＢ呀，休息一個月其實都唔夠架，但佢醫生又肯同佢做，第二次同樣中到，但…今次唔知點解，係十日之後又見紅，她說可能個人已經好緊張，都唔記得自己有無食過咩野，最後再試第三次，如果都係失敗的話，就放棄唔再試喇，因為實在太辛苦喇！最後一次就唔成功，所以她已經放棄了！

 

原來想有ＢＢ唔係咁容易架，真係要襯住後生，時機一過，有好多事都可以發生，無野係必然既定律，雖然生仔係女人既天職，但…都未必人人可以。嘩…唔聽佢講都唔知人工受孕係咁樣既，更加唔知佢遇到既係咁樣囉，可能係上天既安排，無人可以逃得過！