潘師奶@聖荷西 我在聖荷西攪攪震，無幫襯。

1,202愛的鼓勵 0訂閱站台

最近我覺得自己煮餸真係好食左！好似突然間開左竅，明白左煮餸的道理。我做人做事都係咁，要鈍一排禪修 & 參透過後，先至領略到個真諦。

今日呢個「豆豉雞雞」，簡直係我o既得意之作。我第一次煮咋！

話說阿菇放工一入門口，己經大叫︰「嘩！好香呀！你煮咩呀？」

我︰「豆豉雞雞。」

呢個豆豉雞雞真係非常美味。

阿菇一邊食一邊問︰「你呢個汁係點整o架？」

既然菇菇食得咁滋味，我就姑且將我點整個豉蒜汁的方法講佢知。

菇︰「估唔到你識整呢個汁喎！我初初仲估你係用李錦記，但食落又唔似係！李錦記個汁好鬼重蒜蓉味！蓋過晒其他味！」

YEAH！

阿菇︰「等左兩年，終於食到美味o既餸啦！」

哈哈，阿菇食完一碗飯後，再添了一碗飯，不但連汁到撈埋，仲將豆豉雞雞裡面o既洋蔥都食晒！！！

佢話呢個餸係值十二分 (十分滿分)。

同時，佢又話︰「唔好叻左一次就鬆毛鬆翼呀下！」


豆豉雞雞的做法︰

材料︰
雞約一磅切件 (用老抽生抽少許糖、油及生粉醃片刻)
青椒一個 (切成角狀)
洋蔥半個 (切成條狀)
豆豉約一匙羹 (用刀背略剁)
蒜頭數瓣剁碎成蓉

做法︰
1. 用少許油爆香洋蔥及青椒，盛起備用。
(洗一洗 wok，以去走洋蔥及青椒留下的 wok 撈 --> 是媽媽教的)
2. 再用少許油爆香豆豉及蒜蓉、落雞件炒爆一陣！要炒到o的雞略燶 (但唔好咁燶)
3. 加丁丁咁多水，約蓋過雞件三分一就可以，放入洋蔥，加蓋炆雞約 15 分鐘，等佢入味o的。
(在此階段，可以試一試味，睇佢夠唔夠味)
4. 如覺得唔夠味，就加丁丁咁多糖或蠔油。
5. 繼續煮佢一陣，等o的汁濃o的。
(媽媽的 tips︰我媽媽煮餸不嬲都唔勾獻，我都好怕o個種透透明明的豆粉水感覺。所以，我從不跟食譜勾獻。總之放少o的水，煮多佢一陣，o的汁就自然變燶，變成獻汁的效果。)
6. 最後加入青椒兜勻(唔好咁早放，否則o的椒會被煮到 the 皮)。
7. 食得。
8. 等待老公的讚美。