佮（kah，與）老柯佇電話中講伊新出的冊、和一兩位老作家的狀況了後，伊講最近佇電視台看著一齣「戇大姊」莎莉麥克林演的電影＜第一夫人的保鏢＞。「其中一幕是伊堅持欲出去野餐，可能會落雪也毋管。……人老矣猶會當遮爾（tsiah-nī，這麼）自在，遮爾隨心所欲，真好！」
敢若就是野餐彼回，前第一夫人予人綁票。我講我幾若年前也看過這齣，男主角是彼个演啥物狼的。
|
「毋是，毋是彼个演佮狼共舞的，伊嘛真有名，叫啥名，這陣想袂出來。演保鏢這个嘛真大跤，名想出來的時才共（kā，跟）你講。少年時陣，明星的名無論偌長攏有法度隨時講出來，這陣欲想in的名， suah（竟然）真食力。」
「這真正常，我也仝款。有的字明明寫過萬百遍，欲寫的時想甲頭殼強欲破去嘛想袂出來。」
頂遍開講，我講袂記得名誠正常，伊講，「誠正常？」這遍伊無表示懷疑抑是毋甘願，竟然認份起來，「無辦法，記持（記性）愈來愈差矣。」
我講我的記持也是「兵敗如山倒」。
「所以，有的代誌愛講出來才袂一時仔就袂記了了。有的作家愛共人講伊欲寫的小說；一遍一遍講，順紲（sūn-suà，順便）加一點仔細節，按呢，提筆寫起來時就較容易。」
「猶是做筆記較好。」我講，「毋過，準做有寫，也有可能袂記得寫佇佗位。」電腦存圖檔誠容易，我卻不時受困佇無仝款名目的資料盒仔內，揣（tshuē，找）甲目睭欲挩窗（thuah-thang，鬥雞眼）。
|
伊閣轉去講彼齣電影，「莎莉麥克林真無簡單，遮爾老猶咧演第一女主角。真濟明星早早就毋知佗位去矣。伊彼个真出名的小弟這幾年嘛無看著影，毋知猶有佇咧無。」
伊有明星小弟？
老柯著驚的口氣，「你毋知影伊有小弟？伊的情史和電影仝款精彩啊。」伊講袂出伊叫啥名，「我想起來才共你講。」
毋過，我家己真緊（快）就想著「戇大姊」的小弟佇一齣＜金玉盟＞內的模樣矣。「伊敢若叫做，叫做……，咱同齊來想伊的名！」
伊講無法度，著愛過一兩日才有可能雄雄（hiông-hiông，忽然）想起來。
|
誠運氣，我電話囥（khǹg，放）落去，竟然就想著伊的名矣。
|
另外兩个大明星的名，我無耐心等老柯想起來的時共我講－－伊想起來的時無一定會當做一回事來共我講，甚至無定著根本袂記得欲共啥人講呢。
所以我家己馬上拍開電腦－－若會記得世界上有google這个物件，真濟代誌攏有法度「想起來」。
我半分鐘就揣著，隨敲電話予老柯，「演第一夫人保鏢的是尼可拉斯凱吉。」
伊講著著著（對對對）。
「演佮狼共舞的是凱文柯斯納。」
伊講著著著。
「閣有，莎莉麥克林的小弟叫做華倫比提。」
伊哈哈哈大笑，閣講著著著。
「華倫比提這个名毋是上網路查的，電話囥落我就想起來矣。」這是一定愛聲明的，算是予家己的記性一點仔公道。
＊
＊
講著「電影」，我自早就佮（kah）伊有交情，連需要「辯士」解說劇情的無聲抑是無字幕的電影嘛看過。辯士誠工夫，男女主角相唚（tsim，親嘴）的鏡頭，伊也解說，「約翰佮瑪琍唚落去矣。」
國校畢業彼年，我的大姊訂婚，我看電影的機會愈濟，變做一个真正的影迷矣。
姊夫的老爸是一間戲園的股東，手中有叫做「銅牌」的貴賓入場券；銅牌佇姊夫的親情朋友間流傳，阮姊妹仔若提著，無管當時咧演的片好看抑是歹看，無管是毋是明仔載欲月考、期考，一定袂使予銅牌拍損（浪費）去。一半擺，姊妹仔撨（tshiâu，商議）袂好勢，嘛捌偷食步，一人先入去戲院了後，偷偷仔到門口共銅牌揜（iap，偷塞）予第二的人。
電影看濟，自然著會迷明星；看電影雜誌，關心in的生活動態，收集戲院介紹劇情的「本事」，連報紙面頂的電影廣告也鉸（ka，剪）起來貼佇簿仔。
上要緊的，是儉錢去買明星的相片。
佇彰化的冊店買無夠，我嘛捌佮一个姓尹的同學到台中一間一間冊店去揣（tshuē，找）。兩人的口味仝款，不時會相爭一張相片。阮愛看的是好來塢的電影，羅勃泰勒、葛雷哥萊畢克、奧黛麗赫本、黛博拉寇兒、詹姆斯狄恩、伊麗莎白泰勒……遮的大明星的相片買著就歡喜幾若日；買無，報紙頂無啥清楚的相片嘛罔留。相片的後面，我寫in的生年月日，演過啥片，翁/某是啥人（真濟西洋明星嫁娶毋但一擺，就免遐工夫一个一个寫矣）。
下課的時間，阮除了講小說，就是講電影。明星落落長的名記牢牢，講著in最近的新聞，咧拍啥物片，清清楚楚，親像佮in蹛（tuà，住）隔壁。一寡kan-na（只）會曉讀冊的「書呆」聽阮講甲遮爾有學問，目睭瞪大大蕊，予阮愈風神（神氣）。阮講阮看電影的本事遮爾強，考試的範圍若是電影，兩人穩當包辦第一名和第二名！
為著欲知影當時和紲落（suà--lo̍h，接下來）欲演的是啥片，我閣不時去巡戲院口的海報；有宣傳車出來街路放送，嘛會斟酌聽。彼陣，無「噪音管制」這个名詞，「大江東去」放映的時，我連紲兩暗去中正路一个同學in兜（tau，家），佇樓頂的窗仔口一遍一遍聽uì戲院傳出來的主題歌；雖然電影已經看過，阮猶是聽袂siān（厭倦）。
員林小所在，電影的放映期間短，想欲看的電影無較緊去看就袂赴（來不及）；所以，我捌佇期考前去看兩三點鐘長的「暴君焚城錄」和「亂世佳人」，感覺家己誠英雄。根據世界名作改編的電影，準做無提著銅牌，抑是佇別間戲院放映，我嘛一定買票去看。
自少年時就有的興趣，無可能「斷根」，食頭路以後，我猶是不時去戲院報到；開始投稿了後，一位兼編晚報電影版的副刋編輯看我對電影的痴迷，閣好心共登過的明星相片寄予我。
這二三十年間，我雖然罕得去戲院，但是電視頂的好電影我嘛看袂少，有時閣借影碟來看。小津安二郎、奇士勞斯基的影碟紲（續）咧看，舊（去）年，我佇一個外月內，看十幾支黑澤明的電影，看甲朋友講我應當好好仔寫一篇心得。
年紀無仝，這陣我純看電影，對明星的私生活無關心，會記得的名嘛kan-na茱蒂佛斯特、柯林佛斯、愛瑪湯普遜、安東尼霍普金斯、麥特戴蒙、梅莉史翠普這寡仔資深演員。橫直明星的名，隨看隨袂記得，免去記。
五六年來，我開始對日本幕府時代的連續劇有興趣，若咧演，就逐日準時收看；最近看的是四五年前看過的＜篤姬＞。記性變bái的好處，就是看過的電影敢若毋捌看過；會當閣看甲真熱，真心適。而且，日本式建築翕（hip，拍）起來，有特別媠的光影，彼時代的故事、複雜的服裝佮禮節也真趣味。
毋過，日本明星的名我知影、會記得的無幾个，一半擺人講著某一齣的明星叫啥啥啥的時，我才應「著著著」。
。原載2016.11月號《文訊》雜誌。
文章定位：
