好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

以前陪大家（婆婆）去予醫生看，醫生攏會講一句，「退化的關係。」

大家修養好，恬恬無講話；共醫生說多謝了後出去外口，就講：「逐遍攏講退化，是咧偌退化！」

  我安慰伊，「按呢講較簡單啊。可能伊叫是（以為）按呢講，咱就較認份，袂要求真緊就治好。」

  看伊不服的表情，我感覺好笑，心內想，「老就是老，退化就是退化，人生就是按呢啊。」伊家己嘛不時講，「真害，人老矣，連吞喙瀾（口水），也會去嗾著（tsa̍k-tio̍h，嗆到）。」

  這陣，換我聽醫生講我「年紀大，退化矣」，才較了解大家彼款不服、毋願認輸的心情。

  我是最近腰痠背痛才去揣（找）骨科醫生，伊看電光相片，講我的龍骨（脊椎）有一點仔歪一爿，第五腰椎和第一薦椎之間小可仔走位。

龍骨歪去，敢若是人類這種徛直行路的動物普遍有的毛病，腰椎和薦椎之間走精，可能是因為時常坐佇電腦頭前、閣無注意姿勢的關係。「人活到一个年紀，身軀所有的機關攏會退化，漸漸冗去、歪去啊。」醫生講。

起先，我毋願去揣醫生，靠家己做體操復健，經過兩三禮拜，差不多好八九成，本來無法度做的動作無問題矣；毋過，有人嚇我，講無醫澈底，會留一个病母（病根），我才去病院掛號。

這个期間，我也聽朋友的建議貼治痠痛的「貼布」。

其中一位朋友予我一片伊講對筋骨痠痛上有效的，教我用偌濟鉸（剪）偌濟，「按呢才袂拍損。」紲落（suà--lo̍h，接下來）伊斟酌講，「身軀焦焦（乾）的時貼，暗時欲洗身軀前，先拆落來，用本底彼片玻璃紙黏起來；等洗好、身軀焦的時，才閣貼轉去。」

啊，遮爾寶貝？伊講按呢會當用甲貼布袂黏的時陣。

到彼時陣，貼布敢猶有效力？敢袂傷著皮膚？

我想著真久以前，伊講起予囡仔一人兩棟厝，「阮老爸傳落來的觀念，一棟家己蹛（tuà，住），一棟租人；按呢，才有安全感。」

我問伊是毋是uì（從）老爸的手中得到兩棟厝？伊講老爸予伊一棟，另外予伊股票；到伊這代，佇外國的囡仔，伊也是予伊股票，隨在伊處理。

遮爾有錢，猶遮爾仔儉，我這个退化的頭殼完全想袂曉。

   2019.12《文訊》雜誌