今日搭的士帶Lafite去愛護動物協會打針，回程時遇到一個有趣的士司機。
司機見我帶住隻狗，就問左我好多關於狗狗的問題。我同佢講我原本都有一隻狗，可惜死左，佢聽完之後竟然流眼淚，我望住佢唔知講咩好，佢同我講佢一個好感性的人，我話咁係好事，人生先有味道，如果唔係個人會好冷漠。
就係咁，我地打開左話閘。佢忽然問我，你覺你咩係生命，我唔知佢想聽咩，我亦唔想同佢講人生哲理，所以我同講生命就係識行識走，例如我同我隻都係有生命嘅野。佢聽完就話︰生命唔在乎長短，生命唔在乎貧與富，生命究竟在乎什麼呢？生命在乎於你有沒有參與，有沒有付出與接受。我諗司機係想回應番我講，我隻狗死時我好傷心，但我回想起同佢一齊時，我覺得好快樂。
過左一陣，司機又講︰之前一個月有好多家庭倫常慘案，於是我做左一個研究，關於婚姻，以前我細個一直都唔知咩叫婚姻，就算到左自己有左婚姻，都唔知咩叫真正的婚姻，直到現在。我發現以前的婚姻係結合兩個家庭、兩個宗族，甚至係一種買賣，現在的婚姻，係由兩個唔同成長背景的人，希望共同建立一個家才有婚姻。所以通常結婚的人有兩種組合，一係就個性相近，一係就個性相反……
司機問︰你知唔知結婚同一間屋好有關，一間屋同一個家有咩唔同？
我說︰一間屋就是一個地方，你可以住，一個家係有關懷同愛的地方。
司機︰我覺得一個家最起碼有三樣野，一係感情、二係溫暖、三係支持，缺一不可，有左呢三樣野，就算住一間容容爛爛的屋都係一個家，如果冇左呢幾樣野，就算你間屋係用金用玉去砌都只會係一間屋。D人成日話，我為左你做乜做乜，其實唔係為對方做乜做乜，而係為呢家做乜，係為大家做。D人成日話為人做野，係希望人地回報自己……
司機︰我花左二十年時間研究為什麼人要受教育？
我︰你讀書個段時間研究？
司機︰唔係，係我出黎做野之後先研究。我覺得讀書係有兩個層面，一係實用層面，另一係理想層面……實用層面係社會用作將人分流分級，理想層面係人通過知識，係人生或理想達到更高層次……
我︰其實你係唔係有副業寫文章架？
司機︰唔係啦，我淨係鍾意寫，寫完我就燒左佢，記係呢度(指住自己個腦)。
我︰咁你做司機悶唔悶？
司機︰睇下你鍾唔鍾意自己份工lor，我就鍾意。我鍾意同人傾計，你會唔會覺得呢個司機咁架，同我講埋D咁嘅野！
我︰唔會呀，講下冇咁悶！(我心諗如果你同我講政治我就死喇，好彩你講呢D。)
司機同講我左好多野，我最認同就係︰「一個家最起碼有三樣野，一係感情、二係溫暖、三係支持，缺一不可，有左呢三樣野，就算住一間容容爛爛的屋都係一個家。」
文章定位：
人氣(41) | 回應(1)| 推薦 (
0)| 收藏 (
0)|
轉寄
全站分類:
不分類
