■臺語文　■臺語註解　■網上臺語教學資源　■唐靜儀舖文　■相關文章

　　◎母語咧消失

　　　　　　　　　　　　　　　　　　　⊕潘文良

　　「台灣母語，正在消失……」（台語正在消失……）
　　呰句話，呣知「流行」，幾十年啦！
看來，著算佫再十年、二十年、三十年，也是會聽著、看著呰句話——
「永遠」嘛是‥「台灣母語（台語），正在消失……」
　　每擺看著、聽著呰句話，心中著升起一股憤慨（憤怒與慨嘆），真想要拍桌仔、破口大罵……
　　民進黨陳水扁總統，執政二任八年；如今，蔡英文總統，也已經是第二任，執政一年七個月啦！
　　號稱「本土政黨」，一工到暗，咧嘩「愛臺灣」的民進黨政府，為臺灣母語（台語），做了啥麼「貢獻」？
是安怎‥臺灣母語（臺語），猶原是「正在消失」？
敢是民進黨政府，無所作為？
到底是無心無意，抑是無方無能？
到底是「𣍐做到」，抑是「做𣍐到」？（是「不做到」，還是「做不到」？）
𣍐做到（不做到）者，無心無意也！
做𣍐到（做不到）者，無方無能也！
所以無法度挽救‥「正在消失」的臺灣母語（臺語）？
  　民進黨政府，一年播予「公視臺語台、客語台、原住民台」，若濟經費？
（文化部編列四億元專案預算，補助公視基金會，設立台語頻道，預定二〇一九年中，運轉開播……）
播予學校母語教師，若濟經費？
　　是經費無夠嗎？愛佫加重倍、三倍、四倍，則有夠是無？
抑是政府，甘願開大錢，去向美國，買一堆退時的舊武器，卻是呣甘願下重本，去推展、振興「台灣母語（台語）」？
抑是一寡人，是咧「食閑米，領薪水」，根本無咧做載誌？
抑是「貪污挨錢」，「大餅」分到真正咧做載誌的下骹手人，賰的已經寥寥無幾？
　　赫恁濟年、赫恁濟經費，敢講猶原無法度，「推展、振興母語（台語）」？
開大錢，竟然看𣍐著「成果」，一切親像咧「打水漂」？
石片仔佇水面，一跳一跳，泛起漣漪，真好看——
然後，石片沉落水，水面恢復平靜——啥都無發生過。
赫恁濟年過去囉！猶原抑是咧喊嘩‥「台灣母語（台語），正在消失……」
　　民進黨已經全面執政，幾若年啦！抑無法度推展、振興、挽救「臺灣母語（台語）」；有的人，猶佫咧牽拖國民黨，推行「國語」，如何如何……
一個國家，推行「國語」（共通的語言）——並無呣著！
呣著的是「施行的方式」，推行國語，煞變成「排斥、禁止‥方言母語」，使人反感！（日本殖民統治臺灣，也是推行「日語」為「國語」；甚至鼓吹、獎勵‥台灣人，燒掉家己的公嬤牌，換日本姓名——數想將臺灣人‥刨根斷本。）
　　 只是‥如今社會、校園，有佗一個人、佗一個教師，抑敢「排斥母語、禁止方言」？
　　呵呵！看來，無法度推展、振興「臺灣母語（台語）」，永遠著是「國民黨害的」——只要國民黨（乃至共產黨），存在的一工，「臺灣母語（台語）」，著免想要推展、振興啦！
　　敢真正是按爾？問題是出咧佗位？
　　家己做無好、無做好，呣知反省、檢討家己，改善改進——
煞咧檢討別人、怨怪別人——推卸家己的責任！
　　真正是台灣俗語所謂‥
「阿婆仔𣍐生，牽拖茨邊。
　屎放𣍐出來，牽拖便所䆀。」
　
　　　　　　＊　　　　　　＊　　　　　　＊　　　　　　＊
　
　　為了推展、振興母語（臺語）——
　　有人主張‥臺灣愛設立「台灣母語小學」——
　　阿文「打趣地」回應‥
「看來，呣但愛開「台語小學、客語小學、原住民語小學」！同時‥
　台語也愛分『漳洲腔班、泉洲腔班、廈門腔班、福州腔班、潮州腔班』；
　客語也愛分『四縣音、海陸音、大埔音、饒平音、詔安音、南四縣音』；
　原住民語，也愛開十幾班，專以各族母語為主而教學。
　也愛顧慮『台灣新住民』，開『越南語班、印尼語班、菲律賓語班』……
　按爾生，則是真正的『尊重、公平』；
　各族群，則有法度，復興各族群之母語、腔音啦！」
　　乃至，也有人主張‥愛對「幼稚園」開始，著成立「母語幼稚園」。
　　所以‥幼稚園，也愛依各族群語言，而分園、分班？
　　呵呵！理想歸理想——這敢是真正做會到的載誌？
多族群的國家（非單一族群的國家）、學校，敢真正有法度，分別為各族群、各語言腔調，分別佇各地區，成立專校、成立專班？
　　一個國家，乃至一個學校，會當做的，極加會當做的，著是‥
施行、開放多語言、多腔調教學——
老師若有才調，佇課堂上，聽好用台語、客語、原住民語，乃至英語，
乃至用任何語言，去教任何一科，如‥國文、歷史、社會、數學、……
台語人較濟的所在，以台語為主，其他為輔；
客語人較濟的所在，以客語為主，其他為輔；
原住民較濟的所在，以原住民語為主，其他為輔。
　
　　想起一個小故事‥
　　古早，猶無鞋仔、雨傘的時代——
　　有一個國王，微服出巡，行上街路，結果‥一下仔，去予石仔砧著；一下仔，去踏著狗屎；又佫拄著西北雨，沃𠇺歸身軀，㴷糊糊；一條路，也漉漿漿。
　　國王轉到王宮，著佮王后開講‥
「百姓實在真可憐！
　我佇王宮，塗骹攏舖地磚、舖地毯，𣍐去踏著石仔、踏著狗屎……
　一四界，攏有棚仔，會當遮日、避雨……」
國王想想咧，著對王后‥
「我想‥為了照顧百姓，愛將民間所有的街路，攏舖地毯、搭棚架，
　按爾生，百姓出門行路，著𣍐去予石仔砧著骹；著呣免曝日、沃雨啦！」
　　王后聽了，著笑講‥
「大王！你的想法，實在真好！
　但是‥天下間，有赫恁濟街路，哪有法度，將一條路，攏舖地毯、搭棚架？
　不如‥㑑著教百姓，鉸一塊毯仔，將骹包起來，按爾，著呣驚去踏著石仔；
　鉸一塊布，用架仔撐起來——
　落雨的時陣，㩮咧行，著呣免淋雨；
　日頭大的時，㩮咧行，著呣免曝日。」
　　國王聽了誠歡喜，點頭笑講‥
「我的王后，實在聰明賢慧！這真正是好辦法！」
　　於是‥發明了鞋仔佮雨傘（陽傘）。
　
　　因為無法度，將世界上，每一條路，攏舖地毯、搭棚仔，所以‥發明鞋仔、雨傘，會當予每一個人用，利益每一個人。
（如是‥要用呣用，在於個人。有鞋呣穿、有傘無撐——是個人的選擇。）
　　一間學校，有赫濟族群的學生，敢有赫濟教師、赫濟資源，會當開赫濟班，去滿足每個族群學生的需求？
　　一個老師，面對三、四十幾學生，如何會當照顧著，每一個無共個體的需求？
　　一個演講者，面對來自各方、各族群的聽眾（受眾）——
著算伊會曉講真濟種語言，敢有法度‥
共一句話，台語講一遍、客語講一遍、原住民語講一遍……
（若有洋人、日本人，也愛英語講一遍、日語講一遍。）
去「尊重、滿足」，每一族群的聽眾？
應該是‥儘量用一種共通（逐家攏會當聽有）的語言，去演講著好——
事後，有心、有能者，會當翻做其他的語言、文字，分享予其他族群的受眾。
按爾，則是節省「演講者、聽眾」時間，上好的做法。
　　
　　想要推展、振興母語（台語）——父母家己，著愛「醒覺」、著愛「有心」、著愛「用心」！
　　母語、母語，會當講是「母親教的語言」——
囡仔一出世，老母著佮（教）伊講「母語」，
囡仔自然著會曉講、習慣講「母語」。
　　如果囡仔佇茨裡，已經有會曉講「母語」的「基礎」——
那學校教「母語」，著會當是「進階版」。
　　有的父母會講‥「我家己著𣍐啥會曉，家己的母語，是要安怎去教囡仔？」
　　看來，有真濟父母，以為‥教育囡仔，只要𢱤𢱤去予「學校、老師」著好——按爾，父母家己著無載誌（無責任）啦！
比如‥一個人，呣注重家己，抑是囡仔的健康（生活習慣、飲食等），想講‥
〔反正若是破病，著去病院，予醫生看——著好啦！〕
如是推卸家己應該做、做會到的責任，
破病的後果，也只是「自討苦吃——加開錢、加了工」，去看醫生而已！
　
　　父母無啥會曉，家己的母語？
　　如今，網上有真濟教學影片、教學資料——
怎會呣家己，逐工開一寡時間，去學習咧？
　　人攏講‥「活到老，學到老。」
　　囡仔學習，愛考試、愛檢定——
父母學習，免考試、免檢定——有啥麼「壓力」？
如果你真正關心、重視、在意，家己的母語——
為著囡仔、為著家己母語的傳承，有啥麼「理由」、有啥麼「藉口」，
呣家己去好好學習咧？
　　　　　　　　　　　　　　　　　2021.11.23.二　17:00:00　初稿
　
※本文見民進黨議員唐靜儀《台灣母語正在消失》一文，有感而作。
　
■臺語註解
【母語】ㆠㄜ　ㆣㄧˋ(漳)∥ㆠㄨ　ㆣㄨˋ(泉)
　　　　bor2~1 gi2(漳)∥bu2~1 gu2(泉)
　①凡有親屬關係的語言，都是由一種原始的語言，所發展演變出來的，此原始語言，猶如這些語言的母親，故稱「母語」。如拉丁語，為法語、義大利語、西班牙語、葡萄牙語、羅馬尼亞語等的原始母語。
　②指一個人，最初學會的本民族標準語，或某一種方言。俗稱鄉土語言。
【呣知】ㆬ└　ㄗㄞ　m7~3 tsai1
　⊕不知、不知道、不曉得。{例}呣知䆀。呣知見笑。知抑呣知。
　　呣知去陀位。呣知伊來呣。呣知天地幾斤重。
【佫再】ㄍㄜˋ　ㄗㄞ└ korh4~2 tsai3
　⊕又再、重新又再。　｛按｝「佫」，本作「更」，一般借用「閣、擱、佫」，意思實在難以理解。吳守禮教授，主張「更」字，則是〔ㄍㄜㆷ〕[korh4]的本字，但也新創一字｛各更｝，結合「各」的音、「更」的義。
【每擺】ㆠㄨㆤ　ㄅㄞˋ{文}ㄇㄨㆤ　ㄅㄞˋ(漳)∥ㄇㄨㄧ　ㄅㄞˋ(泉)
　　　　bue2~1 pai2{文}mue2~1 pai2(漳)∥mui2~1 pai2(泉)
　⊕每次、逐次。
【憤慨】ㄏㄨㄣˋ　ㄎㄞ└　hun3~2 khai3
　①憤恨感慨。　②憤憤不平。
【安怎】ㄢ　ㄗㄨㆩˋ　an2~1 tsuann2
　⊕怎樣、怎麼、如何。一般用於詢問原因、方式等，但有時也含挑釁意味。
　　{註}安：何也。俗作「按怎」。
【猶原】ㄧㄨ├　ㆣㄨㄢˊ　iu5~7 guan5
　⊕依舊、仍然。表示狀況不變，持續下去。
【退時】ㄊㄨㆤˋ　ㄒㄧˊ{文}∥ㄊㆤˋ　ㄒㄧˊ{白}
　　　　thue3~2 si5{文}∥the3~2 si5{白}
　①背時、不合時宣。過時、過了盛產期，或興盛期。
　②過氣、不再流行、不再受歡迎。
【無咧】ㆠㄜ├　ㄌㆤ'ㆷ∥ㆠㄜ├　ㄌㆤ'ㆷ
　　　　bor5~7 leh8∥bor5 leh8~0
　⊕沒在、不在。
【載誌】ㄉㄞ└　ㄐㄧ└　tai7~3 tsi3
　⊕記載於誌。謂事情也。引申為工作。
　　{按}載又通戴，故又作戴誌。俗作‥代志、代誌、事誌。
　◎《廣韻》載：事也。《康熙字典》載：又，事也。
　　◇《書．舜典》：有能奮庸熙帝之載。{註}言奮起其功，以廣帝堯之事也。
【下骹手人】ㆤ└　ㄎㄚ├　ㄑㄧㄨ　ㄌㄤˊ
　　　　　　e7~3 kha1~7 tshiu2~1 lang5
　⊕助手、部下。基層、底層工人。
【賰的】ㄘㄨㄣ├　ㆤ├∥ㄘㄨㄣ　ㆤ˙　tshun1~7 e7∥tshun1 e3~0
　⊕剩下的、其餘。
【若濟】ㆡㄨㄚ└　ㄗㆤ├(漳)∥ㄌㄨㄚ└　ㄗㄨㆤ├(泉)／
　　　　ㆣㄨㄚ└　ㄗㆤ├(漳)∥ㄨㄚ└　ㄗㄨㆤ├(泉)
　　　　jua7~3 tse7(漳)∥lua7~3 tsue7(泉)／
　　　　gua7~3 tse7(漳)∥ua7~3 tsue7(泉)
　⊕疑問詞。幾何、若干、多少。{例}若濟人。若濟位。若濟錢。
【赫濟】ㄏㄧㄚˋ　ㄗㆤ├(漳)∥ㄏㄧㄚˋ　ㄗㄨㆤ├(泉)
　　　　hiah4~2 tse7(漳)∥hiah4~2 tsue7(泉)
　⊕那麼多。　或作：赫恁濟、赫爾濟。
【赫恁濟】ㄏㄧㄚˋ　ㄌㄧㄣ└　ㄗㆤ├(漳)∥
　　　　　ㄏㄧㄚˋ　ㄌㄧㄣ└　ㄗㄨㆤ├(泉)
　　　　　hiah4~2 lin7~3 tse7(漳)∥
　　　　　hiah4~2 lin7~3 tsue7(泉)
　⊕那麼多。　或略作「赫濟」。
【敢講】❶ㄍㆰ　ㄍㆲˋ　kam2~1 kong2
　⊕難道說。
【猶無】ㄧㄠ　ㆠㄜˊ　iau2~1 bor5　①還沒有。　②要不然。
【法度】ㄏㄨㄚ'ㆵ　ㄉㆦ├　huat4~8 too7
　①法律、法令制度。　②特指度量衡制度。　③法式、格式。
　④典型、模範。規範、規矩、法則。　⑤辦法、方法、手段。
【無法度】ㆠㄜ├　ㄏㄨㄚ'ㆵ　ㄉㆦ├　bor5~7 huat4~8 too7
　①沒辦法、沒能力。無可奈何。　②喻指生活窮困。
【猶無法度】ㄧㄠ　ㆠㄜ├　ㄏㄨㄚ'ㆵ　ㄉㆦ├
　　　　　iau2~1 bor5~7 huat4~8 too7
　⊕還沒辦法。
【挨錢】ㆤ├　ㄐㆪˊ(漳)∥ㄨㆤ├　ㄐㆪˊ(泉)
　　　　e1~7 tsinn5(漳)∥ue1~7 tsinn5(泉)
　⊕貪污錢財。
【開大錢】ㄎㄞ├　ㄉㄨㄚ└　ㄐㆪˊ　khai1~7 tua7~3 tsinn5
　⊕花大錢。
【看𣍐著】ㄎㄨㆩˋ　ㆠㆤ└　ㄉㄧㄜ'ㆷ(漳)∥
　　　　　ㄎㄨㆩˋ　ㆠㄨㆤ└　ㄉㄧㄜ'ㆷ(泉)
　　　　　khuann3~2 be7~3 tiorh8(漳)∥
　　　　　khuann3~2 bue7~3 tiorh8(泉)
　⊕看不見、看不到、視而不見。
【親像】ㄑㄧㄣ├　ㄑㄧㆧ├(漳)∥ㄑㄧㄣ├　ㄑㄧㆫ├(泉)
　　　　tshin1~7 tshionn7(漳)∥tshin1~7 tshiunn7(泉)
　⊕極像、好像、好比。
【幾若年】ㄍㄨㄧ　ㄋㄚ└　ㄋㄧˊ(漳)∥ㄍㄨㄧ　ㄌㄜ└　ㄋㄧˊ(泉)
　　　　　kui2~1 na7~3 ni5(漳)∥kui2~1 lor7~3 ni5(泉)
　⊕好幾年。
【牽拖】ㄎㄢ├　ㄊㄨㄚ　khan1~7 thua1
　①牽連、牽扯、連累、受累。　②賴人。　③以為。
【無呣著】ㆠㄜ├　ㆬ└　ㄉㄧㄜ'ㆷ　bor5~7 m7~3 tiorh8
　⊕沒錯、沒有錯。
【鼓吹】❷ㄍㆦ　ㄘㄨㄧ∥ㄍㆦ　ㄘㄨㄧ├
　　　　　koo2~1 tshui1∥koo2~1 tshui7
　①宣揚、提倡、倡導。　②吹噓、吹捧。
【公嬤牌】ㄍㆲ├　ㄇㄚ　ㄅㄞˊ　kong1~7 ma2~1 pai5
　⊕祖先牌位。
【抑敢】ㄧㄚ　ㄍㆩˋ　ia2~1 kann2
　⊕還敢。
【按爾】ㄢ├　ㄋㆤ(漳)∥ㄢ├　ㄋㄧ(泉)　an1~7 ne1(漳)∥an1~7 ni1(泉)
　⊕如此、這樣。又作「按呢」。
【出咧】ㄘㄨ'ㆵ　ㄌㆤㆷ∥ㄘㄨㆵ　ㄌㆤ˙
　　　　tshut4~8 leh4∥tshut4 leh4~0
　⊕出在。
【佗位】ㄉㄜ　ㄨㄧ├　tor2~1 ui7
　⊕哪裡、何處、什麼地方。疑問詞。又作「陀位」。
【煞咧】ㄙㄨㄚˋ　ㄌㆤㆷ∥ㄙㄨㄚㆷ　ㄌㆤ˙
　　　　suah4~2 leh4∥suah4 leh4~0
　⊕卻在、竟在、竟然在。
【呣但】ㆬ└　ㄋㄚ├∥ㆬ└　ㄋㄧㄚ├　m7~3 na7∥m7~3 nia7
　①不但、不僅、不只。
　②若不、要不然。{例}呣麼按爾。呣麼你轉去。
【極加】ㄍㄧㆶ　ㄍㆤ　kik8~4 ke1
 　⊕大不了、充其量、最多。又叫「極你多、盡加」。
【會當】ㆤ└　ㄉㄤ└(漳)∥ㄨㆤ└　ㄉㄤ└(泉)
　　　　e7~3 tang3(漳)∥ue7~3 tang3(泉)
　⊕可以。能夠、做得到。{例}會當看。會當買。
【踏著】ㄉㄚˋ　ㄉㄧㄜㆷ∥ㄉㄚ└　ㄉㄧㄜㆷ／
　　　　ㄉㄚㆷ　ㄉㄧㄜ˙∥ㄉㄚ'ㆷ　ㄉㄧㄜ˙
　　　　tah4~2 tiorh4∥tah8~3 tiorh4／
　　　　tah4 tiorh4~0∥tah8 tiorh4~0
　⊕踩到。
【砧著】ㄉㄧㆰ　ㄉㄧㄜ˙　tiam1 tiorh4~0
　⊕皮肉被砭到、扎到。{例}骹底去予石仔砧著。
【棚仔】ㄅㆥ├　ㄚˋ(漳)∥ㄅㆪ├　ㄚˋ(泉)
　　　　penn5~7 a2(漳)∥pinn5~7 a2(泉)
　⊕棚子。
【㴷糊糊】ㄉㆰ├　ㄍㆦ├　ㄍㆦˊ　am5~7 koo5~7 koo5
　⊕濕答答、濕淋淋；濕透了、甚濕貌。同「㴷漉漉」。
【漉漿漿】ㄌㆦ'ㆶ　ㄐㄧㆧˋ　ㄐㄧㆧ└(漳)∥
　　　　　ㄌㆦ'ㆶ　ㄐㄧㆫˋ　ㄐㄧㆫ└(泉)／
　　　　　ㄌㆦ'ㆶ　ㄐㄧㆧ└　ㄐㄧㆧ˙(漳)∥
　　　　　ㄌㆦ'ㆶ　ㄐㄧㆫ└　ㄐㄧㆫ˙(泉)
　　　　　look4~8 tsionn3~2 tsionn3(漳)∥
　　　　　look4~8 tsiunn3~2 tsiunn3(泉)／
　　　　　look4~8 tsionn3 tsionn3~0(漳)∥
　　　　　look4~8 tsiunn3 tsiunn3~0(泉)
　⊕泥濘稀爛的樣子。{例}落雨了，歸條路，漉漿漿。
【時陣】ㄒㄧ├　ㄗㄨㄣ├　si5~7 tsun7
　①時候、場合、時節。{例}開張的時陣。
　②若某某講……{例}呰條的時陣啊，著佫參詳則會用得。你的時陣啊，呰擺較慢來。
【淋雨】ㄌㆰ├　ㄏㆦ├ lam5~7 hoo7
　①被雨淋到。　②大雨。　③連綿雨。
【曝日】ㄆㄚㆶ　ㆢㄧ'ㆵ(漳)∥ㄆㄚㆶ　ㄌㄧ'ㆵ(泉)
　　　　phak8~4 jit8(漳)∥phak8~4 lit8(泉)
　⊕曬太陽。
【開錢】ㄎㄞ├　ㄐㆪˊ　khai1~7 tsinn5
　⊕花錢。
【了工】ㄌㄧㄠ　ㄍㄤ　liau2~1 kang1
　⊕白費工夫。
【家己】ㄍㄚ├　ㄍㄧ├　ka1~7 ki7
　①自己、本身。{例}家己褒。家己開。家己食家己。家己對家己。家己害家己。家己推𣍐顛。家己四兩箢仔無除。家己騎馬，家己喝道。家己擔膎阿咾芳。家己捧屎，家己抹面。家己刣，趁腹內。
　②自然的。{例}家己好去。家己生的。
　③家己人。{例}伊是家己的人。
【逐工】ㄉㄚㆶ　ㄍㄤ　tak8~4 kang1
　⊕每日、每天。
【一寡】ㄐㄧㆵ　ㄍㄨㄚ˙　tsit8~4 kua2~0
　⊕一些、少許。
【囡仔】ㆣㄧㄣ　ㄚˋ∥ㄍㄧㄣ　ㄚˋ　gin2~1 a2∥kin2~1 a2
　①小孩、孩子、兒童、娃娃。{例}囡仔番番。
　②被告對法官，謙卑地自稱我。
【𢱤𢱤去予】ㄙㄚ'ㆶ　ㄙㄚㆶ　ㄎㄧˋ　ㄏㆦ├∥
　　　　　　ㄙㄚ'ㆶ　ㄙㄚㆶ　ㄎㄨˋ　ㄏㆦ├(泉)
　　　　　　sak4~8 sak4 khi3~2 hoo7∥
　　　　　　sak4~8 sak4 khu3~2 hoo7(泉)
　⊕全部推給某某。
　
【屎放𣍐出來，牽拖便所䆀。】⊕改作
　　ㄙㄞˋ　ㄅㄤˋ　ㆠㆤ└　ㄘㄨㆵ　ㄌㄞ˙　，　
　　ㄎㄢ├　ㄊㄨㄚ├　ㄅㄧㄢ└　ㄙㆦˋ　ㆠㄞˋ　。(漳)∥
　　ㄙㄞˋ　ㄅㄤˋ　ㆠㄨㆤ└　ㄘㄨㆵ　ㄌㄞ˙　，　
　　ㄎㄢ├　ㄊㄨㄚ├　ㄅㄧㄢ└　ㄙㆦˋ　ㆠㄞˋ　。(泉)
　　sai2 pang3~2 be7~3 tshut4 lai5~0,
　　khan1~7 thua1~7 pian7~3 soo2 bai2.(漳)∥
　　sai2 pang3~2 bue7~3 tshut4 lai5~0,
　　khan1~7 thua1~7 pian7~3 soo2 bai2.(泉)
　⊕便秘者，大便半天放不出來，卻責怪是廁所設備太爛、太壞。
　　謂人遷怒或推卸責任，而找藉口。意思如‥阿婆仔𣍐生，牽拖茨邊。
　{按}人不知反省自己的問題，反而去責怪他人，其實對自己的進步，一無益處。
【阿婆仔𣍐生，牽拖茨邊。】
　　ㄚ├　ㄅㄜˊ　ㄚ˙　ㆠㆤ└　ㄙㆥ　，　
　　ㄎㄢ├　ㄊㄨㄚ├　ㄘㄨˋ　ㄅㆪ　。(漳)∥
　　ㄚ├　ㄅㄜˊ　ㄚ˙　ㆠㄨㆤ└　ㄒㆪ　，　
　　ㄎㄢ├　ㄊㄨㄚ├　ㄘㄨˋ　ㄅㆪ　。(泉)
　　A1~7 por5 a2~0 be7~3 senn1,
　　khan1~7 thua1~7 tshu3~2 pinn1.(漳)∥
　　A1~7 por5 a2~0 bue7~3 sinn1, khan1~7
　　thua1~7 tshu3~2 pinn1.(泉)
　⊕年老的阿婆，已無法生育，卻責怪是鄰居所害。
　　謂人遷怒或推卸責任，而找藉口。
　
※為何講著「母語」，下骹著括號「台語」？
　因為‥台語人，真正關心的，也只有「台語」——若是講「母語」，是為了顯示「公平起見」，佇臺灣呰個多民族、多族群的所在，𣍐當予人講是‥獨尊「台語」，所以‥也只好摕「母語」出來做文章。
　
■網上臺語教學資源
◇吳守禮臺語注音教學
　小朋友版：http://olddoc.tmu.edu.tw/chiaushin/Tai-BPM-s/Taiphonet-s.htm
　學生版：http://olddoc.tmu.edu.tw/chiaushin/Tai-phonet.htm
◇台羅拼音歌
　https://www.youtube.com/watch?v=QZt43n9NAnI
◇台羅。用注音了解台語台羅 - 用注音了解台語 #1 (2017/6)
　https://www.youtube.com/watch?v=92q7mAF_8EY
◇台羅拼音之音調/變調-台語教學#2 (2017/6/18)
　https://www.youtube.com/watch?v=Uv-OQn1ofW0
　
◇台語兒（網頁外掛軟體。）
　https://baconbao.github.io/TaiwaneseWizard/
　　台語兒，是一隻會台語朗讀的語音精靈，把文字用台語唸給你聽，可以是你學習台語的好夥伴喔！
◇iTaigi 愛台語（台語字詞查詢，可發音。）
　https://itaigi.tw/k/
　
◇維基百科。臺灣方音符號。
　https://zh.wikipedia.org/zh-tw/臺灣方音符號
◇萌典．教育部臺灣閩南語常用辭典
　https://www.moedict.tw/'發
◇吳守禮台語注音字型（中研究製作）
　https://xiaoxue.iis.sinica.edu.tw/download/WSL_TPS_Font.htm
◇王庚春「Web 台語漢文輔助系統」。（失連中！）
　http://dic.taigubun.org/search.php
◇字咍台語字型
　https://buttaiwan.github.io/taigivs/intro.html
　
■附錄　唐靜儀臉書舖文。
◎唐靜儀。《台灣母語正在消失》。2021.11.22.一　15:34:00
　https://www.facebook.com/ticsitsu/posts/4587013138020667
※唐靜儀轉貼「臺語學院」。2021.11.22.一　16:12:00
　https://www.facebook.com/groups/978821105480673/posts/5179871262042282/
　　菜鳥儀靜的議會日記-台灣母語正在消失……
　　國民黨為了永遠執政，想消滅不同族群的人們的母語，為了要搶救正在消失的母語，民進黨政府，應該更加用心！
~~~~~~~~~~~~~~~~~~~~~~~~~~~~~~
■相關文章
◎潘文良《臺灣母語學校》。2021.11.14.日　21:59:00
　https://www.facebook.com/groups/978821105480673/posts/5154093847953357/
◎潘文良《論國語》。2021.11.25.四　11:30:00
　https://mypaper.pchome.com.tw/avun01/post/1380817531
　
============================================================
※本文首發於「新聞台」。2021.11.23.二　20:04:42
◎潘文良《母語咧消失》。2021.11.23.二　17:00:00
　https://mypaper.pchome.com.tw/avun01/post/1380814301
※本文佈告於「臺語學院」。2021.11.23.二　20:07:00
　https://www.facebook.com/groups/978821105480673/posts/5183631598332915/
※本文佈告於「母語教學網」。2021.11.23.二　20:10:00
　https://www.facebook.com/groups/317918739507276/posts/585390236093457/
※本文佈告於「臺灣話資料交流所」。2021.11.23.二　20:13:00
　https://www.facebook.com/groups/434167333333483/posts/4558441994239309/
　
■標籤：憤慨、拍桌仔、國民黨、民進黨、貢獻、閑米、成果、推展、振興、牽拖、推卸、責任、專校、專班、演講