天才拄拍昲光，無偌久，日頭隨就光艷起來。
雖然三月時天毋是日頭花大出的季節，毋過對紀文良來講，順趁今仔日拜一農場歇睏，伊的確愛趕緊採收一寡，通好用伊彼台寶藍色的貨物仔車載去台北。
十分鐘前，紀文良喚猶倒咧眠床頂的牽手起來鬥剪日頭花，伊的牽手黃淑慧目睭半金，用無攬無拈(ne)的口氣講：「文良也，今仔日敢毋是歇睏，你是咧狂啥？」
「剪寡日頭花送來台北，為遐的學生盡淡薄仔心意。」紀文良對嘴應。
「好啦，好啦。」黃淑慧用正手二指佮中指往回挼(juê)目睭，「去台北了後，愛會記得順紲苦勸恁後生緊轉去學校讀冊，毋通閣踮街頭佮人捙跋反(píng)。」
紀文良靜靜聽黃淑慧喃(nauh)這句話，無應甲半聲恬恬行去款傢俬頭仔。
黃淑慧會講遐的話，是因為in唯一的後生紀明燦當咧立法院彼箍圍仔參加學運，做老母的人心內咧毋甘。
紀文良無等黃淑慧，孤一人先來到農場。伊徛佇花田邊，佇大日頭跤看彼片發甲猶無偌茂(ōm)的日頭花海。金黃色的日頭花一欉紲一欉親像咧展笑容，參紀文良相咬目。
紀文良對貨物仔車裡提出一跤大紙箱，用透明黏布糊好勢，一手提紙箱、一手攑花剪，勻勻仔行入花海裡。伊ànn腰，用熟甲有賰的屈勢，沓(ta̍uh)沓仔共(kā)熟黃的日頭花欉剪落來，才閣勻聊仔共花欉貯入紙箱。伊剪落成十欉日頭花的時，伊的牽手黃淑慧嘛到位，徛佇離伊三步遠的所在鬥剪花。
黃淑慧那剪花喙裡那唸：「這陣咧度小月，生理無通交易(ka-ia̍h)。歇睏日毋加睏一時仔，透早走來遮咧食飽換枵。恁父仔囝攏仝一个款啦！」
紀文良據在牽手佇耳空邊踅踅唸，干焦掠伊看一下，無應甲半句話。
黃淑慧喙罔唸、手罔剪，日頭花欉猶原剪甲齊整仔齊整，一絲仔都無落漆。
無偌久，一跤紙箱仔貯甲滇滿滿。黃淑慧共彼箱日頭花mooh到花田邊有蔭的所在，紲落來，每一欉的莖骨攏用綠色軟鐵線共調乎直。了後，閣共十欉日頭花抾做伙，仝款用綠色軟鐵線綁做一綑，一綑綁了紲一綑，花蕊的部分頂下囥無仝向，按呢才袂佔空間。
兩點鐘後，十跤紙箱仔貯滇兩翁仔某拚勢的血汗。彼台寶藍色貨物仔車的後斗齊(tsiâu)是日頭花的身影。紀文良用大條粗索共箱仔固定好勢，順紲用手ńg拭滴踮額頭的重汗。伊坐入駕駛座，發動貨物仔車。
「文良也，半路車若駛了忝，愛會記得停落來歇睏，啉一喙仔茶。」黃淑慧那講那行向紀文良。
「知啦。」紀文良面笑笑共車駛起行。
今仔日，紀文良無按算走高速的，伊對這个倚海的中部小鎮沿濱海公路上北。這時，日頭光那來那猛，毋過空氣裡透濫風絲仔，予伊感覺不止仔舒爽。濱海公路車無濟，伊車速干焦60km，久久仔才有一台車對伊邊仔經過。伊享受這段百外公里難得寧靜的路程，沿那駛車沿那回想24冬前三月時天的記智。
彼時，紀文良佇北部一間國立大學讀企業管理系，閣賰三月日就聽(thìng)好卒業。就佇伊當咧思考未來路向的坎站，因為室友的一句話，予伊無因無端絞入影響台灣未來發展的「野百合學運」。
「文良也，稍等咧有幾落位同學欲做陣去中正廟扭白布條仔抗議，欲參阮來去無？」3月16彼日早起，當咧宿舍食早頓的紀文良，予蹛佇仝寢室的蔡友志問這句話的時，一粒包仔拄好咬咧喙裡。
「蔡友志，恁社會系的足愛管閒仔事，是欲去抗議啥？」紀文良共一喙包仔吞落了後問。
「國民大會彼七百位代表透世人毋捌改選，袂輸七百个皇帝硩(teh)踮咱頭殼頂。阮就是欲去抗議遐的食了米的米蟲，向望會當早日廢除國民大會，完成總統直接民選的目標。」蔡友志應。
「總統民選？你敢會傷過頭樂觀？」紀文良憢(giâu)疑。
「咱若無去做，哪會知影袂成功？紀文良，我看你平常時做人誠熱心，毋才會招你鬥陣來去做這項有意義的代誌。毋通閣躊躇矣。」蔡友志用肯定的口氣對紀文良講。
「好啦。」紀文良共最後彼喙茶啉了，考慮兩秒鐘隨答應。
In九个仝校的學生自按呢走去蔣介石紀念堂靜坐抗議、扭白布條仔。
彼下晡，有一陣社運人士佮媒體記者聽著風聲走來現場鬥相挺。彼暝，冷風熾熾顫(tsùn)，眾人佇寒風裡度過驚疑、長躼躼的一暝。
隔轉日，因由媒體報導，到甲黃昏時天走來參與靜坐的學生超過兩百人。仝時，佇靜坐學生四箍輦轉支援的群眾嘛有二千人。各種援助物資對每一角勢不斷送來，熱心人士的助贊親像長流水仝款。Tshuā頭學生看這款扮勢，知影抗爭的規模的確會愈絞愈大陣，彼盈暗隨組織七人決策小組。
初開始，紀文良並無佇決策小組名單內，伊擔當物資管理的工課(khang-khuè)。佮伊仝組的學生攏總十外人，這个由各校學生組成的物資發放隊伍，以伊成做組長，所有相關的穡頭攏由在伊指揮、拍派。
3月18，廣場的學生已經幾落千人。彼日，決策小組召集各校代表開校際會議，會中決議四項訴求：解散國民大會、廢除動員勘亂時期臨時條款、召開國是會議、提出民主改革時間表。現場學生佮群眾聽著決策小組宣讀這四項訴求，噗(pho̍k)仔聲、喝咻聲佇闊莾莾的廣場裡無停迴響。
3月19暗暝，校際會議通過「野百合」成做這擺學運的精神象徵。
3月20，廣場的學生超過五千人。決策小組決議增加五名決策委員。紀文良因由彼幾日優秀的表現，予人提名選做第二波決策委員。
紀文良加入決策小組了後，所會當接觸的層面並(phīng)進前加較闊。嘛因為按呢，伊才有濟濟機會佮讀電影科的許心蘭接觸。
許心蘭佮紀文良相像，攏是第二波入選的決策委員。伊彼陣是專三學生，當咧思考畢業製作的專題，學運第二工伊對媒體知影消息，就招同學扛一台攝影機拚來抗爭現場，而且決定欲以這擺學運的紀錄片成做伊的畢業製作。
紀文良成做決策委員隔轉日，拄經由國大代表選出的總統，佇彼下晡接見五十外名學生代表，雙方達成某種共識，學運自按呢佇第七日收束。
許心蘭目睭重巡大蕊，個性不止仔活骨，彼陣，伊頭鬃留到肩胛頭，是紀文良佮意的典型。自熟似許心蘭了後，紀文良的眼光不時攏牢(tiâu)佇伊身軀頂，許心蘭的目睭並攝影機鏡頭閣較利，當該然看迵(thàng)紀文良的心思。In雙人佇眼神交流的波動裡，透過使目尾的暗流，共真心暫時寄佇三月的風裡。一直到甲對廣場撤退前一暝的夜靜深更。
彼暝，規个廣場氣氛參前幾暝小可仔無仝。雖然，閣過無幾點鐘，逐家就會當對這个予in供體做「中正廟」的蔣介石紀念堂撤退，轉去家己學校繼續原底的學業。毋過，對紀文良來講，伊的心內煞有一種講袂出喙的稀微。
半暝三點，眾人早就毋知睏甲第幾殿去，就準講是睏袂去的人，嘛只有靜靜倒咧塗跤攑頭看天。
紀文良驚去吵著睏佇邊仔的同伴，伊輕略仔peh起身，勻勻仔徙振動伊的跤步，沓沓仔行來國家戲劇院彼爿頭。想袂到，伊拄欲peh起頂面平台的時，煞看見許心蘭肩胛頭扛攝影機咧收集廣場最後一夜的影像。佇微微光影裡，許心蘭親像一身舞動風絲仔的美麗蝴蝶。伊一坎(gám)一坎慢慢仔peh，peh到頂面平台，當欲伸手對後面搭許心蘭的肩胛頭，許心蘭拄好越頭參伊四蕊目睭相咬。許心蘭共攝影機捾咧正手，伸出倒手二指囥咧喙唇皮頂面。紀文良頕(tàm)頭表示理解，綴許心蘭尻脊後行到上倚內角的石柱邊。攝影機囥踮石柱後，許心蘭主動行倚紀文良，佇這个夜蟲已經睏落眠的半暝，伊的目睭猶原金噹噹，對紀文良射出一道愛意。一目nih，兩片青春的喙唇糖甘蜜甜，共月娘唚(tsim)做雙爿圓。夜愈來愈深，in熱烈的愛意一絲仔一絲鑽入對方的深情內裡。
倚晝，紀文良共貨物仔車駛到中山南路、青島東路口。路口物資供應站囥規排罐裝水，一箱一箱疊(thia̍p)甲齊整仔齊整，疊到胸坎遐懸，看過去袂輸賣場咧疊貨相像。站裡志工看著貨物仔車，隨差派三名青年出來鬥mooh貨。眾人一看著紙箱仔貯日頭花，隨个仔隨个攏喙笑目笑，大聲喝講：「哇，是日頭花！」
「各位同學，較停仔敢會當拜託派幾位志工，佮我做伙共日頭花分予現場民眾？」紀文良共最後一箱日頭花疊好勢了後，對站裡志工按呢講。
「無問題。先生，你一逝(tsuā)路載遮爾濟日頭花來，腹肚應該枵矣。來，這个便當予你，先食飽才有氣力通做穡。」徛佇紀文良面頭前的是一位頭鬃留到肩胛頭的查某囡仔，伊的皮膚略仔咖啡彼款健康的色緻，兩蕊重巡的大目睭親像會講話。
「小姐，勞力。」紀文良伸手接過便當，看著對方胸前掛一个大大的名牌，頂面寫「志工許春杏」。
「歹勢，我先來去共貨物仔車停好勢，稍等咧才閣來。」紀文良對許春杏講。
「這罐茶予你。」紀文良另外一支手接過許春杏捾予伊的罐裝水，向對方頕一个頭。
貨物仔車佇就近幾條路踅欲成十分鐘，誠無簡單才予紀文良揣著一个停車位。伊坐入駕駛座，共冷氣捘(tsūn)開，踮內底食便當。伊那食那回想，拄才徛佇面頭前彼位許春杏，明明是頭擺見面，哪會感覺熟似面熟似面？
便當食煞，紀文良行轉去物資供應站，真拄好閣搪(tn̄g)著許春杏。物資供應站工課路ta̍p-ta̍p-tih-tih，志工隨人手頭攏有代誌愛發落。落尾，干焦許春杏陪伴紀文良，用一台手捒(sak)車載兩箱日頭花，行入青島東路抗爭現場分予民眾。紀文良踮後面捒車，許春杏佇頭前共花分予民眾，沿那分花沿那向對方頕頭講：「多謝你，辛苦矣。」
行無到五十公尺，舞台頂一位看起來六、七歲的查某囡仔當咧唱歌：「天色漸漸光，咱就大聲來唱著歌，一直到希望的光線，照光島嶼每一个人。天色漸漸光，咱就大聲來唱著歌……」彼位綁兩條頭鬃尾仔、目睭重巡大蕊的查某囡仔，唱歌的台風不止仔在穩，伊的囡仔音聽佇紀文良耳空內袂輸天使之聲。
「許小姐，舞台頂彼个查某囡仔是啥物人，哪會走來學運現場唱歌？」紀文良好玄問許春杏。
「Uncle，喚我的名春杏就好。」許春杏掠紀文良看一下，「伊號做白芯羽，對南投來，佇邊仔彈gí-tah彼位是伊的爸爸，in是四界走唱的街頭藝人。」
「春杏，怹爸仔囝有影誠感心。」紀文良那講那共車捒進前。
「是啦。」許春杏嘛綴咧行進前。
行到半中途，搪著幾落間電視台記者，逐家相爭倚過來翕in兩人咧分日頭花的畫面。落尾，紀文良佮許春杏量約成十分鐘就共兩箱滇滇的日頭花分甲空空。
花分了，紀文良共兩跤紙箱仔拆開、鋪平，囥咧手捒車頂面。欲轉物資供應站路裡，許春杏展現伊活骨的個性，徛踮手捒車頂面跤弄手弄，予紀文良咧後面捒。許春杏激一个詼諧面，笑笑仔思奶(sai-nai)：「Uncle，歹勢予你捒車。」啥知，話講煞無到半分鐘，許春杏一時失覺察踏無在，規身人對手捒車滑出去，紀文良看這个扮勢無顧一切傱(tsông)倚去，佇許春杏跋落塗跤進前，伸手共伊攬牢牢。紀文良雖然保護許春杏無受傷，毋過家己正手的手後曲(khiau)煞擦破皮流血珠。許春杏驚一下面仔青恂(sún)恂，直直共紀文良會失禮，「Uncle，緊轉來物資供應站，我替你糊藥仔。」
佇這段成百公尺的路裡，許春杏主動向紀文良提起，伊自出世就無老爸，二十外冬來參老母相依為命，誠無簡單讀到大學欲卒業。拄才，紀文良為著一个初熟似的查某囡仔，無顧家己危險出手相救，予伊誠感動，嘛頭一擺感受老爸的溫暖。紀文良雖然對許春杏的身世淡薄仔好玄，毋過驚問了過頭會傷著對方，干焦搭伊的肩胛頭小安慰一下。
彼暝，紀文良參許心蘭踮佇國家戲劇院外面柱仔邊的戲齣，只有稀微的天星佮月娘知影。深夜露水滴，天光了後，隨人包袱仔款好各自去。
學運收束。得欲完成學業的雙人，愛情煞親像火星潦原，一日to̍h過一日。
彼當陣，無快速的捷運電車通好坐。毋過，彼台50仔顛倒予in的愛情加溫。一禮拜至少有三日，紀文良會對伊徛居的所在，騎十外公里路，通過一座大橋傱來揣許心蘭。坐佇Oo-tóo-bái頂，雙人身貼身，風絲仔吹過in青春的肉體。In做陣軁(nǹg)過算袂清的大街小巷，踅過偌濟愛人仔踏跤到的所在。有時陣，許心蘭愛趕畢業製作，無方便陪綴tshit迌，紀文良嘛是百般體諒，載許心蘭四界去採訪，補翕(hip)一寡畫面，甚至偷偷仔綴伊入去剪接室絞片。看在外人眼內，紀文良顛倒較成熱戀中女性的角色。
「文良，你定定走來揣我，敢毋驚畢業論文寫袂了？」許心蘭毋但一擺按呢問。
「心蘭，妳毋免煩惱，我會準節。」紀文良總是按呢回答。
彼年五月尾，許心蘭的紀錄片參電影科其他同學的畢業製作，同齊佇文化中心展覽一禮拜。開幕式彼早起，紀文良穿一軀烏色西裝、結一條紅色tsiû-tsiú，看起來喜氣十足。毋知的人，絕對掠準伊是這場展覽主角之一。紀文良mooh一大束百合花送予許心蘭，佇輕柔的音樂聲裡做陣參加雞尾酒會。自頭至尾，這對愛人仔成做眾人注目的焦點。
紲落來，紀文良暝日趕伊的畢業論文，補紩(thīnn)進前延tshiân的進度。所致，有一段日子無法度關顧許心蘭，一直到甲伊順利卒業。彼日，伊猶原參過去相像，歡歡喜喜騎Oo-tóo-bái來許心蘭的稅厝徛相揣。想袂到，樂暢的心煞予無情的運命潑一桶冷水。厝頭家講許心蘭頂禮拜就搬走矣，毋知影伊搬去佗位？紀文良揣著許心蘭蹛佇就近的同學，嘛探聽袂出伊的下落。
這个打擊共紀文良大學卒業的喜氣撼(hám)甲碎骨分屍。了後，伊逐日有體無魂四界走揣許心蘭，一直到兩月日後入營做兵為止。
春天後母面，喝變就變。本底炎天赤日頭的氣候，過晝無到兩點鐘久，大雨親像水沖(tshiâng)雄雄捙桶倒，予人閃袂離。對抗爭現場彼一、兩萬个怒氣衝天的群眾來講，這場大雨檢采會當淡薄仔消敨(tháu)逐家腹內的怒火。
毋過，對紀文良來講，轉去厝裡的路百外公里遠躼躼長。這款落大雨的天氣，對駛遠路車的人來講，的確是不止仔大的折磨。拄才，欲離開物資供應站的時，雨已經落甲誠粗，許春杏建議紀文良先覕(bih)入站裡避雨，紀文良感謝伊的好意，毋過堅持欲佇雨中離開。許春杏攑一支雨傘借紀文良，用十分溫柔的口氣講：「Uncle，駛車愛細膩哦。」紀文良笑笑頕一个頭，隨展開雨傘行入雨裡。
雨佇高速路頂乒乒乓乓，袂輸千軍萬馬對面前傱來。眼前視線一片雺霧，紀文良集中精神專心駛車，共雨鑢(lù)仔拍振動予頭前車窗保持通光。車過苗栗地界，雨才沓沓仔斷點。閣過半點外鐘，伊順利轉到厝裡。
紀文良共被雨水潑澹去的衫褲褪掉，換一軀焦鬆的T-shirt佮短褲節仔，the踮客廳膨椅頂。伊將遙控器揤(tshi̍h)到新聞台，捘來捘去攏是咧報昨暝鎮暴警察佇行政院掠人、摃人的畫面。伊那看心情那齷齪(ak-tsak)，規氣共電視禁掉。
透早，天拄拍昲光的台北街頭。
幾落百名民眾坐踮塗跤，手股佮手股挽牢咧。一陣鎮暴警察逼倚來，有的攑盾牌剁民眾的跤腿，有的用警棍看著人就撼，無咧管汰對方濟歲人抑是查某囡仔。一時的(ti̍k)，哀聲慘叫，血水一港一港霧出來。一目nih，水龍車開始濺(tsuānn)水，濺出來的水袂輸水沖遐爾大港，大港水沖共一个查某囡仔的衫褲濺甲強欲離身，伊大聲喊喝，水龍車繼續濺無欲停睏。予警棍撼甲血sai-sai的紀文良，無管家己身軀痛疼，傱倚彼个查某囡仔身邊欲保護伊。當伊看著查某囡仔面容的時煞驚一趒，原來是佇物資供應站熟似的許春杏。
「春杏，危險，緊走！」紀文良大聲喝。
「春杏，危險，緊走！」紀文良予家己的喝聲驚精神，規个額頭全全汗，致覺拄才咧眠夢。
「文良也，今是啥物代誌？睏一个晝予你吵吵精神。」黃淑慧對房間仔底傱出來，目睭猶閣沙微(bui)沙微。
「淑慧，歹勢，我拄才咧陷眠。」紀文良聲音放柔軟。
「無代誌就好。我入門的時，看你忝甲倒咧膨椅，就去挔(hiannh)一領薄被蓋踮你身軀頂。今，天嘛暗矣，我來去煮暗頓。」黃淑慧行對灶跤入去，行一半踅翻頭，「著啦，你這逝去台北，敢有見著恁後生？」
「我無佮明燦聯絡。」紀文良攑頭掠黃淑慧看一下，「代誌無閒煞就落大陣雨，而且…」紀文良共貼紗布的手後曲攑懸。
「哪會去一逝台北煞著傷轉來？」
「我無細膩跋倒啦。」
這時，日頭落山進前的光線迵過門窗，光影拄好照佇兩人之間，形成一幅明暗對比的特殊畫面。
退伍了後，紀文良佇一間貿易公司食頭路，日子過甲平順平順。
落尾，伊佮公司會計黃淑慧談戀愛，一冬後組織小家庭，閣翻轉年後生紀明燦出世。
六冬後，丈人過身。紀文良參牽手黃淑慧轉去外家接手經營農場，一切按頭做起。十外冬來，兩翁仔某對啥物攏毋捌，做到這陣生理逐冬穩定成長。
便若看著辛苦栽種的日頭花成做規片花海，佇日頭跤展現旺盛的生命力，紀文良的心情就感覺嶄然仔快活。
日常生活的現實，紀文良不得不認真去面對。日出日落，花開花謝，春夏秋冬永遠攏仝款。毋過，佇伊的心肝穎(ínn)仔裡，有一个形影久長袂散，彼(he)就是舊愛人許心蘭。
二十外冬來，紀文良不時會想起無聲無說恬恬離開的許心蘭。講透底，思念閣會當按怎？伊早就有一个猶算幸福的家庭，只有暗暗將遺憾藏踮心內。
其實，紀文良毋是全然無許心蘭的消息。只不過遐的消息攏是對媒體頂面看來的。「許心蘭」三字名上捷出現的所在是報紙文化版，因為伊到今攏無偏離學生時代的專業，這幾冬來猶原堅持咧翕紀錄片，為社會上濟濟弱勢族群發聲。伊的紀錄片毋但一擺入圍金馬獎，甚至有一部以越南新移民女性成做主角的紀錄片，佇頂年得著國際影展的人道主義獎。
看著許心蘭遐爾堅持猶閣有伊的成就，紀文良只有欣慕佮欽服。
「遮爾濟冬來，毋知敢有人咧照顧伊？」這是紀文良上蓋掛心的代誌。
仝彼禮拜六透早，紀文良趕佇牽手睏醒進前，靜靜留一張字條仔佇客廳桌頂。
紀文良簡單幾筆寫了，就騎鐵馬到車頭坐海線火車去台北。離開厝無到十分鐘久，黃淑慧就peh起床。伊四界揣無翁婿形影，過一時仔，才佇客廳桌頂看著紀文良留的字條仔。伊手面洗好，入去灶跤煎一粒卵包，配一甌白茶準做早頓。行出門喙，看著寶藍色貨物仔車靜靜tshāi佇埕斗，黃淑慧喃一句：「文良也這回哪會無駛車？」紲落，穿靴管、戴葵笠，款傢俬頭仔行往農場。
兩點外鐘後，紀文良行出台北車頭。日鬚薄薄仔，無風無搖。伊沿忠孝西路行到中山南路正斡，無兩步路隨到青島東路口。伊探頭看對物資供應站內面，無看著許春杏。越頭，看見中山南路安全島頂面，掛一排寫「台灣獨立建國」的大面布旗。向前行，行入立法院門口埕埕斗，現場兩頂布帆tshāi踮遐，布帆內面排紅色塑膠椅仔，量約幾落十位民眾坐佇頂面聽演講。
「各位鄉親，阮公投護台灣聯盟會一直踮這个廣場守護，一切聽議場內面的學生指揮……」手攑mái-khuh講話的是一位五十外歲查甫人，伊體格中範(pān)，穿一領烏底白字T-shirt。紀文良聽伊講遐的話，對演講者佮伊所屬的團體有一種講袂出喙的好感。
演講者後面，徛一排手扞(huānn)藍色盾牌的警察，對in面裡看袂出任何表情。
坐一搭久仔，紀文良感覺腹肚枵枵。伊行向另外彼爿門，看著公投盟志工佇邊仔布帆裡咧招呼鄉親食早頓。桌頂囥一堆包仔、饅頭猶閣有豆奶。伊認為家己初來這个廣場，猶未出著半點氣力，歹勢取用遐的物件。伊行出外面人行步道，成十公尺遠有一个擔頭。紀文良共頭家娘點一份杏仁茶配油炸粿，頭一喙杏仁茶滑入嚨喉，伊目睭瞌起來感受內中的芳醇。佇這个學運抗爭街頭，會當啖(tam)著這款囡仔時懷念的滋味，有影予伊料想袂到。
早頓食煞，紀文良翻頭欲行往物資供應站，行無幾步路，看著一位婦仁人咧賣電繡的日頭花，繡工看起來不止仔幼路，有共日頭花的樣相佮精神展現出來。
「人客，你看。阮這日頭花有三款無仝功能，有挾的、有鉼(pín)的，閣有這款樹奶束仔的，三蕊才賣一百箍爾。一款提一蕊好無？」頭家娘詳細共紀文良紹介。
「頭家娘，就照妳的意思。」紀文良對褲袋仔撏(jîm)一百箍出來，交關三蕊小型的日頭花。
了後，紀文良行到物資供應站。這回，伊真正搪著許春杏。
「Uncle，你哪有閒閣來？」看著紀文良出現，許春杏歡喜帶surprise的表情。
「我提雨傘來還妳，真多謝。」紀文良對揹仔底提出雨傘，交予許春杏。
「強欲袂記有借你雨傘。Uncle，你手後曲的傷敢有較好？」許春杏行倚看紀文良的傷痕。
「已經堅疕(phí)，好欲離矣。」紀文良面帶笑意，「春杏，我拄才佇頭前看人咧賣這電繡的日頭花，繡甲誠媠，一蕊送妳。」
「有影誠媠。」許春杏接過紀文良手裡的日頭花，提倚目睭前詳細瞋(tsîn)，「Uncle，你替我挾踮頭毛頂懸好無？」
紀文良共細蕊日頭花閣接過手，好禮仔挾踮許春杏頭毛頂。
「Uncle，請小等我一下，」許春杏行入站裡，挔一領烏色T-shirt出來交予紀文良，「你送我日頭花，我送你這領T-shirt。你看，『自己國家自己救』，是這擺學運上蓋衝(tshìng)的標頭。」
「春杏，這領T-shirt我足佮意。明仔載行上凱道的時，我會穿咧身軀頂。」
紀文良知影許春杏工課無閒，共T-shirt囥入揹仔了後，就向伊告辭。
「著啦，」紀文良行兩步閣翻頭，「舊曆3月23媽祖生，阮遐咧鬧熱會辦桌請人客。春杏，時到妳若有閒才來予阮請。這是我的電話番佮地址。」
許春杏接過紀文良的字條仔，隨翻頭去無閒伊的工課。
前一暝接近翻點彼陣。兩台改裝過的Oo-tóo-bái出現佇中山南路立法院門口埕外面，phǹg-phǹg叫的聲音引起眾人注意。一位拄好對遐經過的中年女性手提小型攝影機起來翕，Oo-tóo-bái頂彼兩位穿烏衫的少年仔看著，操一句：「幹，妳是咧翕啥潲(siâu)？」其中一人落車傱倚去搶中年女性手裡彼台攝影機，中年女性共攝影機mooh牢咧，袂輸咧保護家己的囡仔相像。毋過，伊的氣力無少年仔遐爾強猛，少年仔出手粗殘，共伊彼台攝影機搶過手摔咧塗跤，佇搝(khiú)搝搦(la̍k)搦當中，伊的身軀出現幾落搭傷痕。
一位人中留兩撇喙鬚的中年查甫人代先傱倚來。啪！對少年仔喙phé共揌(sai)落，少年仔雄雄予人揌這下，雙跤險險仔徛袂牢地，伊嘴歪目tshu̍ah嗆聲：「死老猴，你tshit迌佗位的？好幹莫走。」
「我艋舺芳明館，食凊糜當等你。恁遮的外籬仔掛的臭術仔，共恁爸聽乎好，若敢閣走來欺負善良的台灣人，絕對予恁鮮尺仔鮮尺，毋信才試看覓。」
隨後趕到彼幾位民眾聽著中年查甫人遮的話，逐家攏拍噗仔鬥贊聲。
這位體格武頓的查甫人話講煞，行過去扶受傷坐踮塗跤的中年女性。
彼兩位少年仔趁這个坎站Oo-tóo-bái騎咧，親像揜(iap)尾狗溜旋。
「小姐，妳有要緊無？我tshūa妳來去予醫生看。」
「先生，多謝你見義勇為，小可仔傷爾。」
兩位警察行倚來，其中一人出喙問：「這位女士，妳有欲告彼个少年仔無？」
「警察先生，我有抄著其中一台Oo-tóo-bái的車牌。」一位二十外歲款的查某囡仔共字條仔交予警察。
紀文良佮許春杏相辭了後，提出伊拄才買的細蕊日頭花，鉼佇siat-tsuh頂面。了後，沓沓仔行往毋捌踏跤到的濟南路現場。對中山南路斡過濟南路，伊看著正手爿頭到tshāi兩座流動便所，男男女女排兩列聽候解放。流動便所斜對面是一个充電站，幾落位少年家提出智慧型手機佮iPad咧充電。充電站邊仔囥一台大型飲水機，伊對揹仔底提滾水罐出來入茶。飲水機倒手爿平台頂面兩跤紙箱仔貯幾落束日頭花，紀文良知影這是伊幾工前分送日頭花的效應。彼日，幾落間電視台有翕著伊參許春杏咧分日頭花的畫面，自按呢，媒體共原本慣勢稱呼的「318學運」改換做「日頭花學運」。
濟南路現場參青島東路彼爿相像挨挨陣陣，看過去量約九成以上攏是學生款的少年人。紀文良行往頭前大舞台就近的人行道頂面，揣一跡有蔭的空位並踮壁邊，看現場人來客去，聽舞台頂演講者無私分享。中晝，伊佮逐家仝款食「戰地廚房」志工用愛心煮的泡麵，想袂到，佇學生佔領的街頭食極普通無比的泡麵，會予伊食甲想欲流目油。食飽，紀文良共紙碗佮竹仔箸提去予資源回收志工做糞埽分類。了後，伊勻勻仔佇現場散步當做飯後運動，行一睏感覺忝忝，閣倒轉去原底的所在，並踮壁邊目睭放瞌瞌，無偌久，煞真正坐甲睏去。
紀文良目睭擘(peh)金的時，日光有較軟略。伊徛起來尻川拌拌咧，紲落，敲手機仔予佇議場內面的後生：「明燦，我這陣人佇濟南路現場，你踮內面好無？」
「爸，你免煩惱啦，我佇遮真好。」紀明燦應。
「我明仔載佔領凱道了才會轉去。」
「爸，我欲閣無閒，先掛斷哦。」
掛斷電話，紀文良看手錶仔已經五點捅(thóng)。伊一步一步慢慢仔行向青島東路頭，欲去彼間懷念的老店「蜜蜂咖啡」。伊較久攏會記得，頭擺來這間店是24冬前的今仔日，野百合學運收束了後一禮拜，嘛是愛人仔許心蘭生日。彼陣，伊手頭無偌冗剩(liōng-siōng)，除了請許心蘭來這搭食飯、啉咖啡以外，干焦送對方一本粉紅色緻的日記簿。行到位，發現學運期間猶原有咧營業，紀文良輕輕仔捒開門，伊會認得二十外冬來店內裝潢無啥改變，仝款遐爾樸實款。伊揀內底角彼个予伊懷念的座位，頭家娘拄行倚來點餐，店門閣予人捒開，行入來的是留海結仔頭的許心蘭。雙人相咬目，互相攏愣(gāng)一秒鐘，許心蘭大範行向紀文良的座位，順紲共頭家娘講：「阮是朋友。」
「許導演，素食炒飯。」頭家娘講，許心蘭頕頭。
「我點一份宮保雞丁。」紀文良講。
「我食全素已經六冬外矣。」許心蘭坐落了後的頭一句話。
「心蘭，妳的手哪會全全傷？」紀文良看著許心蘭雙手貼紗布。
「昨暝佇中山南路立法院頭前，予一个外籬仔掛的少年仔拍的。」
「有影無法無天。」紀文良不止仔受氣。
「文良，我捌佇報紙頂面看著關係你的報導。你共一座農場經營甲遐爾成功，實在真替你歡喜。」許心蘭轉換氣氛、話題。
「我嘛知影妳是一位誠有成就的紀錄片導演。」紀文良代先共水杯提佇手裡，「來，我祝妳生日快樂。」雙人水杯叩水杯。
過一時仔，頭家娘共in兩人的餐點做伙捀(phâng)來。紀文良佮許心蘭飯那食話那講，無偌久就恢復以早的熟似感。
「心蘭，妳當年是按怎不告而別？」許心蘭心內有數，知影紀文良會按呢問。伊全然無掩崁，一睏頭共囥踮心內二十外冬的秘密講出來。
「文良，人佮人鬥陣攏是緣份。野百合學運予咱兩人熟似，多謝你陪伴我度過彼段青春的歲月。彼陣，咱雖然無閒，毋過真捷鬥陣，嘛因為按呢，予我看清楚咱兩人無適合繼續做伙。我是一个愛自由無佮意束綁的人，你的過度關心，定定予我感覺強欲袂喘氣。所以，我選擇恬恬仔離開。按呢講，檢采對你較無公平。」許心蘭啉一喙茶繼續講：「有一項代誌，本底拍算永遠囥踮心內，既然有緣閣相見，就講予你知。其實，彼陣我的腹肚內已經有你的囡仔。」
「心蘭，失禮，原諒我對恁母囝的虧欠。」紀文良顯露痛苦的表情，「你敢會當共我講，咱的囡仔是查甫抑查某？號做啥物名？」
「文良，你有一个美滿的家庭，按呢就有夠矣。」許心蘭口氣平和。
「遮爾濟冬來，毋知敢有人咧照顧妳？」這是紀文良上蓋掛心的代誌。
暗頭仔，雄雄落一陣雨，落佇學運抗爭的台北街頭，嘛落佇紀文良的心肝穎仔。
欲走的時，紀文良共彼蕊掛樹奶束仔的日頭花送予許心蘭。
隔工中晝，日頭射出強猛的光線，規个台北街頭親像日光大道。
紀文良換穿許春杏送伊彼領印「自己國家自己救」的烏色T-shirt，參五十萬人做陣佔領凱道佮周邊幾落條街路。
暗頭仔，紀文良軁過人kheh人的人海，對凱道接中山南路行轉濟南路現場。無偌久，電影《KANO》導演馬志翔徛上台頂，唸讀魏德聖為學運贊聲的批信。紀文良感受舞台頂這位少年家高戕(tshiâng)大漢的身影背後，有一粒謙卑的自信心。伊按算明仔載農場歇睏日，欲招牽手去市區看這齣青年野球員奮鬥的電影。
坐踮海線火車裡，紀文良的腦海內無停滾絞下晡佔領凱道濟濟熱情畫面，猶閣有前一暗參許心蘭面會的點點滴滴。
舊曆3月23，日頭花學運收束12工後。
透早，許春杏就peh起床，手面洗好，歡頭喜面咧捋(lua̍h)頭毛。
日鬚薄薄仔對窗仔門射入伊的房間。
「春杏，妳遮gâu早欲去佗位？」許心蘭行入許春杏房間探頭問。
「媽，學運彼陣我熟似一位Uncle，今仔日in遐媽祖生欲去予伊請。妳看，就是伊。」許春杏拍開手機仔，頂面是一張伊佮紀文良做伙翕的相片。
「愛會記得較早轉來哦。」許心蘭這句話講煞，假無意行出許春杏房間。
──2014.6.10寫佇赤崁南門仔
2014第四屆台南文學獎台語小說佳作
2015.1《台文戰線》第37號
文章定位：
