「學師仔」佮「一萬小時理論」
咱台灣較早有真濟工藝攏用「學師仔o̍h-sai-á」的方式傳承落來的。逐家所知的木匠，剃頭，做頭毛，做土水等等攏總是。傳統工藝譬如鹿港有名的大、小木作、細木作、鑿花、粧佛，台南府城的織繡，閣有做香的，台灣出產竹仔就有竹編和竹製的工藝等等。
通常的「學師仔」做法是：「學師仔」的人攏是佮師父蹛做伙，食穿、生活攏靠師父，是無付工錢的。有的行業有付一點仔所費，嘛有的行業佇學師仔的一段時間以後，會當鬥做工課：譬如學剃頭共人客洗頭就會付工錢，付偌濟就由是師父按照伊工夫的程度付「師父工錢」的幾成錢。
人講「拜師學藝」，照講應該就愛付予師父「學費」，親像現此時去補習班補習著付補習費仝款。毋過，佮師父蹛做伙就加減鬥做雜差仔工課，譬如做師父的助手，掃塗跤，鬥窮物件，鬥𤆬囡仔等等，就用遮的工錢當做予師父的學費，應該是一个合理的做法。
通常學師仔是三年四個月出師。這个「三年四個月」是按怎來的？我一直揣無真好的答案，毋過佇1990年代看著「一萬小時理論」才體會著咱先人的智慧。這个「一萬小時定律」就是：管你是啥人，經過一萬小時的練習就能成做某領域的專家。這个「一萬小時定律」是任何一項工藝，技術攏足合用的。咱來算看覓，三年攏總是1095工，一工24小時扣著睏佮生活上必要的時間，一工共算10小時就超過1萬小時。
學師仔是逐工攏綴佇師父邊仔，學師父的工夫，嘛學師父的行動佮行為。就是人講的「身教」。同時師父佇邊仔隨時就會共你指正佮指導。當然拄著「工夫好」閣「人品好」的師父是上蓋重要，就是學師仔人上大的福氣。同時嘛有一句「師父領入門，修行在個人」。學會出擢（tshut- tio̍h）抑袂？嘛是在師仔的努力佮天分。
閣來，工夫是三年出師，是按怎學師仔就愛三年四個月？有一種講法是按呢：學三年工夫到手師父嘛有認定，就閣佇師父的所在以「師sai」的身份做工課，共這个工錢對師父的「回報」。
不而過，三年出師只是你佇這个行業會當入門爾爾，人講「工夫無底深坑」，是需要繼續精進。有一工你若是獨立開一間店，活會落去袂？濟濟攏是「試練」（考驗，磨練）。你若是會當活甲好好，閣猶有另外一个坎站——就是有人肯共伊的序細送來你遮「學師仔」無？
這種較早的「學師仔」的做法已經是沓沓仔消失去矣！毋過「學師仔」這个先人的智慧佮內涵，攏猶是會當適用佇現此時的任何工夫，任何技術的！
咱敢若是攏共擲挕捒矣！！當今的社會才會「半桶師仔」規四界，「食無三把蕹菜（ìng-tshài）就欲上西天」的是規大堆。先人的智慧、內涵咱就愛共抾倒轉來！
（20240125 Tong-îng）
文章定位：
