1975年，蔣介石死亡值
一片全島摜籃假燒金 e
哀天叫地中
可是，伊 e 死亡卻予時代
有了改變
整個70年代，尤其是後期
台灣 e 知識份子第一遍發現
世界有一種動物
叫做「人」
親像被提掉白內障 e 病人
清楚看著面前動物 e
鼻目嘴
我 e 冊架頂踦一個懸大 e
托爾斯泰，有時踦一個
史懷哲
殷共同 e 化名叫做
人道主義者
我日時看史坦貝克
暗時看高爾基
我將桌頂傷過頭濟 e 冊徙開
開始安上被壓迫 e 人民
e 神位，每日向殷
會失禮
我褪掉皮鞋，真正
閣轉去故鄉 e 田園勞動
﹝無收入無要緊﹞
我穿一領T恤，真正
去塑膠鞋工場做工
﹝一個月900箍新台幣﹞
我研究黃春明 e《看海的日子》
大聲唸王禎和 e《嫁妝一牛車》
我撢掉東方畫會合五月畫會 e 畫
倒轉來洪通 e 素人畫和
朱銘e牛e雕刻上
日夜欣賞
阮開始排斥流放、死亡 e 詩
鼓吹人含土地 e 關係
阮不滿個人主義 e 小說
提倡勞動者 e 文學
阮希望發動一場勞動者 e
革命，想卜將人 e 尊嚴
還予街路、農村、機器邊仔
e 小人物
可惜蔣經國 e 監牢
隨時伺候
阮只好踞值鄉土這條戰線
攬著普﹝phu2﹞色 e 土地凝心
阮 e 另外一半靈魂陷入紅色世界
認真值懸崖頂頭栽銅像，值雲中揣路
阮以馬克斯為師，勤讀資本論
替跨國公司
寫葬詞
阮以第三世界 e 理論
替亞非拉三洲 e 人
喝不平
阮甚至用能趨疲 e 理論
預測工業主義已經行夠
地球 e 盡頭
阮有時也自我批判
自覺小資產階級 e 軟弱
合悲劇
阮非常正經，面容嚴肅
絕對嘸是底講耍笑
可惜，贊成阮 e 人真少
因為台灣人真少人自認家己是
無產階級
整個70年代，差不多是普色 e 色彩
因為土地是普色，工場 e 牆壁
嘛是普色
彼是一個真無趣味 e 時代
阮 e 理論傷過頭國際化
一絲絲仔道無合﹝hah4﹞
台灣現實
彼時，阮嘛是差不多嘸知淡水河合
濁水溪值佗位，阮八 e 人是
觀念上 e 人
值歸屬上，阮猶自認是生活值中國
叫家己是
中國人
※選自《島鄉台語文學》第28號
文章定位：
