玫瑰色 e 頭毛油抹佇伊
散蓬蓬 e 長頭鬃
失去柔軟 e頭毛尾,順勢
披佇伊消瘦 e 肩胛頭
人插花,伊插草
逐工坐佇廟門口
卡早圓圓閣澎皮 e 面形
粉紅 e 面色
佮過去 e 青春夢
攏交互藍天
喙內踅踅唸:
汝哪嘸返來?
我 e 囝仔佇叨位?
人講伊是痟女
遭遇稀微
大學卒業 e 伊
捌有一雙智慧 e 眼神
美麗 e 面容
被人放捨閣流胎
感情 e 失敗
造成伊精神 e 失常
烏白 e 人生
菩薩也難得
排解
聽講業力
是生生世世意識 e 累積
生死輪迴無法度控制
起痟,咁是業障深重 e 刑罰?
超脫 e 方法若是開悟
悟 e 本質是啥貨?
貪瞋痴,虛妄執
一切攏來自習氣
若欲轉化家己
就愛無我無執
啥人會凍幫助伊?
昑馬,伊 e 雙眉合眼神
已經看袂出悲傷佮歡喜
看袂到未來佮過去
遠走 e 愛人
早就飄洋過海
去享受加州 e 黃金日頭
無閣返來
伊痴心不變
共款咧等待伊 e 愛人
勇敢化作廟口一欉
永遠 e 花蕊
※選自《島鄉台語文學》第28號
文章定位: