﹣﹣﹣﹣﹣﹣
20080918 1302
今朝六點九收到你既sms，唔知點解我好似聽到電話聲咁醒咗，真係好奇怪，勉強撐住眼瞓同你傳咗幾條短訊，見你無反應我就瞓番。
你話你琴晚點幾喺sms同佢講分手但佢無覆你，雖然我唔知咩原因，不過就當係解脫喇！唔好再俾機會佢去繼續去傷害你，佢唔識珍惜你，你就去搵一個識珍惜你既人啦；唔會搵唔到，就算真係無都總好過繼續活喺佢陰影下傷害自己。
見到你咁我都唔好過，振作做番自己。
1319
Tik
﹣﹣﹣﹣﹣﹣
20080918 2204
頭先放學打俾你，佢竟然係同你一齊瞓陣覺，咁啫係佢氹番你，分手唔成功啦......
我唔係想咒你，但我真係唔想三日唔埋聽到佢點對你，令你唔開心。
我覺得同佢做朋友無問題，但佢對感情真係不敢恭維。見住佢就好似睇到以前既你咁，真係令我好激氣。
我尊重你任何決定，但同時都希望你有個對自己好既決定。我有諗過係咪有啲因素因為你幫緊佢做grad proj所以佢唔可以同你分手住。我唔係想咁小人之心，只係我唔知佢有幾愛你，一個會一腳踏兩船既人會有幾好，我真係唔知......
我唔想再為你感到心酸......
2223
Tik
﹣﹣﹣﹣﹣﹣
20080919 1343
你既一篇日記再次打亂咗我既思緒同生活。我以為你已經忘記咗我開始新生活，雖然我唔知你過成點，但我想你知我過得點；所以有咩心情都會記低，包括依家既心情。
我既日記打亂咗你既生活，令你傷心喊過、影響你工作；同時你既日紀對我都一樣，不過有啲唔同係我喊唔出，因為我知道喊完之後我都係要一個人繼續生活。
仲愛但唔可以一齊，因為相處有問題......我會一世記得呢句說話。你話你無勇氣面對，我都一樣，如果真係見到你，我諗我真係會講唔出一句說話。
你話我會做第一個被你忘記既人，我真係希望我做唔到，十萬個唔願意......
有好多說話屈喺心，自己一直都唔去諗，因為我諗咗講咗你知都唔會得到我想要既嘢......而且我怕我要聽多次由你口中講出我唔想聽既說話。
無論點都好，我最唔想既係你因為我而傷心難過但我唔喺你身邊......
1408
Tik
﹣﹣﹣﹣﹣﹣
20080920 1440
原來一路堅持去睇我地個舊日記係會有回報，因為我終於等到你再開post。不過唔知幾時你就唔會再去睇同開post，我諗嗰時就係你唔再愛我唔再掛住我同忘記我既時候。
我聽咗一日<憑甚麼愛你＞，感覺異常複雜。你又有無聽過＜會呼吸的痛＞？
我真係好感動感激你仲咁在意我既事會為我既事而喊，連做嘢時都係成個腦都係我。我知咁係好衰，但我真係開心，因為我唔係單戀，你人走咗但心無走；起初我真係無晒自信好唔甘心，點解你只係識咗佢無耐就同佢一齊？真係咁恨不得要即刻離開我？點解唔俾個時間大家去解決問題？點解要逃避？點解唔俾個時間大家諗凊楚大家需要啲咩？我地係咪真係相處唔到到機會都唔俾大家？
當初要絕情既係你，依家講真心話既又係你，點解要咁對我？我呢個幾月都好守遊戲規則，無再打擾你無再纏住你，但竟然唔守規則既係你。不過如果你係識守既當初又點會明明愛我但去同第二個一齊。點解你要咁自私，要兩個對你好既人唔開心？
你記得我日記有一篇關於「無情」既文章嘛？其實我係俾你睇架！你話我地既分開唔關佢事，辜勿論有無關連都好，我都想你明白同知道，就算你同佢分手後會否同我一齊都好，我都衷心想你明白愛情係自私但應該坦白面對自己。
我夠膽講咁多嘢，因為我括咗出去，我知你睇完可能以後有咩心情有咩事都唔會記低俾我知，但我更加希望你睇完會坦白唔去逃避。
1525
Tik
﹣﹣﹣﹣﹣﹣
文章定位：
