許志安的另一半好放心
我同許志安話晒一齊大，想當年，我地兩條友試過一件衫兩份著，亦都試過係若干年前，大家帶埋女朋友去泰國玩，若干年後大家都換晒畫。
許志安咁多年都冇乜緋聞，講來講去都係o個個,大家都知,佢係咁就係咁，所以同佢拍拖都好穩陣。
佢對愛情好專一，唔會亂諗其他人，雖然都會同我地成班男人講o下其他女人，有靚女行過都會望兩眼，然後我地話正，佢就會跟住話：「正 呀！正呀！」
不過佢往往都係講完就算，永遠 得個講字，但冇行動。
未來既許志安一定係個好老公！因為佢家庭觀念好重，好維護佢另一半同下一代，加上佢做人好有計畫,冇乜點死錯人。
三十歲前既許志安已經好穩健,之後只會更加穩健。
所以，阿邊個都好放心。
許志安最愛兩個女人
安仔一生人入面最愛兩個女人，一個係佢阿媽，另外o個個就唔好提啦。
許伯母在生時，佢成日都希望留係屋企食飯。幾年前佢開始減肥，練到六舊腹肌，但係做父母既都想個仔肥肥白白，每次食晏都好似正常屋企飯，唔食就同你過唔去。
安仔雖然好想Keep住身材，但為左唔想阿媽失望，無奈都要食晒d野。
早年既許志安好執著，好在乎得與失。不過自從許伯母過左身之後，佢睇化左好多，執著既程度低左。而且睇得出佢有寂寞既時候，98年佢開演唱會，張衛健打電話叫我安慰安仔，佢話安仔同佢講：「唉！以前開親演唱會都有湯飲，依家得番個神主牌……」係我眼中，安仔既孝順係我識既人之中頭二名，有時我地開演唱會，佢一定要撲飛畀佢阿爸睇，有乜開心野都預埋佢阿爸。
鄭秀文極度怕陌生人
大部分人都覺得鄭秀文好難相處，或者表面上佢對人好冷漠，但我同佢貼身相處咁多年，我覺得其實呢個女仔比好多人更簡單。有時佢會木無表情，因為佢極度怕陌生人，唔敢同唔識既人傾偈。好似唱K咁，如果有d Friend搭Friend既人走入來，佢就當堂周身唔自然，立即正襟危坐，叫杯參茶飲。但如果冇其他陌生人係度既話，佢就可以大字形坐係度，好Relax。
如果佢當你係朋友，佢可以對你好好，例如佢同我女人好Friend，我女人開頭唔慣見記者，佢就用個身幫我女人擋住d鏡頭，完全唔理自己係天后。雖然佢貴為樂壇天后，但始終係一個好普通砼女仔，希望有間屋同屋企人住，將來有老公錫，事業唔知可以光輝幾耐，惟有盡力而為。
鄭秀文堅持帶領潮流
鄭秀文最令我佩服砼，係佢好有恆心。大家都知佢以前幾咁豐滿啦，其實佢係肥底，可以變到依家咁瘦，真係唔到你唔服。佢覺得減肥係工作既一部分，成日話畀自己聽：「我唔可以肥！」因為佢認為「鄭秀文」係潮流帶領者，曾經帶起好多潮流，例如牛仔裙、金毛強都深入民心，就算依家好興呢隻瘦身Look，佢都有份帶起。所以佢覺得，如果呢個潮流係我Set Up既話，應該堅持落去
如果你問佢：「喂！仲有一個鐘頭世界末日，你會做乜？」我相信佢諗都唔使諗，即刻衝去食野，仲係唔肥膩既野都唔食。
雖然佢好鍾意食野，但係要成日抑制自己唔可以食，食幾塊餅又過一日，睇得出佢對事業非常緊張。
鄭秀文為朋友甘願放
我地班朋友當中，唔會理邊個係巨星，邊個係天后，總之係朋友既就係朋友。
鄭秀文係一個好有原則既人，佢有關化妝梳頭既野好有意見，唔係阿Zing化妝唔用，唔係阿邊個梳頭唔梳。佢呢個原則執得好緊，因為佢既事業同佢既形象息息相關，唔緊張唔得。
佢從來未做過任何人演唱會嘉賓，o個次我開口叫佢幫我整場，佢諗都唔諗就話「好呀」！佢知我Budget有限，就問我：「你係咪用Elaine同Eunice梳頭化妝呀？得啦！冇所謂，我照用啦！」
佢會為朋友將佢平時堅持既原則擺埋一邊，如果佢當你係朋友既話。我好希望觀眾可以用第二個角度睇鄭秀文，睇到真正既佢。不過我諗好難，佢對陌生人太有戒心，只會俾人睇到做藝人既佢。呢樣野都無可厚非，有時做人都要識得保護自己。
文章定位：
