好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

公園有一張我特別愛坐的長椅仔，和小妹去曝日頭、講話，坐彼張椅仔。我家己早時公園行兩輾，欲轉去厝進前，也佇彼張椅仔坐一下；吹風、看樹仔。

邊仔的樹仔有大花百日紅（紫薇）、魚木、開黃色花的光蠟樹。光蠟樹的名是看縖佇樹身的名牌，才捌的（不過名牌寫光臘樹，一下看就知影應當光蠟樹才著：臘肉、臘月；蠟筆、蠟燭。）。

轉去厝，上網路，揣「光蠟樹」，講俗名號做白蠟樹、白雞油、脫皮樹、山苦楝。因為樹身堅固材質結實，做建築、家具、雕刻等等有合用。

無偌久以前，我有寫一篇文章，講七十外年前大姊的嫁妝，衫櫥、冊桌仔、梳妝檯、……是爸爸家己畫設計圖，攢柴料，倩木工師傅來厝內做的。我問大姊知影遐的家具是啥木材無？伊講是松梧（檜木）、楠木、烏心石等等；敢若也有講著雞油。

所以，我拍電話予伊，講：「閣來共你考試。」逐遍聽我按呢講，伊就笑出來：「真濟代誌，我嘛袂記得矣。」

我問伊，伊的嫁妝佗一个是雞油做的？伊講毋是雞油，「是雞柔，溫柔的柔啦。」

按呢喔？ 對木材，阮攏是加減聽爸爸講的，雞油，雞柔，嘛有可能是聽來聽去走精。

所以我無欲計較，問啊佗一件是雞柔做的？伊講梳妝檯。

我順紲問伊，以前的人嫁娶會用叫做「𣛮」的柴箱仔囥嫁妝，衫料、繡花枕頭巾、繡花鞋等等；較幼秀的、較貴的金手指、手環，會用一个有玻璃蓋的柴箱仔貯。「彼種玻璃箱仔叫啥？我有一个，媽媽的。」阮媽媽是坐轎車出嫁，無用𣛮；毋過有彼款箱仔。敢若我讀高中的時共提來囥相片、日記。

大姊講：「叫做針仔箱。」

「毋是囥針線，是貯金仔，哪會號做針仔箱？」我懷疑，毋過，大姊一聲就講出來，應當無毋著。

頂遍，我考伊的是員林阮兜的電話，是啥物時陣牽的？

會問起，是因為小弟一篇文章講1977年阮爸爸過身的時，厝內猶未有電話。我講毋著，我會記得拄仔牽電話的時，二舅佇阮兜拍電話來台北，共我講：「我攏共恁爸爸講總是愛牽電話，三不五時才會當和查仔囝、囝婿開講……。今仔日我來參加通話典禮矣。」

紲落去，二舅講：「叫其宏來聽：我對電話這頭斟酒落去，予伊佇台北啉。」其宏是阮翁。

二舅愛啉酒，逐年過年阮轉去，其宏攏會和伊啉兩杯；人狡怪、講話笑詼的二舅才會想著用電話線送酒。

其宏電話接過去，那講那笑，電話中也有聽著阮爸母的笑聲。這个通話典禮真快樂，我會記得；可見爸爸在生的時，厝內就有電話。

啊到底是佗一年裝的？無人會當確定；所以彼日我就共大姊罔問。

大姊講伊會記得阿薇（大姊的弟婦仔，我的阿嫂）欲生第五胎的時，爸爸共伊講：「囡仔出世，若是查埔的，我會拍電話予你。」按呢推算起來，阮兜的電話是1975年以前裝的。

彼个年代，長途電話都毋甘隨便拍，較免講「國際電話」；留學生就流行一種省電話錢的步數：出國進前，先和厝內的人約好，飛行機到位，會拍電話轉去，響三聲隨掛掉。這就是報平安的暗號，厝內的人毋通戇戇攑電話起來，才免納貴森森的電話費。小弟1974年出國的時，阮無做這齣；可見彼陣阮猶無電話。

古早代誌，免傷頂真，毋過，姊妹仔佇Line群組互相討論，也三不五時敲電話共無用Line的大姊「考」一下，心適心適。

嘛真幸福！

2025/12月號《海翁台語文學》