24h購物| | PChome| 登入
2021-07-02 09:17:43| 人氣404| 回應0 | 上一篇 | 下一篇

《台語時間》欠一條筋

推薦 0 收藏 0 轉貼0 訂閱站台

 

我的反應一向有較鈍一个自二十外歲就交陪的朋友就不時講我「欠一條筋」。

偏偏有時我的反應足緊(快),過後就有一點仔後悔。

可比今仔日,我接著一个電話,聽著「車貸」兩字,我應,「這我毋免」,電話隨掛掉。

後來家己反省:敢著遮爾(tsiah-nī,這麼)無情?予人加講幾句,才笑笑仔拒絕,敢毋是較袂傷人的感情?而且,少年人四界拍電話招生理、做這款予大部份的人討厭的代誌,嘛是為著生活啊。

可能也袂當怪我,我罕得用手機,對我來講,手機主要的用途是Line和翕(hip,照)相;一半擺敲電話也是透過Line 。所以來源不明的電話在我心內毋是「來者不善」,就是生份人;接起來的時敢若予電電著,淡薄仔緊張。

有時和人面對面的反應,嘛有較緊、較無禮。

去花蓮旅行,蹛(tuà,住)一間溫泉民宿。號做民宿,在阮眼內,其實是一間有規模的旅社,不管雙層建築外面的色水抑是室內的裝潢和用品攏真有氣質,聽講頭家的本業是做設計;服務人員雖然無幾个,但是服務周至,頭家娘尤其親切。

第二工早起,阮食過簡單的早頓了後,佇中庭行行看看,翕兩張仔相,頭家娘笑笑仔問:「需要我共恁翕合照無?」我講多謝,毋免。

過一時仔,我想講我是毋是有較「冷」?敢有需要按呢違背人的好意?

我問後生我的口氣會較過份無?伊講:「我本來想欲應好啊。」

好咧猶有機會補救,阮行李款好、欲離開前,我自動拜託頭家娘共阮翕相,伊足歡喜,連紲講:「多謝,多謝。」

我講:「哪會顛倒你共我說多謝?」

伊講:「足榮幸啊。」

為著欲予阮的相片有較媠的背景,伊隨去開水道(水龍頭),予一面壁出現「水幕」。

伊遮爾歡喜,遮爾熱情,無疑悟煞變做我做一層好事。

2021.7號《文訊雜誌》

台長: Liu 靜娟
人氣(404) | 回應(0)| 推薦 (0)| 收藏 (0)| 轉寄
全站分類: 圖文創作(詩詞、散文、小說、懷舊、插畫) | 個人分類: 台語文作品 |
此分類下一篇:《台語時間》戇猴抾石頭
此分類上一篇:《台語時間》我毋敢講

是 (若未登入"個人新聞台帳號"則看不到回覆唷!)
* 請輸入識別碼:
請輸入圖片中算式的結果(可能為0) 
(有*為必填)
TOP
詳全文