2020-08-05 08:20:08| 人氣249| 回應0 | 上一篇 | 下一篇

《台語日常》一領花仔衫

推薦 0 收藏 0 轉貼0 訂閱站台

  我慣勢穿素色的衫,會買彼領花仔衫,一方面看伊的花草素素仔,接近自然色;一方面伊是棉的,熱天穿起來涼涼仔。上重要的是,俗俗仔,無貴,免啥考慮就買會落去。

一遍轉去員林,穿彼領衫,大姊講,「誠久毋捌看著你穿花的。」

「有媠無?」

逐遍真注意我的穿插(穿著)、呵咾我gâu(擅)買衫、gâu配衫的大姊一時仔,講,「佇厝內穿袂bái(差)看起來涼涼仔

自彼陣開始,彼領衫就變做厝內粗穿的,kan-na(只)去菜市仔伊才有機會出門

昨昏,禮拜日,囡仔照常轉來食飯,後生竟然講,「媽媽這領衫真媠。」

我穿的就是彼領花仔衫。

新婦紲落(suà--lo̍h,接下來)講「配牛仔褲一定真好看。」

我淡薄仔意外,從來罕得聽著囡仔呵咾我的穿插,這日予in(他們)注意著的竟然是一領我穿咧煮飯炒菜加減有噴著油的衫

「真雅氣,看起來是日本布料。」

我講毋是啦,一領才三百箍。

既然予囡仔按呢另眼相看,我講,「看起來,我著來共伊洗洗、熨熨咧。」

好好仔對待伊佗一工和朋友約會的時配牛仔褲穿出去

按呢講起來,我實在是無自信無主張的人,一領衫的媠抑bái,竟然愛予別人決定。

伊的價數嘛影響著伊的價值,伊若至少一千箍以上,聽大姊講伊適合粗穿的時,我一定會替伊辯護;講伊布料好,花草媠,頷領(ām-niá)有特色。

無法度衫俗(便宜),就予人「看無夠重」;洗的時,嘛是擲入去洗衫機,隨在伊絞;不過有橐lok入去網仔袋

貴的衫較耐穿,其實也是因為予人較好禮仔照顧;有時閣提去洗衫店焦(乾)洗。

出世佇經濟較好的家庭的囡兒會較健康較成材,真大部份嘛是因為受著較好的照顧和栽培啊。 

2020.8.5《自由時報》副刋

 

台長: Liu 靜娟
人氣(249) | 回應(0)| 推薦 (0)| 收藏 (0)| 轉寄
全站分類: 圖文創作(詩詞、散文、小說、懷舊、插畫) | 個人分類: 台語文作品 |
此分類下一篇:五仁的人
此分類上一篇:《台語日常》 一支麻竹筍

是 (若未登入"個人新聞台帳號"則看不到回覆唷!)
* 請輸入識別碼:
請輸入圖片中算式的結果(可能為0) 
(有*為必填)
TOP
詳全文