好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

      去日本四國旅行的一暗，阮三姊妹仔佇（tī，在）飯店看一場劇團的表演。

行入去表演廳，就有人分（發）一个柴做的物件予阮；拍噗仔（鼓掌）用的，聽講按呢手才袂痛。

驚觀眾拍噗仔siunn（過於）激烈？日本人「食飽換枵」，才會去想著做這款工具。

彼个物件，像人的手，也像狹狹的飯匙；兩面有三个柴條仔穿佇鉛線頂頭，共（kā，把）伊晃抑是搖，就會噼噼啪啪。原理和囡仔耍的「手鼓」差不多，也予我想著以前囡仔學行路的車仔，面頂有柴做的兔仔、鳥仔，車仔捒（sak，推）振動，in就會起起落落，噼噼啪啪；囡仔感覺心適，就愈想欲行落去。

彼場表演總共有六个腳數（kioh-siàu，演員），查埔緣投，查某媠。毋過看到落尾，才知影in攏是查埔。粉「糊」甲有夠厚。

人媠，服裝出色，電火照落去，真好看。所以雖然日本話聽無，毋知影in咧講啥、唱啥，阮嘛看甲真趣味。我共大姊講，「媽媽在生時呵咾歌仔戲班，攏會講著戲服鮮、影目（耀眼），腳數媠：可見這是上要緊的。」我閣想著媽媽有時形容小生、小旦，會講「彼个尫仔頭生了真媠」，敢若咧講布袋戲尫仔。

阮媽媽也講過有的人迷做戲的迷甲無算本，會送紅包抑是拍金手指、金祓鍊予in。這陣，佇四國的劇場，也有人送錢；演員行到倚觀眾席的時，有人共日幣夾佇伊的頷領（ām-niá，領子），一爿一張抑是兩張；毋過，我看袂出是千的抑是萬的。

是毋是欲送銀票的人，也著準備夾仔？抑是戲團會提供？不管按怎，這種做法比擲錢上戲台較幼秀，當然嘛比西洋人共錢楔（seh，塞）入去演員的胸坎較文雅。

阮姊妹仔嘛真捧場，直直搖拍噗仔器。

毋過，也有人大力用手拍噗仔，拍節奏，閣綴（tuè，跟）咧唱。一位小姐看起來是日本人，看甲誠入迷，不時喝一聲「啊－－咿」，「喔－－咿」，敢若深山林內的泰山咧喝咻，聲遐爾（hiah-nī，那麼）尖；予我聽一遍就驚一遍。

除了in的表演，我嘛對彼个拍噗仔器誠有興趣。我的小妹講，毋值錢的小物件，提一个轉去做紀念應當無要緊。我講毋通（不行），按呢做是「偷」。

戲煞，行出去的時，我問佇門口行禮、共逐家說多謝的人，「這个物件，我會當買一个無？」伊講No，這是非賣品。「佇外面有地（tè）買無？」伊也講No。

可能是戲團家己做、家己用的。

好咧我有共伊翕起來。

原載2017.11月號《文訊》雜誌