傘．散 ■陳潔民
六月的熱天，定定無定時就落雨，今仔日下晡，雨又閣落矣，風雨將窗外青翠的楓仔樹拍甲晃頭晃尾。
彼工位台北返來，就聽講有風颱。伊想起彼支孤單留佇台北的雨傘。
思念你的時陣，伊就想講，若是會當化作彼支雨傘嘛好，上無，會當留佇你的身軀邊。
對一位女性來講，主動向男方表明感情，佇傳統觀念來講，是一件真大面神的代誌。現代的女性，卜大方表達出對一個人的愛意，無計較對方是毋是共款有意愛，卜勇敢講出來，可能抑是真無簡單，嘛大部分註定結果失敗，不管這位女性的條件外好，伊恰意的人若是個性閉思，無習慣女性倒頭追，就有影真無奈。
卜去台北揣你進前，你寫一張電子批，講台北會落雨，叫伊要會記得帶雨傘。
為啥物專工寫批，只是為著卜交代即件代誌？伊心內想，可能是因為伊有一擺去台北揣你的時陣，無帶雨傘，想未到洶洶落雨，只好佇台北火車頭揣一個路邊攤仔，凊采給一個阿婆買一支雨傘。你驚伊閣未記得，你驚伊渥雨。
伊的記持真歹（bái），毋閣你的交代，伊會儘量會記得。
出門去高鐵進前，伊順煞手提一支藍花的雨傘出門，滿心歡喜，總算有帶雨傘，無將你的交代放未記。
到台北，雨落甲真大。本來你和伊約佇你工作的學校門口，路尾你行地下道過去，佇出口和伊相拄。將伊的行李提過手去，叫伊佇學校門口等你，你家己提入去交代守衛保管，才陪伊去揣一位朋友。
你將行李安搭好勢，夯一支深烏色的雨傘，伊嘛夯出彼支藍花的雨傘，兩人徛佇車牌仔跤，作伙等車。那等，那開講，講一寡仔最近發生的代誌。這個期間，你的學生經過、你的同事經過……。恁等了閣等，時間一直過，是講，和你佇茲開講，雖然是徛佇茲等公車，伊嘛感覺和你作伙的時間真寶貴，並無失去耐性，顛倒感覺公車慢來嘛好。
過半點鐘左右，公車總算來矣。恁坐652的公車到天母，揣朋友。坐佇公車內，伊洶洶發現家己的手竟然變成藍色的，詳細一看，原來是彼支藍花雨傘落色。伊這時陣才知影，這毋是一支雨傘，只是一支干單會當遮日的陽傘。看起來真高級、日本進口的花陽傘，渥雨就落色矣！
落車了後，雨猶原咧落，你左手替伊摜卜予朋友的伴手，正手夯雨傘。伊左手夯雨傘，穿涼鞋的伊，佇落崎閣澹糊糊的路頂洶洶滑一下跤，第一反應就是抓稠你的手予家己平衡，徛好伊就放開你的手，講：「失禮，我差一點仔滑倒。」安靜兩秒鐘，伊看向你的手，閣講：「咁有將你的手用垃圾？」你的面看未出表情，講無。
這支雨傘，就安呢，那落色，那予伊遮雨，遮到朋友怹兜，囥佇怹門跤口，閣咧滴藍色的水，伊穿的中國式白色長衫，嘛染到藍藍的色水。告辭的時陣，伊一直向朋友會失禮，因為藍色的水滴甲歸土跤，佳哉主人無致意。
你和伊去7-11買一支新的雨傘，伊將落色閣滴水的藍花雨傘用塑膠袋仔包乎好，你叫伊歸氣將彼支落色的雨傘撣掉。伊遂講：「未使撣，彼是阮大姐送我的，有紀念性，雨傘閣好好，天氣若好會當用來遮日。」其實伊毋若惜物，更加是惜情。
伊麻煩你替伊收起來，曝乎乾，後擺伊才來揣你提。你小可仔躊躇，問伊：「妳最近咁會閣來台北？」伊講：「會啊，七月就閣來辦一件代誌，才閣來揣你提這支雨傘。」你只好先替伊收起來，提去學校囥，伊因為另外有代誌卜處理，提行李了後，向你告辭。你本來講無卜送伊去捷運，想想咧閣改變主意，送伊行到捷運才離開。
你離開了後，伊家己行向捷運，才想到你頭先的躊躇。
咁講，是因為民間的禁忌？傘，代表了散。抑若無，就是你真驚麻煩，認為這支雨傘既然無好用，撣掉就好。毋閣，伊是一個惜情的人，相信你也是惜情的人。你無想卜替伊收這支雨「傘」，咁講是恐驚和伊的緣分會「散」去？想到茲，伊感覺恁的感情若像是有一絲仔希望。「唉，又閣烏白想矣！」伊佇心內笑家己。
只是，伊會將雨傘交代予你，是因為伊一向是一個真鐵齒的人，人的緣份若會散，就會散。佮雨傘無啥關係。
是講，卡早讀冊的時陣，伊卡無二十歲，確實有一個男性朋友送過伊一支雨傘，因為怹兜開外銷的雨傘工廠，怹兜的雨傘做甲真精緻實用，所以專工提一支送伊，雖然伊有予這位男性朋友拾箍，嘛無效，怹的因緣就佇這支雨傘送伊了後，就散矣。到旦，攏毋捌閣見過面。彼支雨傘，閣拆散伊的姐姐的姻緣，姐姐的男性朋友來厝內，拄好落大雨，姐姐就將伊的雨傘提乎男性朋友夯返去，想未到，日後嘛安呢失去聯絡，雨傘嘛無還返來。
咁講，你和伊嘛會閣因為這支雨傘，因緣遂來散去？
其實，伊對你的感情已經超過十年，只是看你的個性閉思，伊一直恬恬無表明。最近兩、三年，總算對你講出來，只是你毋肯接受伊的感情，只想卜和伊繼續做好朋友，無想卜失去伊的友誼。你對伊講，你這個人未曉照顧人的身體，干單會曉照顧人的心。其實，伊會曉照顧家己的身體，你願意照顧伊的心，已經超過伊的期待，予伊上大的承諾矣！
有人講，對上致意、無想卜失去的人，甘願一直維持好朋友的關係，安呢友誼會當一世人；若是變成情人，準講感情若無結果，就是永遠失去，連朋友都做未成。這是一種拒絕的藉口，抑是真正的理由？
對伊來講，嘛無要緊。只要純純的友誼，就滿足矣。
只是，這支雨傘，咁會乎恁連好朋友的緣份都拆散？只好聽候天的安排矣！
今仔日，伊寫批予你，請你將雨傘撣掉，因為伊已經按算好矣，卜恬恬行出你的生活。因為你將伊的關心當作是傷害，伊的心已經碎糊糊矣！連好朋友嘛無想卜做矣，伊只想卜家己匿起來療傷。
雨傘撣掉，緣分嘛散掉。伊安呢向望，目眶紅紅。
－－作於2012.07.03刊佇《台文戰線》第２８期2012.10
