剛看到朋友的日記，他提到在我們日常廣東話裡，常常出現「鬼」字和「死」字，現在讓我嘗試分析這兩個字的用法吧。
以下內容全屬廣東話，如果閣下看不明白，我也愛莫能助。
１．鬼／死＋形容詞
例１：乜佢咁鬼賤格o架？
例２：乜佢咁死賤格o架？
例３：乜佢咁鬼死賤格o架？
例１同例２o既意思基本相同，而例３個語氣就再加強一ｄ。個「鬼」字同「死」字晌呢度可以解作「非常」(very)，「鬼死」就可以解作「極之」(very very)，兩者有程度上o既分別。
２．死＋動詞
例：你好同我死過o黎！
呢個例子o既「死」字係用o黎修飾「過o黎」呢個動作，表示「你好快ｄ／o拿o拿林過o黎」呢個意思，佢本身並唔係作動詞用。
以上兩種用法，個「鬼」字同「死」字都係狀語（副詞）。
３．死：比喻（明／暗／隱）
例１：真係做死人！
例２：真係死人！
例３：佢死o左去邊？
例１o既意思係「真係做到似個死人」，比喻工作之多可以令講果個做到死。例２o既意思係「真係到似個死人」，比喻講果個疲倦到跟個死人分別不大（心理／生理）。例３o既意思係「佢去o左邊」，因為「死o左」即係唔再存在晌呢個世界上，所以，一般o黎講，「死o左」呢個詞組就有「唔晌度」o既含意。
４．鬼：否定
例：我鬼知佢返唔返o黎。
晌呢度，個「鬼」字有表示否定o既作用，即係作「唔」字用，成句個意思係「我唔知佢返唔返o黎」。另外，呢度用個「鬼」字而唔用「唔」字，帶有「不屑」o既語氣。
５．鬼：語氣助詞
例１．是鬼但。
例２．求鬼其。
以上兩個例子都係求其塞個字晌個詞語中問，形式多數係「詞＿語」，橫線上可以填上好多其他選擇（包括粗口），都係用o黎加強語氣。
吹水完畢。
P.S.
至於點解我地o既語言會出現咁多個「鬼」字同埋個「死」呢……
我鬼知咩？！ =P
文章定位：
