朝陽里 朝政廣克，陽德方亨 http://www.flickr.com/photos/terrykuan

458愛的鼓勵 1訂閱站台

Dear Gary：

　　踏入１２點，你，已經離開左我o地足足五個月喇。人o地話，時間可以沖淡一切，可能係o岩o既，晌五個月前，知道你離開o既一剎，我真係呆左，之後四十小時內，我真係喊到死去活來。我唔知道點解上天要恨心，點解要你走，要令你身邊所有o既朋友，親人，都傷心到干腸寸斷。直到依家，我重睇得出，大家心情都未真正可以平復。時間真係過得好快，記得晌你走哥時，大家將對你o既思念，都摺成白紙鶴，掛晌我地宿舍前o個一棵芒果樹上面，依家，白鶴已經唔見晒，棵樹都已經開o左花結埋果喇。

　　你知唔知道呀？我o地依家成班同學都煩緊超學分o既o野呀！以前８０蚊超一個學分，依家間無良學校要收成２４８蚊一分，單係我就超左成一千七百幾蚊喇！我o地依家唔知點呀，有人話想遊行，有人話想寫匿名信去中告佢，甚至有人話要告上法院添～如果你重晌度，唔知你會點呢？你知你啦，你一定好激架！唉～不過我真係好想睇你頭做呀。

　　知唔知呀！我真係好掛住你架，雖然我o地冇機會再見，但，我真係好想好想可以同你再傾一次計，就好似我地當年同房一樣，傾計傾到眼訓就訓呀！依家得我一個人一間房，有時真係好空虛。講起同房，我地一齊夾份買部洗衣機之前壞o左呀，當時幾焦急呀，你知啦，當初買部洗衣機時，得你同巴頓去買之嘛，我冇去o架！搞到我要打電話問巴頓，點知去到間野又執o左喇～唉！好彩我最後都搵到人上黎修理，三十蚊咋！平過你上次請人上黎整，哈哈，你當時蠢o左喇！唉，如果你聽到我依家咁講，你會點駁我呢？我真係好想知。唔單止部洗衣機，就算係一齊買既洗衣機同飲水機，每次我用起，都好掛住你。你晌你住緊度，有冇諗起我呀？

　　我一直保留住你畀我條鎖匙，一直保留住。當初我有意欲返澳門讀書，你即刻叫我keep住鎖匙，留個記念，唉。依家，佢已經係唯一一樣我可以隨身帶住而又關於你o既o野喇。知唔知？我好後悔冇同你講過一句生日快樂或者聖誕快樂，晌你走前一晚，我想搵你同我食飯架，可惜又搵唔到你，但，點諗過咁就係永別喎！！上天真係好恨心！！

　　你知唔知謝霆鋒同柏芝Ｄ野呀？唉，唔講喇，兩個都係你偶像，我都費事講佢地壞話，費事你嬲我。講起上黎，我地好似鬧過一次交咋喎，唉，可能因為我地始終係同房，始終唔可以傾心咁互疾，唉，相對起上黎，我真想做你知己多過同房呀！起碼唔使咁多避忌。

　　對唔住，我始終冇向人問到你依家晌邊，對唔住，我真係冇咁o既勇氣去問。等我畢業時，我一定會黎探你，真架！等我呀。老土Ｄ都要講啦，雖然我依家唔知你晌邊，但你就真係印住晌我個心度喇！晌我個腦度成日不時都閃出你個樣。有時晌夢中都見到你o架，但係你又點解唔出聲喎？下次答下我啦～

　　雖然我明知我寫呢封信係寄唔到出去，但係我諗你一定睇到，至少，印晌我心入面o既你一定會睇到，我諗，你今晚搵我時，一定識講o野回應我o掛？聽日我賽波喇，唉，如果你晌度，一定會o黎睇啦，係咪？唉，你點解要走喎！？！

　　唉，想唔流眼淚都唔得，可惡，已經忍住架啦～唉，算，都預左～但我寫出黎真係舒服好多，Gary，我真係好掛住你，好掛住大家一齊同房o既時期。１２１號房o既門匙永遠晌我度，你知嘛？佢唔單止係開啟我地以前宿舍o既鎖匙，佢更係開啟我地永恆友誼o既第一條鎖匙，亦係，開啟我對你思念同一切一切回憶o既，唯一一條，匙。

　別了，好友。

　　願你
晌你個世界度，得到
永遠快樂！
　　　　　　　　　
　　　　　　　　　　　　　　　　　　　　　永遠的好朋友　泉　20/5/2002