春天後母面＠告訴我｜PChome 個人新聞台

2017-04-26 14:40:34 | 人氣(13,734) | 回應(3) | 上一篇 | 下一篇

推薦 6 收藏 1 轉貼0 訂閱站台

刊載於「海翁台語文學雜誌」第184期（2017.04）p.80-81

後母就是『繼母』，繼母是北京話。也就是講春天天氣親像後母隨時會變面，當然啦，那變面前人囝就麻煩啦！

現今的時代，這種講法敢若對後母無尊重，不過自古以來不管是後母或者是『繼母』這位，就是一个相當予人難以稱職的稱呼。

台灣俗諺說：「別人的母袂疼別人的囝！」相對的彼句就是：「別人的囝袂友孝別人的老母。」

了解無？後母閣卡優秀閣較慈祥，佮前人囝中間多少猶是會有一層的隔膜存在，這是人性嘛是人之常情。

家己的生母再安怎修理家己生的囝仔，天總是袂塌落來。但是，若是後母盡職教示前人囝，彼就不止是天塌落來而已！

古早安呢，現今嘛是如是，甚至更加嚴重！

春天的天氣變化，就親像囝仔看待後母變臉彼一般，烏陰出日反面無常，真正是掣咧等！

前幾工，屏東氣溫強欲超過三十度，阮後生規工干焦內衫而已，哪知昨日透早變天，平地起風飛沙親像沙塵暴一般，到了中晝又閣落一陣小雨。

下晡雨停風息出門一看，偌大的花盆攏吹翻倒在地，巷子內全是毋知何處飛來的落葉，這——這敢無親像後母咧變面？

日頭落山了後，氣溫綴咧急降，真正是穿衫的速度綴袂著脫衫的緊速！

莫怪人講：「未食五月粽，破裘毋通放。」厚衫亦是愛隨時備便，食過五月粽了後天氣才會穩定吧！

透早上班的時陣，雲低烏陰氣溫才十三度，十點左右突然間雲開出日，雖然雲層消散天蓋一遍的深藍❶，但是海風吹來猶原是冷吱吱，這欲佗一種天氣咧？

窗仔外的海面平靜祥和日光嘛真燒烙，凡勢氣溫欲開始回升了，但是海風吹來嘛是淡薄仔冷。

春天毋是後母面？過兩工凡勢會霆雷公喔？這雷公霆就有蹊蹺了，這時陣做一个動會當予囝仔生較懸一點仔！

序大曾經講過，春雷若響掠囝仔的頭往上搝幾擺，將來囝仔會長底懸大❷！

嘿！這是真的喔！阮後生就比阮懸過一粒頭喔！

❶天蓋一遍的深藍：天像蓋子一樣，一遍深藍色。

❷長底懸大：長得高大。

刊載於「海翁台語文學雜誌」第184期（2017.04）p.80-81

我要檢舉

台長： Tellme

人氣(13,734) | 回應(3)| 推薦 (6)| 收藏 (1)| 轉寄
全站分類: 攝影寫真(作品、技術、器材) | 個人分類: 台語方言系列 |
此分類上一篇:大雪袂寒

回應(3)

告訴我 每天都要讓自己大笑三聲．．．．有益身體健康唷！！！！ 14,112愛的鼓勵 28訂閱站台