假牙清潔做對了嗎?假牙... 花小錢就能成功載妹出遊去台灣50的傻瓜投資術 從茶飲到保健品 寧夏枸...
2017-02-26 21:45:32 | 人氣(8,557) | 回應(0) | 上一篇 | 下一篇

大雪袂寒

推薦 1 收藏 0 轉貼0 訂閱站台


刊載於「海翁台語文學雜誌」第182期(2017.02p.76-79
 
昨日是廿四節氣中間的「大雪」也就是入冬以後的第三个節氣。當日頭行到黃經255度時,這仝就是大雪。
  
這種氣象學問真歹了解,雖然當年讀冊的時陣有修過氣象學,阮老爸嘛佇台糖掌管了四十六年的氣象,不過印像中毋捌聽過這句氣象諺語。
 
就連阮阿母最近時常咧講的:「冬節佇月尾,欲寒佇年尾。」嘛攏記甲離離落落無蓋完整。
 
中央氣象局講,今仔日日時受到南方雲系影響,全台各地日時最高溫大約26度、27度,上低也佇18度以上。氣象局預測,透走晨鋒面通過,大陸冷氣團做伙來到,拜四、拜五雨濟,拜六、禮拜上冷,最低溫下探到11度。
 
其實對這種的氣象預報個人雖然有一點仔懷疑,但是冬天衫早已經準備好,正如台語俗諺所講:「食冷糜等你!」
 
昨日和今仔日仝款,一透早大地就瀰漫著厚厚的霧氣。當時心內咧想,冬天透早霧氣遮爾厚,日時該是出炎日吧?
 
果然無錯,到學校的時陣霧氣已經全然消散,規日日頭真炎,氣溫竟然佇二十八度左右。
 
下班的時陣,紅紅的夕陽照入了向西的大樓,將白色的壁面渲染了淡淡的溫暖的紅色的日頭。
 
這陣真正感受袂著,冬季已過了一半的時間。
 
昨日大雪偏偏南部高溫三十一度半,民間馬上竄出氣象俗諺講:「大雪袂寒明年旱!」和「大雪兆豐年無雪愛遭殃!」
 
會嗎?
 
氣象局的預報員回應講:「中國的俗諺講法,袂當提來解說台灣的氣候,不過會當當做參考,在氣象方面真歹用一个節氣的天氣來推算規个季節。」
 
雖然預報員這種的反應有一點親象咧注預防射,但是伊講中國的俗諺講法袂當用來解說台灣的氣候,卻是相當有道理。
 
農民曆是祖先智慧的結晶,嘛也當講是一門的氣候統計學,偏偏統計上嘛是有誤差的事實。同時間氣候因為區域無仝、地理環境嘛無仝、海拔高度無仝、緯度無仝同,造成的誤差更加大。
 
佇海峽對岸大雪兆豐年無雪受遭殃,佇只有高山頂才會落下雪的台灣,敢講嘛無雪受遭殃?遭啥物殃?蟲殃抑是氣候的劇烈變化造成的災殃呢?不過大雪袂寒明年旱,真緊著會當得到應證矣。
 
農民曆本身傳來到台灣應該是愛做修整的,只是誰人有這種的功力來修整農民曆的節氣?
 
確實!個人總是認為,這種的節氣名詞應該愛做修改,予伊加更適合台灣的民間風情。
 
個人對「清明」這个節氣上蓋袂了解,清明節總是佇國曆四月初五日或者是初六,但是在二十四節氣中,「清明」是在春分以後的十五仝,因此無固定在國曆四月五日,也毋是以農曆來做決定,所以「清明節」因何在國曆四月初五日或者是初六變動,究竟是啥根據?
 
既然按呢,那其他的節氣嘛是應該前後相差一仝吧?但是事實上卻毋是按呢,若無哪有:「冬至佇月尾,欲寒佇年尾。」的講說法?這種誤差是如何造成的?
 
維基百科上講,清明,農曆二十四節氣之一。佇每年四月五日前後太陽行到黃經15°時開始;《月令七十二候集解》:「三月節……物至此時,皆以潔齊而清明矣。」故清明節總是在公曆四月四日、四月五日、四月六日三天中的一天。
 
按呢以此為基礎來說,清明前十五天是春分,後十五天是穀雨,應該是比較準確的說法。
 
維基百科嘛有講,立春,二十四節氣第一個節氣,指太陽行到黃經315°時,為公曆每年二月三至五日之間,表示春天的開始,也是一年的真正開始,人一向就是以立春作為起始點的。對這一仝一直到立夏這段期間,就被稱作為春天。
 
不管如何,對遮的資料來看,太陽行達黃經的度數敢若比老祖先講的,前十五仝或者是後十五仝比較有準確一點仔。
 
只是彼以此為定義標準,那每一个節氣相差檢采無「一定」是十五仝。因為日本大海嘯以後有科學家指出,地球的中軸產生偏移,更加有科學家指出格林威治的標準時間已經不標準矣,按呢這个節氣敢會準確?
 
也就是講,老祖先的農民曆法現在已經算是「過時」矣,過時的農民曆法用佇台灣應該是不準確的。
 
更何況現在發生全球氣候劇烈變遷,這種過時的農民曆法會當用嗎?比如講農民曆法可以預測雨水,就是無法度預測風颱,嘛就是講,揣袂著預測風颱的氣象俗諺。
 
現在農民漸漸變少,少年人往城市去發展老的咧等年金起跳,坦白講農民曆予啥人咧用?
 
不過這个氣象俗諺卻是真正有趣味的所在,比如講:「西北雨落不過田岸路」西北雨就是北京語講的『午後雷陣雨』,來了緊停嘛緊,明明對面咧落雨這爿卻是日頭赤焱焱,真正是落不過田岸路。
 
嘛有激骨話說:「十二月睏厝頂──凍霜」是形容人竭仔哥的意思,真趣味乎?
 
刊載於「海翁台語文學雜誌」第182期(2017.02p.76-79

台長: Tellme
人氣(8,557) | 回應(0)| 推薦 (1)| 收藏 (0)| 轉寄
全站分類: 攝影寫真(作品、技術、器材) | 個人分類: 台語方言系列 |
此分類下一篇:春天後母面
此分類上一篇:六月火燒埔,七月無焦塗

我要回應 本篇僅限會員/好友回應,請先 登入
TOP
詳全文