告訴我 每天都要讓自己大笑三聲．．．．有益身體健康唷！！！！

14,406愛的鼓勵 40訂閱站台

進前采娟講欲招阮兜一家伙仔，猶擱有黃靜媽媽佮幸美裀攏總兩家口仔，租一台二十五人座仔做伙去佚陶。

 

那知黃靜媽媽走漏風聲，尾仔變做租一台遊覽車。

 

迄早起來到黃靜媽媽裀兜欲坐車，才知影是欲去合歡山。

 

其實采娟老早有對我講過，欲去合歡山佮中台禪寺佚陶。我干礁會記得中台禪寺佮埔里而已。

 

結果，我擱開車載阮母仔佮阮某轉去款厚衫褲。

 

好咧佳哉有擱轉去款厚衫褲，若無一定寒死佇合歡山頂，因為山頂才零度耳，日頭出來的時陣嘛才六度而已。

 

頭一工來到埔里人乘寺的地藏院食中晝。九二一大地動以後，幸美裀小弟一家口仔攏受災，後來骨灰攏安奉佇蔗。

 

地藏院收藏真濟十八羅漢的石雕像，師父將後山佈置成一個佛土。師父帶領阮大家參觀，一路上擱以『普賢十大行願品』開示如何修持佛法，尾仔擱請阮啉蓮花茶。

 

師父一甌猶袂啉，我已經灌了想欲擱討一甌。阮某講：「師父講一晡才啉一甌，你用聽的欲啉較最？」

 

我聽了喙開開毋敢欲擱討，無采赫好啉的茶袂凍加啉一甌。

 

第二工透早四點外出發去合歡山，到山頂才知只有零度，阮母仔過年前才去日本看櫻花轉來，衫褲攏便便無感覺有偌冷。

 

我蠻皮干礁穿一領雪衣，雖然無偌冷但是有一點皮皮掣。

 

可能是罕得來山頂，迄時陣有可能是發生高山症，因為感覺有一點仔黑暗眩。

 

采娟講：「奇怪喔，迄咧愛啉咖啡的大兄敢講沒鼻著人咧煮咖啡的芳味嗎？」

 

有喔！我有鼻著，問題是我現在，腳酸手軟咖啡那咧咖啡，用鼻的著好。

 

落山的時陣來到清境農場，阮後生像猛虎放出欄外迄一搬，山頂山腳跑無停，歸身軀舞加全塗。

 

伊爬起里萬里長城腳蔗放乎撸落來，歡喜甲笑袂停。阮母仔講：「囝仔就是囝仔，攏袂恬靜嘛袂喝悿。」

 

中晝來到半山邊的「山水茶藝館」食中晝。

 

采娟講伊佇網路揣著這間，頭前有紅紅的台灣櫻花，厝後是美麗的山景，真正有夠詩情畫意啦。

 

坐咧窗邊看山景真正有媠，我講：「這窗仔擱有竹簾仔，這時陣那那先落陣小雨的話，這情境擱較讚。」

 

這的時袸我看著地板的板仔縫才知影，這間茶藝館是掛咧斷崖外。

 

雖然是用鋼骨柱著咧，呣知呣驚這馬知影，我才開始皮皮掣，阮母仔講：「敢擱會冷？」

 

「是袂冷啦！不過有一點緊．．」

 

「緊尿？去放啊！大人啊家己袂曉去嗎？」

 

我咧！我知影緊尿愛去放，但是我是底緊張呣是咧緊尿。

 

中晝迄頓采娟安排甲真腥臊，但是我食著攏無滋味，我嘛呣知我那會蔗無膽擱驚死。

 

刊載於「海翁台語文學雜誌」第57期（2006.9），p.77。