同呢班人食飯，真係好痴線，會攪到個人精神亢奮成晚訓唔著，今晚都唔例外。
我真心覺得，我在大公司工作數年，最開心o既就係識到呢班白痴。我地真係唔係得一兩個係白痴，而係成班都係白痴，實在係令人難以置信，唔明大公司點解會請到我地呢班人。以前我地成日話，到左廿幾歲，都仲識到一班咁好的朋友，仲要唔止一個，而係十幾個！仲要你又識埋對方的男友女友，越攪越大班人。我想呢o的都係大家的緣份，也是大家的福份。
雖然我地都係相識於大公司，但部份人已經跳槽了無數次，甚至好似我咁著早至他方。唔知點解，總之我地一坐埋，就有無數咁多話題，有時互相講下工作上的憤慨事、或者係講各自男朋友的白痴事、更多時係鹽花四濺、鬥多爛 gag。當我地一聚埋，就永遠係全餐廳至嘈的一枱。我地有句名言叫︰「痴痴呆呆，坐埋一枱」，就係我地o既寫照了。
我和大家笑過，也對著大家哭過，說過開心事，也經常吐苦水。可是，大家都永無嫌棄我講的任何一句說話，我多謝你地！
我會永遠記得譚魚牛、仙宮樓、財記、港大校友會呢o的我地經常出沒的地方。
最後，送上幾個我永遠記得的笑話︰
(一)
剛進入大公司上 induction 時，我和媽媽坐埋一枱，好認真咁討論緊大公司請人的漏洞︰
我︰「大公司請人真係好多 loopholes。」
媽媽︰「係，真係好多 loopholes。」
我︰「你認為有咩 loopholes 呢？」
媽媽︰「請到你咪就係 loopholes lor！」
我︰「大公司請到你真係 assholes！」
(二)
上 induction 時，同我和媽媽同枱的還有肥 b，那時肥 b 仲未表露他的白痴性格，我同媽媽決定撩佢︰
我和媽媽︰「我地可唔可以叫你做『豐豐』？」
肥 b (一臉正經地)︰「你地叫我『子豐』得o勒！」
(三)
我問佳佳︰「你有冇見過安安o既父母？」
佳佳答︰「有呀，見過佢阿爸。」
我再問佳佳︰「係幾時見o架？」
佳佳答︰「拜山o個時，拜佢阿爸呀 ma。」
(四)
大頭出嫁時在米老鼠酒店舉行婚宴，大家艷羨不已。但米老鼠酒店出晒名掠水，我地也為大頭的 budget 而擔心。
眾人︰「大頭，咁米老鼠酒店包唔包埋整請帖？」
大頭(理所當然地)︰「包！！！」
眾人︰「點包法？」
大頭︰「你俾錢咪包 lor！」
(五)
有一次我負責去 book 位食晚飯。
話說我花名叫「菠菜」，我就呃佢地話我用「菜小姐」的名義 book 左八位@譚魚牛。我和部份人早到，當然我地用我的真姓，安然地入坐了，等待其他人的來臨。遲來的部份人(我記得有肥 b 份)則用「菜小姐」的名義入坐。估唔到，當晚竟然又真係有一枱 booking，真係以「蔡小姐」名義 book 左八位！我地就o係遠處見到肥 b 同部份人坐左係近又唔近但遠又唔係遠的另一枱，爆笑！
(六)
有一日午飯時間，只得我和肥 b 兩個人在灣仔區覓食，我地決定試間新野，間餐廳名為 cafe de jade。我地叫左兩個飯，諗住一人食一半，跟住交換食。點知，我食左無幾耐，就發現有隻小強o係碟飯度。我初初都諗住叫伙記換過碟飯就算，點知肥 b 極為神勇，發惡之餘，仲發爛渣唔俾錢，就咁走左。
步出餐廳門口，我問肥 b︰「咁o係邊度再食過呀？」
肥 b︰「其實我已經食飽左。」
肥 b 其後仲作左首詩，但我只係記得頭兩句係︰
「cafe de jade 食咖喱
食出蟑螂好滋味」
唯望有心人指點迷津，記返另外o個兩句。
(七)
話說又有一次，我和康康、肥 b、倫姨、里姨o係灣仔區吃午飯，飯後，里姨報案，話佢只係食左一碟碟頭飯，但居然要一百蚊！
是次街頭騙案，真係令人摸不著頭腦。跟住有一名聰明人士(我唔記得係邊個)整左個表出黎，叫眾人填寫返頭先食o既野係幾錢、俾左幾錢同埋找返幾多錢等資料上去，以便追緝街頭騙案的主腦。
第一名回覆的人士安安，竟厚顏地說出自己食了霸王餐，並無俾錢。但佢堅持自己只係無俾錢，而唔係呃錢！
豈料，個多小時後，只得倫姨一個還未回覆，我地一致認定倫姨就係街頭騙案的主謀人。
點知，過左無耐，我地發現堅持話自己拿出一百元找數的肥 b ，只係拎左五十蚊出黎。真相大白。
呢個呃錢o既人，後來仲向其餘眾人推廣「誠信吃飯」，真係厚顏無恥！
最後，我想問下，仲有冇人 keep 住我地 induction 的大合照？可否 send 返俾我？我o個張唔知走左去邊！
文章定位：