母親節，如果媽媽有睇我個blog，我願意係到同佢講一聲，母親節快樂！(事實上，我絕對100%肯定佢係連網都唔識上的)

　今晚母親節，早早已被約定過海慶祝。而其實，年年母親節都唔淨止得我媽媽和我的兩位哥哥，重有婆婆，二姨，舅母一家，細姨同其丈夫等人。

　今晚的晚餐，可真精彩。但精彩呢家野，永遠都係短暫，耐左，就not 精彩anymore，因為觀眾會覺得睇到有點膩。 所以，今晚之稱得上為精彩，是因為由我坐低係張檯到，跟住睇住啲親戚嗌交，到有人離場，然後舅父鬧婆婆。時間只係十五分鐘左右。(我一路食住花生睇住戲，真係以為睇緊《真情》－笑聲笑聲會冚家拎，快樂爆春袋......)

　鬧o既野係啲咩？我寫出黎，請諸君唔好見笑，因為我覺得佢地鬧o既野，重低B過幼稚園啲小朋友爭玩具時o既對話。

　事情是如此發展的，小弟到銅鑼灣一間潮州店用膳。但由於老闆預備給我們的檯太細張，所以我們要求換張更大的。於是，我們便懷着不太滿意與覺得甚為麻煩的心情，走上一條很斜很多樓級的樓梯，取得較大的一張檯。(其實呢段係渲染一下氣氛，大家睇唔睇都無問題的)

　接着，各親戚便陸續入座。當大家安頓好後，已經有人立即說覺得冷氣很大，要求更換位置。後來，舅母被換了坐在冷氣位下面，她說很凍呀，可不可以較細一點？伙計說不能，因為冷氣只得開關掣。後來伙計不知為何拿了一個remote出來，較小個冷氣。小弟個老母就話：佢唔係熄左佢呀？熄左好侷架。我地坐入面好熱呀！(此時氣氛已經差到差唔多要打仗咁滯)再後來，我都唔記得聽到啲咩，總之就七咀八舌啦！一輪舌戰後，婆婆叫伙計開一把風扇，開了之後，那風扇的強度有如十號風球，吹到我都坐唔癮，但係我就無乜事啦，後生細仔，吹下啲頭髮咪當型下算！跟住，我舅母就發炮話，好凍呀，邊個叫開風扇架？(矛頭直指婆婆，呢啲咪叫婆熄糾紛)婆婆又話，唔係好凍之嘛，有幾凍呀？舅母聞言立即起來，說：返屋企拎褸！女，跟我行。於是，張檯就冷清了很多。

　舅父等了一會，終於忍唔住，稍稍用力，把那酒杯摔在檯上，罵：「阿媽！你做咩鬼野開風扇呀？明知佢話凍！你有時又係o既，你咁樣即係為難我啫！返到去又黑曬口面！你知唔知我有時都好辛苦架！唉！」呢種男人之苦，我深信只有男人才會有切身感受。女人成日呻話要生仔辛苦，又話我地男人膚淺。但係你諗下，我地男人，好多時要面面俱圓，好多時要八面玲瓏，臭脾氣又俾人話無風度，搵唔到錢又俾人話無鬼用，媾條女唔夠靚又俾人取笑自己，讀書唔叻又要俾啲高材生比下去，鹹濕一下又俾人話自己麻甩佬，唔就個老婆又俾人話唔體貼，就得個老婆又就唔到個老母就俾人話唔孝順，我屌！呢個世界，最難做個份工唔係叫特首，係叫男人！

　......後來舅父打電話俾佢老婆，佢老婆話唔黎喇，然後佢就大聲叫伙計：收左兩個位佢！此時氣氛被打入接近零度o既冷凍旋風氣流入面，連北極的企鵝也快要冷死......

　事情到此都差唔多告一段路，作為輩份最低o既我，我當然係無資格出聲。而我呢醒目仔，亦當然唔會出聲啦！因為我知道邊個先開聲勸交或發脾四，邊個就會被天下圍攻！雖然，我個一刻，真係有諗過着草，費事食完背脊骨落。但後來無咁做，係因為，一來我坐最入，走唔甩；二來，我真係好肚餓。

　呢件事令我有一啲啟發。就係，同親戚食飯，係同結婚一樣，攞苦黎辛的。但係親戚同老婆有啲唔同，老婆係有得揀的，但親戚就無得揀喎。親戚，只不過係大家係同一個窿出黎，或者有小小基因近似，就要一世人扮friend。你地都知道，有啲舅母，有啲阿姨，有啲表妹，有啲阿叔個樣個格個鼻哥個屎忽，總係特別乞你僧架啦！但係你又唔可以唔理佢喎，重要成日俾佢問你搵幾錢一個月，讀書定做野，有無媾到女，雖然口裡唯唯諾諾，但大家都知，心入面梗係屌到老母都唔認得啦！

　而我，都幾唔鐘意阿媽個一邊啲親戚的。因為一來，佢地輩份觀念好重；二來，佢地講野總係好大聲；三來，佢地成日都律己以寬，待人以嚴。簡單啲黎講，佢地都幾仆街。無奈地，我老母成日迫我要見佢地，佢地結婚要我着西裝，佢地食飯我地要坐定定，佢地痾屎我地要幫佢洗屎塔。所以，如果有得揀，我係唔會同佢地聯絡的，更加唔會求佢地。

　結論：親戚，遇着啲好o既，係bonus；遇着啲唔好o既，係前世作孽。

　另一方面，我亦覺得，男人真係好難做。從舅父o既角色，大家都睇得到，佢係經過幾十年o既煎熬，虐待，精神折磨，到今晚的爆發。當中o既過程，真係非人能所承受的。所以，有本書叫《生命中不能承受的重》，我相信那作者本身係想寫俾佢的。你地諗下，老母又要顧住，老婆又要睇住，男人好多時候要做磨心。老母屌佢，一定屌佢話偏幫個老婆；老婆又一定屌佢，屌佢只顧住個阿媽。但其實，自己，根本就係想佢地兩個互劈，劈死佢算。但偏偏又唔可以坐視不理，當中個內心掙扎，真係同湯唯應唔應該叫梁朝偉走一樣，(請參看《色戒》一戲)咁艱難，咁痛苦。

　最後，我想講，既然做人做得咁辛苦，又要顧曬老婆老母老豆老闆老爺老屎忽，咁不如，我地由今日起，硬起心腸，見到唔鐘意o既親戚，

同佢地講一聲：「你地，可唔可以收嗲一陣？」

見到唔鐘意o既事，大聲屌一句：「屌你老味個老天爺！我就係唔撚服，吹呀！」