<98年教育部臺灣閩客語文學獎>的參賽作品
.................................................
天曚光，樹頂呀呀叫介阿啾尖慶像叫捱等一下
等一下對面山頭上正醒介老屋
等一下從老屋裡出來找捱介屋卡人
捱係一個扼泥卵介後生人
多盼望像其他過台灣介後生人
坐上用祝福打造介希望大船
用故鄉人的期盼當作風帆
用屋卡人不捨介目汁當作海流
一帆風順介開創新未來
冇過，捱係一個扼泥卵介後生人
阿爸阿姆，還記得曾經有一個像捱介細孲毋?
佢慶愛在屋卡外介牛眼樹下吊晃槓
哪知一吊就係過台灣
一吊就係一生人冇屋卡好轉介流浪
阿爸阿姆，還記的頭過愛遊野在外背介捱毋?
如今捱從唐山過台灣
聽不懂的聲音在耳孔背響起
故鄉介聲像斷線的紙鷂
捱找不到方向
阿爸阿姆，還記得頭過共下蒔田介捱毋?
暗晡夜介路慶像火燒過介稈棚堆
好心介火焰蟲就會在田塍裡帶路
盡頭也會有一盞火指引捱轉屋卡的路
如今捱找不到火焰蟲
找不到一盞火
轉屋卡變的好難
阿爸阿姆，還記得慶愛撕日誌介捱毋?
如今已經撕掉三十三本介日子
達日拿火把出門
達日踏著第一粒星光轉屋卡
一張張冇生命介日誌
就在風車和禾程介殺忙下消失
捱也漸漸唔記得飄著桂花香的故鄉
阿爸阿姆，還記得頭擺慶愛捉揚尾仔介捱毋?
如今捱介細孲也像捱
達日冇著鞋追著揚尾仔
佢哪知揚尾仔想屋卡的心情
佢哪知揚尾仔轉冇屋卡介傷心
就像當年還細介捱𠊎
哪知離開故鄉時阿爸阿姆的痛心
阿爸阿姆，恁久冇看到咧!過介好毋?
捱已經唔係當年扼泥卵介後生人
想在你兜介面前大聲的講：「捱係一個有用介人！」
但捱做不到
捱已經老介像頭擺老屋前介老榕樹
只能惦惦睡在眠床上背
迷濛間，耳孔好像又聽到阿爸唱山歌介聲
好像聞到阿姆打粄介香味
好像又轉到有揚尾仔介老屋卡
轉到童年捱還係細孲介時節
這次，捱唔會過台灣了
因為，捱已經找到轉屋卡介路哩。
文章定位：
