好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

保險公司無熟似si̍k-sāi（熟識）的業務員打電話來，欲揣我的後生。我講我是伊的媽媽，有代誌共我講，我會轉達。

伊講我後生的保險咧欲teh-beh（快要）到期矣，到期了後，主約的保費毋免閣納，但是副約愛繼續繳，才有保障。

紲落suà--lo̍h（接下來）伊講最近有一个意外險新產品，無像以前的產品彼款，可能白納；二十年後，平安無代誌，嘛會當收回百分之百保費加三pha的利息。

雖然白白納意外險嘛免可惜，親像人講的，「用咱的紅毛塗 âng-mn̂g-thôo（水泥）補別人的壁」。家己沒發生事故，會當幫助有需要的人，嘛是做善事。毋過，納過的保費竟然會當轉來家己的橐袋仔lak-tē-á（口袋），這款好空啥人會棄嫌？

「而且，這个意外險產品會保障到101歲。」伊閣講。

「這好，我嘛愛我的後生遐爾長歲壽。」

大概感覺著我的善意，甚至臆ioh（猜測）我對這項產品有認同，伊繼續講，伊一个客戶因為車禍，失去一跤kha（腳）一手，好佳哉當初有保意外險，得著一筆真大的理賠金，生活無問題；一个客戶是建設公司經理，一日去工地，起重機的零件落下來，拍著伊頭殻；真拄好 tú-hó（恰巧），嘛真運氣，幾個月前，伊保意外險，才有法度應付醫藥費佮看護費。

我欲失去耐性矣，「我知影，我已經真濟（多）歲，知影人生的代誌袂按算得，報紙電視嘛是逐日咧看。」

伊卻講袂收煞 suah，「有一个運氣閣較bái …….。」

我真正反感起來，「我欲煮飯矣。」

掠做  lia̍h-tsò（以為）加講幾个歹運的案例著會當說服我？按呢恐嚇較有效果？實在憨甲袂扒癢pê-tsiūnn！

我心內OS，只是歹勢講出喙的話是：「聽起來，買你保險的人敢若kánn-ná攏真衰啊。」

2016.4.4《聯合報》副刋