今日本來諗住焗"海綿蛋糕"(Sponge Cake), 個做法好簡單, 只要分別焗兩片大約一吋厚既圓形蛋糕, 然後就打起d cream, 之後張四分一既cream 搽係其中一片蛋糕既面, 舖上生果粒 (芒果, 桃, 士多啤梨...), 再搽一層cream, 再張另一片蛋糕放上面, 最後再張淨返既cream 搽上蛋糕表面, 做一返批盪工作, 就可以掉入雪櫃. 係咪好簡單呢, 大家不仿返屋企試下啦....^_^
聽落好似好易, 但係不幸地... 當我焗完第一片蛋糕之後, 諗住走出廳比我亞媽聞下點香, 說時遲那時快, 聽到廚房傳黎一下爆炸聲 "BOOM"! (當然係用左跨張法) 我即刻奔入去睇下發生乜事, 一入去睇, 原來成部焗爐"撻"左落地下...D 玻璃佈滿成個廚房, 當我正想講句 "OH....SHI....." 又再一個 "說時遲 那時快" 我亞爸已經開始叫緊我媽咪啦!!(我諗你地應該明白既) 好失落呀!! V_V" 蛋糕又焗唔成, 連個焗爐都爆埋, "唔通連個天都唔鍾意我!" 我"谷"鬼氣連焗好果一片都掉埋....(諗返起都幾傻仔!)
我亞媽臨尾仲潤我一句 "好LU, 以後都唔駛攪LU!" 之後我走左去豐擇睇焗爐, 我睇中一個千幾蚊, 好正嫁, 不過太貴啦...我無買! 跟住不知不覺就行左去冒險樂園, 係閃電一瞬間令我兩眼發光...竟然比我係賞品換領櫃度見到有個 "三洋牌豪華型焗爐 換領績分: 17400" ... 果一刻, 我成個人HOT哂...即刻去睇下自己有幾多績分先, 都有14800, 當時我雄心壯志, 一定要係一日內拿到3000分... 於是我就開始我既儲分任務 --- 七連環 (如果唔知係乜, 可以去睇下) 由於趕時間既關係我只係玩左 $5, 非常好彩, 係幾分鐘內比我中左六連環...拿到600分...YEAH!!
之後出左街, 係好趕急既情況底下, 9:30返到去冒險樂園, 但係佢10:00就收嫁啦....我地要係半個鐘頭內拿到2000分兼且要辨埋換領手續...好似"生死時速"咁...果一刻個感覺上! 唔經唔覺已經玩左15分鐘, 用左五十幾蚊啦, 仲差1700分...只要中一次"七連環" 就岩岩好...四個...五個...已經中左五個啦...好緊張..."叮"...六個...音樂開始響起...叫糊啦...差一個...最後一個, 只要中左就夠分啦...心跳加速...係千分一秒, 我突然諗起一本雜誌(好似係奶週)既星座運情話山羊座既人 "係今週既吉星, 賭錢不仿大膽駁一駁!" 我就吞一啖口水, 就"禁"制... "嘀..嘀...喥...喥..." 個COIN係第七個洞口盪下盪下...生死只一線...就好似亞奇洛架巴士用全速飛緊過橋一樣, 成功落地....中左啦!! 音樂又隨即響起...YESSSS! 超興奮呀...我地即刻飛去換領獎品, 已經9:50分啦...間野都開始拉閘啦...時間岩岩好!
今日簡直係高潮跌起, 好似股市一樣......
P.S. 返到屋企亞爸亞媽嚇到傻左....哈哈....
文章定位：
